وتار
په‌یامێكی دڵسۆزانه‌ بۆ هه‌موولایه‌ك
عـــه‌لــی بـــاپـــیـر


بسم الله الرحمن الرحیم

به‌ڕێزان! خه‌ڵك‌و جه‌ماوه‌ری هه‌رێمی كوردستان‌و ده‌ره‌وه‌ی هه‌رێمی كوردستان‌و تاراوگه‌و سه‌رجه‌م به‌شه‌كانی كوردستان!

به‌پێویستم زانی له‌م هه‌ل‌و مه‌رجه‌ سه‌خت‌و دژواره‌دا كه‌ هه‌رێمی كودرستان‌و عێڕاق‌و ناوچه‌كه‌ پێیدا تێده‌په‌ڕێ‌، به‌تایبه‌ت دوای ئه‌و به‌ڵا گه‌وره‌یه‌ی كه‌ به‌سه‌ر هه‌رێمی كوردستاندا هات، دوای ئه‌نجامدانی ڕیفراندۆم له‌ 25/9/2017، وه‌ك به‌شێك له‌ئه‌ركی سه‌رشانم به‌رانبه‌ر به‌ خه‌ڵك‌و وڵاتی خۆم، كه‌ بێگومان هه‌موولایه‌ك به‌رپرسیارین به‌رانبه‌ر به‌خه‌ڵك‌و كۆمه‌ڵگای خۆمان‌و چاره‌سه‌ركردنی گرفت‌و كێشه‌كانی، به‌ڵێ‌ بۆ په‌یدابوونی گرفت‌و كێشه‌كان، ته‌نیا بڕیار به‌ده‌ستان به‌رپرسارن، به‌ڵام ده‌بێ‌ هه‌موولایه‌ك خۆمان به‌ به‌رپرسیار بزانین بۆ چاره‌سه‌ركردنی ئه‌و گرفت‌و كێشانه‌ی كه‌ له‌گه‌ڵیاندا ده‌سته‌و یه‌خه‌بووین،ئنجا هه‌رلایه‌ك‌و هه‌ركه‌سێك په‌یدای كردبن.

له‌چوار ته‌وه‌ری سه‌ره‌كییدا ئه‌و په‌یامه‌ ده‌نووسم‌و، ڕووی قسانیشم له‌هه‌موولایه‌كه‌:

ته‌وه‌ری یه‌كه‌م: ئه‌وه‌ی ڕوویدا هۆكاره‌كانی چی بوون؟

مه‌به‌ستمان ئه‌و به‌ڵا گه‌وره‌یه‌ كه‌ به‌سه‌ر هه‌رێمی كوردستاندا هات، كه‌ به‌لای كه‌مه‌وه‌ نیوه‌ی پانتایی ئه‌وبه‌شه‌ی هه‌رێمی كوردستان كه‌ له‌به‌رده‌ستی خۆماندبوو، له‌ده‌ستمان چوو، به‌و مانایه‌ كه‌ ئێستا له‌ژێر كۆنتڕۆڵ‌و هه‌یمه‌نه‌ی هه‌رێمی كوردستاندا نه‌ماوه‌.
پێموایه‌ ئه‌وه‌ سێ‌ هۆكاری سه‌ره‌كیی هه‌بوون:

هۆكاری یه‌كه‌م: حوكمڕانیی خراپی پڕسته‌م له‌ (26) ساڵی ڕابردوودا:
دیاره‌ ئه‌میش له‌چه‌ند شتێكدا به‌رجه‌سته‌بوو بوو:

یه‌كه‌م: نه‌بوونی سیستمێكی حوكمڕانیی ته‌ندروست.

دووه‌م: نه‌بوونی دامه‌زراوه‌كان، یان په‌كخستنیان.

سێ‌یه‌م: یاسا سه‌روه‌ر نه‌بوون، به‌ڵكو پێشێل كردنی.

چواره‌م: پێشێل كردنی ماف‌و ئازادییه‌كان‌و كه‌ڕامه‌تی زۆرێك له‌ خه‌ڵك، وه‌ك:

زیندانی كردنی به‌ ناحه‌ق، كوشتن، برسیی كردن، ترساندن، سه‌رو گوێ‌ شكاندن، هه‌ڕه‌شه‌لێ‌ كردن...هتد.

پێنجه‌م: ده‌ست تێوه‌ردانی كه‌س‌و حیزب له‌ كارو باری حكوومه‌ت‌و گه‌نده‌ڵییه‌كی بێ‌ ڕه‌زا، له‌ هه‌موو جومگه‌كانی ده‌سه‌ڵاتدا.

شه‌شه‌م: به‌ پێوه‌ر نه‌گرتنی مرۆڤـ بوون‌و هاوڵاتیی بوون له‌ مامه‌ڵه‌ كردن له‌گه‌ڵ خه‌ڵكداو، حیزب‌و بنه‌ماڵه‌و خزم‌و...هتد، جێ‌ی هاوڵاتیی بوون‌و مرۆڤـ بوون گرتنه‌وه‌.

حه‌وته‌م: سه‌رگه‌رمبوونی به‌رپرسان به‌ بازرگانیی‌و خۆده‌وڵه‌مه‌ندكردن‌و كارو كه‌سابه‌ت كردنه‌وه‌.

به‌كورتیی‌و به‌ كوردیی: سته‌م‌و بێ‌ دادییه‌كی بێ‌ ڕه‌زاو، پشتگوێ‌ خستنی شه‌رعی خواو، گوێ‌ نه‌گرتن له‌ خه‌ڵكی خوا.

دیاره‌ خوا "سبحانه‌ وتعالی" له‌ زۆر شوێنی قوڕئاندا هه‌واڵی پێداوین كه‌ هه‌ر كاتێك سته‌م‌و بێدادیی‌و چه‌وساندنه‌وه‌ هه‌بوو، ئه‌و كۆمه‌ڵگاو واقیعه‌ به‌ره‌و سه‌ر به‌ فه‌تاره‌ت چوون ده‌چێ‌، له‌ سووڕه‌تی: (الأنبياء)دا ده‌فه‌رموێ‌: (وَكَمْ قَصَمْنَا مِن قَرْيَةٍ كَانَتْ ظَالِمَةً...) -11-، واته‌: زۆر ئاوه‌دانییمان فه‌وتاندن، پشتمان شكاندن دوای ئه‌وه‌ی كه‌ سته‌مكار بوون، (حوكمڕانه‌كان سته‌مكاربوون).

هه‌روه‌ها له‌ سووڕه‌تی: (القصص)دا ده‌فه‌رموێ‌: (...وَمَا كُنَّا مُهْلِكِي الْقُرَى إِلَّا وَأَهْلُهَا ظَالِمُونَ) -59-، ئێمه‌ فه‌وتێنه‌ری ئاوه‌دانییه‌كان نین، مه‌گه‌ر خه‌ڵكه‌كه‌یان سته‌مكار بن.

پێغه‌مبه‌ریش "صلی الله علیه‌ وسلم" ده‌فه‌رموێ‌: (اتق دعوة المظلوم، فإنه ليس بينها وبين الله حجاب)، رواه البخاري ومسلم، واته‌: خۆت له‌ دوعای سته‌ملێكراو بپارێزه‌، (ئه‌و سته‌ملێكراوه‌ مسوڵمان بێ‌، یان نامسوڵمان)، چونكه‌ پاڕانه‌وه‌ی مه‌زڵووم له‌گه‌ڵ خوادا په‌رده‌ی له‌نێواندا نیه‌، یه‌كسه‌ر ده‌چێ‌ بۆ خزمه‌ت خوا.

ئه‌م وڵاته‌ی ئێمه‌ زوڵم‌و سته‌مێكی زۆری تێدا كرا، دیاره‌ دوعای مه‌زڵوومانیش له‌لای خوا قبووڵ ده‌بێ‌، كه‌واته‌: ئه‌وه‌ی ڕوویدا، هۆكاری یه‌كه‌می حوكمڕانیی خراپ‌و پڕ سته‌می بیست‌و شه‌ش ساڵه‌ی ڕابردوو بوو .

هۆكاری دووه‌م: گوێ‌ خه‌واندن له‌ چاره‌سه‌ری كێشه‌و گرفته‌كان‌و، لـێ‌ ڕاكردنیان‌و ڕاكردن به‌ره‌و پێشه‌وه‌، وه‌ك عه‌ڕه‌ب ده‌ڵێن: (الهروب الی اڵامام).

كێشه‌یه‌كمان بۆ دروست ده‌بوو "كێشه‌ی سه‌رۆكایه‌تی هه‌رێم" له‌جیاتی ئه‌وه‌ی ئه‌و كێشه‌یه‌ چاره‌سه‌ر بكه‌ین، كێشه‌ی په‌رله‌مانمان ده‌هێنایه‌ پێش، تاكو خه‌ڵك كێشه‌كه‌ی دیكه‌ی له‌بیر بچێته‌وه‌، ئنجا كه‌ په‌رله‌مانمان په‌ك ده‌خست، له‌جیاتی ئه‌وه‌ی واقیع بینانه‌و بوێرانه‌ چاره‌سه‌ری بكه‌ین، ده‌چووین كێشه‌یه‌كی دیكه‌مان په‌یدا ده‌كرد: قه‌یرانی ئابووریی ده‌هاته‌ پێش!.

سه‌ره‌نجامیش كێشه‌ی بێڕه‌زای هه‌نگاونانی هه‌ڵه‌ له‌ كات‌و شوێنی بێ‌جێدا به‌ره‌و سه‌ربه‌خۆیی‌و به‌ ده‌وڵه‌تبوون، كه‌ سه‌ره‌نجام هه‌موو ئه‌و كێشه‌ كه‌ڵه‌كه‌بووانه‌ هه‌م خه‌ڵكی خۆمان‌و، هه‌م دۆسته‌كانیشمانیان زۆر بێزارو نا ئومێد كردو، ناحه‌زانیشمان ئه‌و كێشه‌و گرفته‌ كه‌ڵه‌كه‌بووانه‌ی هه‌رێمی كوردستانیان قۆسته‌وه‌و سوودی خراپیان لـێ‌ وه‌رگرتن.

هۆكاری سێ‌یه‌م: له‌ هه‌نگاونان به‌ره‌و ده‌وڵه‌ت‌و سه‌ربه‌خۆیی، به‌بێ‌ به‌رپێ‌ی خۆ دیتن‌و، گوێ‌ گرتن بۆ هۆشدارییه‌كانی كه‌ له‌ هه‌موو لایه‌كه‌وه‌ ده‌دران، به‌ بڕیار به‌ده‌ستان.

به‌ڵێ‌ ڕیفراندۆم به‌بێ‌ زه‌مینه‌سازیی نێوخۆیی له‌ ڕووی سیاسیی‌و ئابووریی‌و كۆمه‌ڵایه‌تیی‌و دامه‌زراوه‌یی‌و، به‌بێ‌ زه‌مینه‌سازیی له‌گه‌ڵ حكوومه‌تی نێوه‌ندو، وڵاتانی دراوسێ‌‌و، هێزه‌ نێوده‌وڵه‌تییه‌كان، ئه‌نجامدراو، ئه‌و ده‌ره‌نجامانه‌ی لـێكه‌وتنه‌وه‌، كه‌ هه‌موو مرۆڤێكی واقیع بین پێشبینی ده‌كردن، كه‌ من پێموایه‌ ئه‌و هه‌نگاونانه‌ش، چه‌ند هۆكارێكی هه‌بوو:

یه‌كه‌م: نا واقیع بینیی كاربه‌ده‌ستان.

دووه‌م: بێ‌ دامه‌زراوه‌یی، ئه‌گه‌ر ئێمه‌ دامه‌زراوه‌ی په‌رله‌مانمان هه‌بووایه‌و، دامه‌زراوه‌ی سه‌رۆكایه‌تیی هه‌رێم‌و حكوومه‌تمان هه‌بووایه‌، ئه‌وكاته‌ شه‌خسێك، یان چه‌ند كه‌سێك له‌ جیاتی هه‌مووان بڕیاریان نه‌ده‌دا، كه‌ بڕیاره‌كه‌شیان به‌ هه‌ڵه‌دا بچێ‌‌و، سه‌ره‌نجام به‌سه‌ر هه‌موولایه‌كدا بشكێته‌وه‌.

سێ‌یه‌م: له‌ خۆبایی بوون‌و خۆ گه‌وره‌ بینین .

چواره‌م: هه‌ندێك كه‌س له‌گه‌ڵ یه‌كدا ڕاست‌و ساغ‌و ڕاشكاونه‌بوون، چونكه‌ من له‌ خه‌ڵكی دیكه‌ی كه‌ پشتگیریی ڕیفراندۆمیان ده‌كرد، ده‌مبیست كه‌ ده‌یانگوت: ئێمه‌ش ڕامان له‌گه‌ڵدا نیه‌، كه‌چی ئێمه‌ ده‌نگمان هه‌ڵهێناو ڕه‌خنه‌مان لـێگرت، به‌ڵام ئه‌وان خۆیان لـێ‌ كرده‌ كه‌ڕه‌ی شه‌ربه‌ت‌و بێ‌ ده‌نگ بوون‌و، له‌گه‌ڵیدا ڕۆیشتن‌و سه‌ره‌نجامیش ئه‌وه‌ی لـێ‌ كه‌وته‌وه‌ كه‌ بینیمان.

ته‌وه‌ره‌ی دووه‌م: چۆن له‌م دۆخه‌ دژواره‌ ده‌رباز ده‌بین؟

پێموایه‌ كه‌ ده‌بێ‌ ئه‌م حه‌وت (7) كاره‌ بكه‌ین بۆ ئه‌وه‌ی له‌م دۆخه‌ دژوارو سه‌خته‌دا ده‌رباز بین:

یه‌كه‌م:
دان به‌هه‌ڵه‌ی خۆدانان‌و به‌رپرسیاریێتی هه‌ڵگرتن:

عه‌ڕه‌ب گوتوویانه‌: (الإعتراف بالخطأ فضيلة)، دان به‌ هه‌ڵه‌ی خۆدا هێنان په‌سه‌ندییه‌و سیفه‌تێكی به‌رزه‌.

منیش په‌ندێكم هه‌یه‌ ده‌ڵێم: دان به‌ هه‌ڵه‌ی خۆدا هێنان، مه‌سره‌فی زۆر كه‌مه‌، له‌جیاتی ئه‌وه‌ی هه‌ڵه‌كانت به‌ هه‌ڵه‌ی دیكه‌ پینه‌و په‌ڕۆ بكه‌ی‌و دانیان پێدا نه‌هێنی، دانیان پێدا بێنه‌ به‌ ڕوون‌و ڕاشكاویی، هه‌ڵبه‌ته‌ دان به‌هه‌ڵه‌ی خۆدا هێنانیش به‌و واتایه‌ كه‌ تۆ ده‌بێ‌ ئه‌وه‌ی پێشتر به‌هه‌ڵه‌ كردووته‌، ئێستا ڕاستی بكه‌یه‌وه‌، نه‌ك بڵێ‌ی به‌ڵێ‌ هه‌ڵه‌ بووم‌و بڕۆی!! به‌ڵكو ده‌بێ‌ ڕاستی بكه‌یه‌وه‌، بۆ وێنه‌: ئه‌گه‌ر نه‌تهێشتوه‌ حكوومه‌ت حكوومه‌ت بێ‌، ده‌بێ‌ ئه‌و هه‌ڵه‌یه‌ ڕاست بكه‌یته‌وه‌، حكوومه‌ت حكوومه‌تێكی ڕه‌شیدو كارای خاوه‌ن بڕیارت هه‌بێ‌.

ئه‌گه‌ر نه‌تهێشتوه‌ په‌رله‌مان په‌رله‌مان بێ‌، ده‌بێ‌ له‌مه‌ودوا په‌رله‌مان دامه‌زراوه‌یه‌كی ڕێزلێگیراوبێ‌.

هه‌روه‌ها ئه‌گه‌ر ده‌سه‌ڵاتی دادوه‌ریی‌و هه‌ر كام له‌ دام‌و ده‌زگایه‌كان، په‌ك خراون یان له‌نێوه‌ڕۆك خاڵی كراونه‌وه‌، ده‌بێ‌ ئه‌و هه‌ڵانه‌ ڕاست بكرێنه‌وه‌.

دووه‌م: نائومێد نه‌بوون:

خوای په‌روه‌ردگار ده‌فه‌رموێ‌: (...إِنَّهُ لَا يَيْأَسُ مِن رَّوْحِ اللَّهِ إِلَّا الْقَوْمُ الْكَافِرُونَ) یوسف -87-، واته‌: به‌ دڵنیایی ته‌نیا كه‌سانی بێبڕوا له‌ فه‌رحانییه‌ك كه‌ خوا ده‌یهێنێته‌ پێش، نائومێد ده‌بن.

هه‌ڵبه‌ته‌ نائومێدیی وا له‌ مرۆڤـ ده‌كا كه‌ ئه‌ژنۆی بشكێ‌‌و ده‌سته‌و ئه‌ژنۆ دابنیشێ‌، به‌ڵام نه‌خێر نابێ‌ له‌ به‌رانبه‌ر ئه‌م دۆخه‌ ناهه‌مواره‌دا نائومێد بین، چونكه‌ ئێمه‌ خواناس‌و مسوڵمانین.

سێ‌یه‌م: له‌گه‌ڵ خواو ئایینه‌كه‌یدا ئاشت بوونه‌وه‌:

خوا "سبحانه‌ وتعالی" هه‌واڵی پێداوین ئه‌و چاكه‌و نیعمه‌تانه‌ی له‌گه‌ڵماندا ده‌كات‌و، ئه‌گه‌ر سوپاسگوزاریی خوایان له‌سه‌ر بكه‌ین، بۆمان زیاد ده‌كات، ئه‌گه‌ر سپڵه‌یی‌و ناسوپاسییان به‌رانبه‌ر بكه‌ین، لێمان وه‌رده‌گرێته‌وه‌، وه‌ك له‌ سووڕه‌تی (إبراهیم)دا ده‌فه‌رموێ‌: (وَإِذْ تَأَذَّنَ رَبُّكُمْ لَئِن شَكَرْتُمْ لَأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ) إبراهیم -7-، كاتێك په‌روه‌ردگارت ڕایگه‌یاند (ئه‌وه‌ یاسای خوایه‌ ڕایده‌گه‌یه‌نێ‌) ، ئه‌گه‌ر سوپاسگوزاریی بكه‌ن، بۆتان زیاد ده‌كه‌م، به‌ڵام ئه‌گه‌ر سپڵه‌یی بكه‌ن، سزای من تونده‌.

هه‌روه‌ها له‌ سووڕه‌تی (الأنفال)دا ده‌فه‌رموێ‌: (ذَلِكَ بِأَنَّ اللَّهَ لَمْ يَكُ مُغَيِّرًا نِّعْمَةً أَنْعَمَهَا عَلَى قَوْمٍ حَتَّى يُغَيِّرُوا مَا بِأَنفُسِهِمْ...) -53-، واته‌: ئه‌وه‌ به‌هۆی ئه‌وه‌وه‌یه‌ كه‌ خوا چاكه‌یه‌ك‌و نیعمه‌تێكی كه‌ به‌خه‌ڵكێكی به‌خشیوه‌، لێیان وه‌رناگرێته‌وه‌، تاكو ئه‌وان خۆیان وا لێنه‌كه‌ن ئه‌و نیعمه‌ته‌ له‌ده‌ست خۆیان نه‌ده‌ن.

ئێمه‌ به‌ڕاستی له‌نێو نیعمه‌تانێكی زۆردا بووین، به‌ڵام به‌هۆی نادیده‌ گرتنی ئه‌و نیعمه‌تانه‌ی خواوه‌، نیعمه‌ته‌كانمان له‌ده‌ستچوون، كه‌واته‌: با له‌گه‌ڵ خوادا ئاشت بینه‌وه‌، جارێكی دیكه‌ چاكه‌و نیعمه‌ته‌كانی خوا نادیده‌ نه‌گرین‌و پێیان له‌خۆبایی نه‌بین،به‌ڵكو سوپاسگوزاریی خوایان له‌سه‌ر بكه‌ین، كه‌ سوپاسگوزاریی خواش ئه‌وه‌یه‌ نیعمه‌ته‌كانی خوا له‌ ڕه‌زامه‌ندیی خوادا به‌كاربێنین، نه‌ك له‌ گوناهـ و تاوان‌و لادان‌و زوڵم‌و سته‌مدا، نیعمه‌ته‌كانی خوا ده‌بێ‌ له‌ ڕه‌زامه‌ندیی خوادا به‌كاربێنین، ئه‌و ڕزق‌و ڕۆزییه‌ی خوا له‌م وڵاته‌دا دایناوه‌، شوكری ئه‌و نیعمه‌ته‌ ئه‌وه‌یه‌ كه‌ ئه‌و ڕزق‌و ڕۆزییه‌ بۆ خه‌ڵكه‌كه‌ به‌كاری بێنی، نه‌ك بۆ خزمه‌تی خۆت‌و، خزم‌و حیزب‌و، بكه‌یه‌ ملیاردێر، له‌سه‌ر حیسابی برسی كردن‌و ڕه‌ش‌و ڕووتكردنی خه‌ڵك‌و جه‌ماوه‌ر.

چواره‌م: ده‌رككردنی ئه‌و ڕاستییه‌ كه‌ به‌بێ‌ ته‌بایی‌و یه‌كڕیزیی هیچمان بۆ ناكرێ‌:

به‌ڵام ته‌بایی‌و یه‌كڕیزیی ئیختیاریی نه‌ك ناچاریی، ته‌بایی‌و یه‌كڕیزیی ئیختیاریی ئه‌وه‌یه‌ كه‌ له‌سه‌ر بناغه‌ی دادگه‌ریی‌و یه‌كسانیی بێ‌، نه‌ك له‌سه‌ر بناغه‌ی خۆ فه‌ڕزكردن، چونكه‌ له‌هه‌ندێك له‌ وڵاتاندا ئاشتیی‌و ته‌بایی سه‌قامگیره‌، به‌ڵام له‌سه‌ر بناغه‌ی ترساندنی خه‌ڵك‌و تۆقاندنی خه‌ڵك، كه‌ ئه‌وه‌ پێ‌ی ده‌گوترێ‌ ته‌بایی ناچاریی.

پێنجه‌م: زه‌مینه‌سازییه‌كی ئارام بۆ هێنانه‌دی قیاده‌یه‌كی دڵسۆزو ئه‌مین‌و واقیع بین‌و عه‌قڵ‌و دڵفراوان:

كه‌ له‌ سووڕگه‌ی ڕازی كردنی خواو به‌خته‌وه‌ركردنی خه‌ڵكدا بخولێته‌وه‌، نه‌ك له‌ سووڕگه‌ی خۆو خزم‌و حیزب‌و ئه‌و شته‌ بچووكانه‌دا، به‌ڵام ئه‌و قیاده‌یه‌ ده‌بێ‌ له‌ هه‌موو لایه‌نه‌كان گوڵبژێر بكرێ‌، به‌پێ‌ی پێوه‌رو پڕه‌نسیپه‌ دادگه‌ره‌كان، بۆ ئه‌وه‌ی كه‌ هه‌ڵه‌ی دوو حیزبی حوكمڕانی پێشوو دووباره‌ نه‌كرێته‌وه‌، كه‌ هه‌موو شتێكیان بۆ خۆیان قۆرخ كردبوو، له‌ولاشه‌وه‌ كه‌سێكی دیكه‌ خۆی بكات به‌ هه‌مه‌كاره‌ی وڵات، نه‌خێر ده‌بێ‌ ئه‌و خه‌ڵكه‌ی كه‌ له‌م وڵاته‌دا هه‌یه‌، ئه‌وانه‌ی كه‌ وه‌ك گوتم (ده‌ستپاك‌و واقیع بین‌و دڵفراوانن)و له‌ سووڕگه‌ی ڕازی كردنی خواو، خزمه‌تكردنی خه‌ڵكدا ده‌سووڕێنه‌وه‌، له‌ هه‌موو ئه‌وانه‌، قیاده‌یه‌ك پێك بێ‌‌و فریای ئه‌م وه‌زعه‌ بكه‌وێ‌.

شه‌شه‌م: دواندنی حكوومه‌تی نێوه‌ندیی‌و وڵاتانی دراوسێ‌‌و وڵاتانی جیهان له‌سه‌ر بناغه‌ی عه‌قڵ‌و لۆژیك، نه‌ك له‌سه‌ر عاتیفه‌و هه‌ڵچوون‌و هه‌ڕه‌شه‌، وه‌ له‌ چوارچێوه‌ی ده‌ستووردا:

ئه‌و گرێ‌ به‌سته‌ی كه‌ له‌ نێوان حكوومه‌تی ئێمه‌و نێوه‌ندیدا هه‌یه‌، به‌ڵام له‌ ڕێ‌ی شاندێكی شاره‌زای شایسته‌ی پێكهاتوو له‌ لایه‌نه‌ سیاسییه‌كان‌و كه‌سانی ئه‌كادیمیی‌و پسپۆڕ.

حه‌وته‌م: به‌خێرایی ئاوڕدانه‌وه‌یه‌كی جیددیی له‌ خه‌ڵك‌و جه‌ماوه‌ر، له‌ هه‌ردوو بواری ماددیی‌و مه‌عنه‌وییدا:

چونكه‌ ته‌نها دوو كارتی به‌هێزی ده‌ستی ئێمه‌ وه‌ك هه‌رێمی كوردستان، بریتین له‌ خوا "سبحانه‌ وتعالی" كه‌ له‌ فریامان بێ‌‌و پشتمان بگرێ‌، پاشان خه‌ڵكه‌كه‌مان، كه‌واته‌: با ئاگامان له‌نێوان خۆمان‌و خوابێ‌، به‌هۆی پابه‌ندبوونمان به‌ شه‌ریعه‌ته‌كه‌یه‌وه‌، كه‌ فه‌رمان ده‌كات به‌ دادگه‌ریی‌و، ڕێگریی ده‌كات له‌ سته‌م‌و زۆریی‌و قۆرخكاریی، وه‌ ئاگاشمان له‌ خه‌ڵكه‌كه‌مان بێت، به‌وه‌ی كه‌ ئه‌و نازو نیعمه‌تانه‌ی له‌م وڵاته‌دا هه‌ن، له‌ ده‌ستی كه‌سانێكی كه‌مدا قۆرخ نه‌كرێن‌و، هه‌موو خه‌ڵكیان لـێ‌ به‌هره‌مه‌ند بێ‌.

ته‌وه‌ری سێ‌یه‌م: چه‌ند ڕاستییه‌كی ڕێ‌ ڕۆشنكه‌ره‌وه‌:

ڕاستیی یه‌كه‌م: ئه‌گه‌ر خۆمان بۆ خۆمان نه‌بین، هیچ كه‌س بۆمان نابێ‌: كه‌واته‌: وه‌ك خوا بڕوادارانی وه‌سف كردوه‌ (...رُحَمَاءُ بَيْنَهُمْ...) الفتح -29-، (...أَذِلَّةٍ عَلَى الْمُؤْمِنِينَ...) المائدة -٥٤-، واته‌: له‌نێو خۆیاندا به‌ به‌زه‌یین‌و، له‌گه‌ڵ یه‌كدا میهره‌بانن، با ئێمه‌ش به‌و شێوه‌یه‌ بین‌و به‌زه‌ییمان به‌خۆماندا بێته‌وه‌، وه‌ك زۆرجار گوتوومه‌: هه‌ر گه‌ل‌و كۆمه‌ڵگایه‌ك له‌نێو خۆیاندا به‌زه‌ییان به‌خۆیاندا نه‌یه‌ته‌وه‌، كارێك به‌خۆیان ده‌كه‌ن، خه‌ڵكی دیكه‌ به‌زه‌یی پێیاندا بێته‌وه‌!

ڕاستی دووه‌م: هه‌موو لایه‌ك قه‌رزاری پێشمه‌رگه‌ فیداكاره‌كان‌و بنه‌ماڵه‌ی شه‌هیدانین، هه‌روه‌ها هێزه‌كانی دیكه‌ش ئه‌وانه‌ی كه‌ دڵسۆزانه‌ بۆ خواو خه‌ڵك كاریان كردوه‌: كه‌واته‌: با قه‌درزانینمان بۆیان هه‌بێ‌‌و، چی دیكه‌ لـێ‌ نه‌گه‌ڕێین له‌ چوارچێوه‌و سوڕگه‌ی حیزب‌و به‌رژه‌وه‌ندیی شه‌خسیی‌و گروپ‌و بانددا بسووڕێندرێنه‌وه‌، به‌ڵكو بیانكه‌ین به‌ دامه‌زراوه‌یه‌ك كه‌ ئینتیمایان بۆ خه‌ڵك‌و نیشتیمان هه‌بێ‌.

چونكه‌ هه‌ر ئه‌وه‌ ئه‌ركیانه‌‌و ئه‌و ئه‌ركه‌ش كه‌ ئه‌نجامیانداوه‌، به‌ قازانج شكاوه‌ته‌وه‌ بۆ هه‌موو خه‌ڵك‌و وڵات.

ڕاستی سێ‌یه‌م: شكستی ئه‌م جاره‌مان، شكستی به‌شێك له‌ سه‌ركردایه‌تیی سیاسیی بوو، ئه‌و سه‌ركردایه‌تییه‌ سیاسییه‌ی كه‌ بڕیار به‌ده‌ست بوو نه‌ك هی هه‌مووی، چ جای هی خه‌ڵك‌و جه‌ماوه‌ر، یان هی هێزی پێشمه‌رگه‌.

ڕاستیی چواره‌م: یه‌كدی شكاندن‌و ته‌خوین كردن، زیانباریی هه‌موو لایه‌كی تێدایه‌و هیچ كه‌س تێیدا براوه‌ نیه‌و، هه‌ڵه‌ی سیاسییش به‌ خیانه‌ت‌و ناپاكیی له‌ قه‌ڵه‌مدان، سته‌مه‌: كه‌واته‌: با به‌و زمانه‌ یه‌كدیی نه‌دوێنین، به‌تایبه‌ت له‌ كه‌ناڵه‌كانی ڕاگه‌یاندنه‌وه‌، كه‌ له‌ ڕۆژانی ڕابردوودا شتی زۆر خراپ ده‌گوترا، ئێستاش جاروبار هه‌ر ده‌گوترێ‌.

ڕاستیی پێنجه‌م: تاكه‌ سوودێك كه‌ له‌ هه‌ڵه‌و شكسته‌كان وه‌ربگیرێ‌، بریتییه‌ له‌وه‌ی ده‌رس‌و په‌ندییان لـێ‌ وه‌ربگرین: وه‌ك گوتراوه‌: (السعيد من اضغط بغيره)، به‌خته‌وه‌ر كه‌سێكه‌ په‌ند له‌ غه‌یری خۆی وه‌ربگرێ‌.

ڕاستیی شه‌شه‌م: خۆ دوور گرتن له‌ ڕه‌شبینی، چونكه‌ فاشیلترین كه‌س ئه‌و كه‌سه‌یه‌ كه‌ هه‌میشه‌ بۆ خاڵه‌ سلبیی‌و نه‌رێنییه‌كان ده‌ڕوانێ‌‌و ته‌نیا هونه‌ری ڕه‌خنه‌گرتن‌و ناشیرینكردنی به‌رامبه‌ره‌كانی ده‌زانێ‌: پێشینانیش گوتوویانه‌: (بۆق به‌ قیڕه‌ قه‌به‌ نابێ‌)، مرۆڤـ قه‌باره‌ی چه‌نده‌، هه‌ر ئه‌وه‌نده‌، با خۆمان له‌ زمانی ناوزڕاندن‌و ته‌شهیر پێكردن‌و خه‌ڵك به‌ كه‌م ته‌ماشا كردن، دووربگرین.

جارێك چه‌ند گه‌نجێك هاتن بۆلام لیستێكیان پێ‌ بوو، ناوی كۆمه‌ڵێك مامۆستاو بانگخوازی ئه‌م هه‌رێمه‌ی تێدا بوون، گوتم ئه‌وه‌ چیه‌؟ گوتیان: ئه‌وه‌ هه‌ندێ‌ خه‌ڵك گوتوویانه‌: ئه‌وانه‌ ئه‌هلی بیدعه‌تن، نابێ‌ سڵاویان لـێ‌ بكرێ‌‌و گوێیان لـێ‌ بگیرێ‌، منیش گوتم: ئه‌و مونكه‌ره‌ كێ‌یه‌، كه‌ ئه‌و مه‌عڕووفانه‌ی زه‌ڕب به‌سه‌ردا هێناون؟
هه‌ندێك كه‌س هه‌یه‌ كه‌س نایناسێ‌‌و نازانێ‌ كێ‌یه‌ چۆنه‌؟ كه‌چی زه‌ڕب به‌سه‌ر هه‌موو خه‌ڵكی ئه‌م هه‌رێمی كوردستانه‌دا دێنێ‌!

ڕاستیی حه‌وته‌م: پێشینان گوتویانه‌: (هه‌ر عه‌قڵه‌ له‌ خه‌سارێك)، ئه‌و به‌ڵایه‌ش كه‌ به‌سه‌ر هه‌رێمه‌كه‌مان هات، خه‌ساره‌تێكی زۆر گه‌وره‌ بگره‌ خه‌ساره‌تێكی جۆراو جۆر بوو، بۆیه‌ ده‌بێ‌ زۆر ده‌رس‌و په‌ندی لـێ‌ وه‌ربگرین‌و زۆر عه‌قڵی لـێ‌ وه‌ربگرین، به‌تایبه‌ت ئه‌وانه‌ی كه‌ بڕیار به‌ده‌ستن، كه‌ به‌داخه‌وه‌ كاتی خۆی ئێمه‌ زۆرمان گوت‌و، ئه‌وان كه‌میان بیست، بۆیه‌ سه‌ره‌نجاممان به‌م حاڵه‌ گه‌یشت.

ته‌وه‌ری چواره‌م: چه‌ند بانگه‌وازێكی خێرا:
یه‌كه‌م: بانگه‌وازێكم بۆ خه‌ڵك‌و جه‌ماوه‌ر به‌گشتیی: ئه‌وه‌ی كه‌ ڕوویدا به‌پێ‌ی یاساكانی خوا له‌ گه‌ردوونداو له‌ ژیانی به‌شه‌ردا، شتێكی چاوه‌ڕوانكراو بوو، به‌ڵام با ئێمه‌ له‌ ده‌روونه‌وه‌ تێك نه‌شكێین، با باوه‌ڕمان به‌خوا بێ‌‌و، متمانه‌مان به‌خۆمان بێ‌ كه‌ هه‌ڵده‌ستینه‌وه‌.

دووه‌م: بانگه‌وازی دووه‌م بۆ حیزب‌و لایه‌نه‌ سیاسییه‌كان: ده‌بێ‌ ئێمه‌ ته‌واوكه‌ری یه‌كدی بین، به‌سه‌ با چی دیكه‌ به‌ڕه‌ له‌ژێر پێ‌ی یه‌كدی ده‌رنه‌هێنین، با چی دیكه‌ بیر له‌وه‌ نه‌كه‌ینه‌وه‌، چۆن هه‌ر كامێكمان هه‌موو شتێكی بۆ خۆی بێ‌‌و به‌رامبه‌ره‌كه‌ی لـێ‌ بێ‌ به‌ش بكات.

سێ‌یه‌م: بانگه‌وازێكیشم بۆ حكوومه‌تی نێوه‌ندییه‌: كه‌ پێویسته‌ هه‌رچی زووتره‌ حكوومه‌تی نێوه‌ندیی به‌ ئه‌ركی خۆی هه‌ڵسێ‌، كه‌ بریتیه‌ له‌ خزمه‌تكردنی هه‌موو ئه‌و خه‌ڵكه‌ی كه‌ له‌ چوارچێوه‌ی عێڕاقدا خۆیان ده‌بیننه‌وه‌، به‌ هه‌موو پێكهاته‌كانه‌وه‌و، كۆتایی به‌ له‌شكركێشی بێنیێ‌ به‌ تایبه‌تی (حه‌شدی شه‌عبیی) به‌ره‌و هه‌رێمی كوردستان، وه‌ ئاواره‌كان بگێڕدرێته‌وه‌و لاپه‌ڕه‌یه‌كی تازه‌ هه‌ڵبداته‌وه‌ له‌گه‌ڵ هه‌رێمی كوردستاندا بۆ چۆنیه‌تی مامه‌ڵه‌كردن له‌گه‌ڵیدا.

له‌ كۆتاییشدا ده‌ڵێم:
بێگومان گه‌لی كوردیش وه‌ك هه‌موو گه‌لانی دیكه‌ی دنیا مافی خۆیه‌تی كه‌ له‌ خاكی خۆیدا ئازادو سه‌ربه‌ست بێ‌‌و خاوه‌نی ئیداره‌و ئیراده‌ی خۆی بێ‌، ئنجا ئه‌و خاوه‌نی ئیراده‌و ئیداره‌ی خۆبوونه‌، جاری وا هه‌یه‌ له‌ ئۆتۆنۆمییه‌كی ڕاسته‌قینه‌دا خۆی ده‌بینێته‌وه‌، جاری واش هه‌یه‌ له‌ فیدڕاڵییدا به‌رجه‌سته‌ ده‌بێ‌‌و، جاری واش هه‌یه‌ له‌ كۆنفیدڕاڵییداو جاری واش هه‌یه‌ له‌ ده‌وڵه‌تی سه‌ربه‌خۆدا ئه‌وه‌ش كه‌وتۆته‌ سه‌ر هه‌ل‌و مه‌رجی گونجاو و بارودۆخی ڕه‌خساو.

كه‌واته‌: ئه‌گه‌ر ئه‌مجاره‌ له‌ ڕێ‌ی ڕیفراندۆمێكه‌وه‌، كه‌ له‌كاتی خۆیدا نه‌بوو، هه‌ل‌ومه‌رجی بۆ نه‌ڕه‌خسابوو، زه‌مینه‌ی بۆ خۆش نه‌كرابوو، نه‌گه‌یشتینه‌ ئه‌و ئامانجه‌ كه‌ بریتییه‌ له‌ ده‌وڵه‌تی سه‌ربه‌خۆ، با پێمان وانه‌بێ‌ كه‌ بێ‌ مراد بووین‌و ئه‌وه‌ كۆتایی دنیایه‌، چونكه‌ له‌ ڕاستییدا ڕیفراندۆم بریتییه‌ له‌ میكانیزمێك له‌و میكانیزمانه‌ی كه‌ پێ‌ی به‌ره‌و سه‌ربه‌خۆیی‌و به‌ره‌و ده‌وڵه‌ت ده‌چین، ئنجا كه‌ ئه‌و میكانیزمه‌ له‌به‌ر ئه‌وه‌ی زه‌مینه‌ی بۆخۆش نه‌كرابوو، له‌ شوێنی خۆیدا نه‌بوو، بڕیارێكی یه‌كده‌نگیی له‌سه‌ر نه‌درابوو، بێ‌ ئه‌نجام بوو، مانای وانیه‌ كۆتایی دنیایه‌، ئێمه‌ وه‌ك گه‌لی كورد هه‌ر خاوه‌نی ئه‌و مافه‌ین‌و، دره‌نگ یان زوو هه‌ر ده‌بێ‌ به‌و مافه‌مان بگه‌ین، به‌ڵام بێگومان ده‌بێ‌ ده‌رس‌و په‌ند له‌ هه‌ڵه‌كانمان وه‌ربگرین، هه‌ر بۆیه‌ش ئێمه‌ی كۆمه‌ڵی ئیسلامیی زۆر هاوارمان كرد: كه‌ ئێمه‌ له‌گه‌ڵ پڕۆسه‌ی ڕیفراندۆمدا نین، به‌ڵام له‌گه‌ڵ ئه‌نجامی سه‌ربه‌خۆییداین، به‌ڵێمان بۆ سه‌ربه‌خۆیی كرد، چونكه‌ ئه‌وه‌ ئامانجێكه‌و مافێكی ڕه‌وایه‌، به‌ڵام له‌گه‌ڵ پڕۆسه‌كه‌دا نه‌بووین‌و، پێمان وابوو ڕێیه‌كی هه‌ڵه‌یه‌ له‌و هه‌ل‌و مه‌رج‌و زه‌مینه‌ نه‌ڕه‌خساوه‌دا.

خوا به‌ لوتف‌و كه‌ڕه‌می خۆی یارمه‌تییمان بدات كه‌ هه‌وڵ‌و هیممه‌تمان یه‌كبخه‌ین، یه‌ك ده‌ست‌و یه‌ك ڕه‌نگ له‌گه‌ڵ كێشه‌كاندا ڕووبه‌ڕوو ببینه‌وه‌و، له‌م كه‌وتنه‌شمان زوو هه‌ڵسینه‌وه‌.

ئەم وتارە گوزارشت لە رای نوسەر خۆیەتی و بزاڤ پرێس لێی بەرپرسیار نییە
01/11/2017
بابه‌ته‌کانی تری نوسه‌ر ...
1