وتار
گوللـە بە سەركردەكانتانەوە مەنێن!
ئومێد بابان

ئەو پەلامار و هێرشە لەناكاو و (بە بەرنامە و بێ بەرنامەیەی) كە شەوی ڕابردوو كرایە سەر مەكۆی سەرەكیی بزووتنەوەی گۆڕان لە گردی زەرگەتە و بارەگاكەیان درایە بەر گوللـەی (ئێم 4) و بیكەیسی و قەنناس و كڵاشینكۆف، زیاتر لە مانایەك هەڵدەگرێت.
ئەوەی گرتەی ڤیدیۆیی پەلامارەكەی بینیبێت، بە ڕوونی تێدەگات كە ئەو لایەنەی لە پشت هێرشەكەوەیە، ئامانج و مەبەستی جودای هەن و دەیەوێت چەند پەیامێك بگەیەنێت، پەیامی ئەوەی كە جگە لە باڵێكی حزبێكی لەتوپەتكراو و دابەشبوو، ئەوانی دیكە بۆیان نییە ئازادیی بیروڕا، سەربەستی لە بڕیارداندا، جیاوازیی ئایدۆلۆژیا و تێڕوانین و خوێندنەوەی جیا بۆ ڕووداو و پێشهاتەكان، مومارەسە بكەن.
پێدەچێت پەیامێكی دیكەیش ئەوە بێت، بە هەمووان بڵێن، تەنها ئێمە لە سلێمانی پاڵەوانی ساحەین و ڕەتكردنەوەی دەنگ و ڕەنگ و سەنگی ئێمە، بە گوللـە نەبێت، بە شتێكی دیكە وەڵام نادرێتەوە.
هیچ دووریش نییە بیانەوێت ئەو مەسجە بگەیەنن، كە دەبێ بە زەبری چەك، هەمووتان بێنەوە ژێر سایە و سێبەری (تاریكی) ئێمە. ئەمەیش وەك ئەوە وایە، بە زۆری زۆردارەكی، بە ئاشكرا و بە ڕۆژی ڕووناك، ئەوانی تر ملكەچی خواست و داخوازی و ویستەكانی خۆت بكەیت.
ڕەنگە شتێك زۆر سەرنجی بینەرانی گرتەكە ڕابكێشێت، ئەویش بەكارهێنانی چەكی ئەمریكی و ئەڵمانی و ڕووسییە بەرامبەر بە كەسانێك كە لە بارەگایەكدان باخچەیەكی سادەی پڕ لە ڕێحانە تەنیویەتی و تەنیا گوڵ و نێرگز و نەمامی ساوای لێیە، ئاخر هەمووانیش دەزانن، ئەو چەكانە كەی و چۆن و بۆ چ مەبەستێك درانە هێزە ئەمنییەكانی سلێمانی.
با بێینە سەر باسی ئەوەش، ئەوەی دوێنێ شەو لە هەمبەر بزووتنەوەی گۆڕان كرا، جگە لە ئیرهابی فیكری و فیزیكی، نمەكبەحەرامییشە دەرهەق بە سەركردەیەكی كۆچكردوو كە خاوەنی دیرۆكێكی دوورودرێژە لە خەبات و تێكۆشان و كۆڵنەدان، ئەو سەركردەیەی، ماندوویینەناسانە كوردایەتیی كرد و لە پێناو نیشتماندا سەری نایەوە.
نامانەوێ ئاگری شەڕ خۆش بكەین و بە هیوان هەرچی زووتر دۆخی پایتەختی ڕۆشنبیری و جوانی، هێور ببێتەوە، بەڵام تكاشمان وایە چیدیكە گوللـە بە سەركردەكانتانەوە نەنێن، هەر هیچ نەبێت، ڕێز لە شەونخوونی و شەڕی شاخ و شاریان لە پێناو كوردایەتیدا بگرن، یان بە لای كەمەوە، لێگەڕێن با لەناو گڵكۆكانیاندا، ئاسوودە بخەون.    

ئەم وتارە گوزارشت لە رای نوسەر خۆیەتی و بزاڤ پرێس لێی بەرپرسیار نییە
14/05/2018
بابه‌ته‌کانی تری نوسه‌ر ...
12