وتار
دەربارەی چەک و قەڵەم...
‎بابەکر دڕەیی

دەربارەی خەباتی چەکداری..
ڕوداوەکانی ئەم چەند ڕۆژە ڕوداوی دراماتیکی و پڕمانا بون.
ڕوداوگەلێک بون هەڵگری واتای ڕوونی سیاسی و مێژویی.
لە لایەکەوە هێزە کۆنەپارێز و گەندەڵ و بێچوە پیلانگێڕە نوێکانیان دەستیان نابوە دەستی یەک تا ئەو شکستەی لە ناو خەڵکدا خواردویانە بە تەزویری دەنگدان پڕی بکەنەوە، لە لایەکیتریشەوە دەنگدەری ئازاو هوشیار و دڵناسکی گۆڕان بەوپەڕی توڕەییەوە داوای بەرەنجامی دەنگدان و خەباتی مەدەنی لە ڕێبەری گۆڕان دەکردەوە و بە دەنگی بەرز هاواریان دەکرد: لێتان قبوڵ ناکەین دەنگمان بفەوتێ...
واتە لە لایەک غەش و تەزویرو دزی و ساختە، لە لایەکی تر شەپۆلی ناڕەزایەتی و توڕەیی خەڵک لە ڕەهبەری گۆڕان بۆ سەندنەوەی مافەکان..
لەجەنگەی ئەم جەدەل و فێڵ و توڕەییەی خەڵکی بەشخوراودا، شێخ جەعفەر پەلاماری گردی زەرگەتەی دا..
ئێمە (نزیکەی دە کەس لە کادری سەرەکی بزوتنەوەی گۆڕان) لە ژوری مامۆستا جمال بوین کە کاک عەدنان عوسمان هاتە ژورو ڕوی کردە من و وتی کاکە مشور بخۆن دێنە سەرمان.. چەک ... فریاکەوە...
بە گورجی هاتمەدەر و نزیکەی پێنجسەد کەس زیاتر ئەیاننەڕاند کوا مافمان.. کوا .. ئێوە چی ئەکەن...
یەخەیان پێگرتم وتیان: تۆش بڕیاربەدەستی شتێکمان پێ بڵێ... چی بکەین؟؟ .. 
وتم من ئەڕۆم بۆ چەک .. ئێوەش مشور بخۆن .. دێنەسەرمان...
من ڕۆشتم تفەنگەکەم بێنم و داکۆکی لە هاوڕێکانم و خۆم بکەم .. وردەکاری دوای ئەوە هەموان دەیزانن.
ئێستە لە تۆڕە کۆمەڵایەتیەکان وێنەکەی من و کاک عەدنان بە هەردو باردا قسەی لە بارەوە دەکرێ ، بۆیە لام باش بو هەندێ سەرنج بخەمە ڕوو:
یەکەم: بەرنامەی بزوتنەوەی گۆڕان بەرنامەی خەباتی مەدەنی و سیاسیە، هیچ کەسێک ناتوانێ لێی لابدات و بە کەیفی خۆی تەفسیری بکات یان مامەڵەی ناکۆکی لەگەڵا بکات و خۆی بکات بە دەمڕاستی شێوازێکی تری کاری سیاسی.
دوەم : ڕای زۆرینەمان ئەوەیە کە هوشیاری کۆمەڵگا و پاشەکشەی حزبە دەسەڵاتدارەکان لە هەمو ڕویەکی سیاسی و کۆمەڵایەتیەوە، بەرەنجامی ئەو خەباتە مەدەنیەیە کە گۆڕان ڕابەراێەتی ئەکات.
سێهەم: بەڵام وەک چۆن لە بەرنامەی گۆڕاندا خەباتی مەدەنی پێی لەسەر داگیراوە ، هیچ بڕگەو مادەیەک لەم بەرنامەێەدا نێە کە باس لە ملکەچی و تەسلیمبون بکات بەهێزی ستەمکارو مافیا، هەروەک چۆن تاکید لە خەباتی مەدەنی و جەماوەری کراوە بە هەمانشێوە خودی ئیرادەی گۆڕان بۆ چاکسازی پێمان دەڵێ داکوکی لە مافی ژیان و مان ی خۆمان بکەین و ڕێگە لە تەسفیەی ئەندام ولایەنگرو کادری خۆمان بگرین.
چوارەم: هەنێ کەس لە ژێر وێنەکەی ئێمەدا بەسەرسوڕمانەوە کۆمنت لەسەر ئەوە دەنوسن کە نابێ بەڕێوەبەری گشتی ڕۆشنبیری سلێمانی چەکی پێبێ، وەک بڵێی من بە زگماگ هەر بەڕێوەبەری ڕۆشنبیری بوبم و هیچ پاشخانێکی سیاسی و پێشمەرگەییم نەبێ.. لە وەڵامی ئەو بەڕێزانەدا ئەڵێم کە هەروەک چۆن نوسین و قەڵەم لە باریدا هەیە زاڵمان و ستەمکاران ڕیسوا بکات و پاشەکشەیان پێبکات، بە هەمان جۆر تفەنگ و گوللەش لە کاتی پێویستدا دتەتوانێ مافیاو پیاوەکانی دەسەڵات تێکبشکێنێ...
مێژوی گەلانی دنیاو شۆڕشەکانی جیهان هەزاران نمونەی تیایە کە ڕۆشنبیڕەکان پێش هەمو کەس دژی زوڵم و نادادی وەستاون و خەباتیان کردوە.. 
مەگەر زۆرینەی ڕەهبەرانی شۆڕشی فەڕانسە ڕۆشنبیران و پارێزەرەکان نەبون؟
مەگەر شۆڕشەکانی ڕوسیاو ئەمریکاو هندستان لە نوخبەی ڕۆشنیبیران نەبون؟
چەوتیەکی قەبەیه گەر کەسانێک پێیان وابێ ئێمەیەک دوای ۳۷ ساڵ خەباتی سیاسی و پێشمەرگەیی وەک مەڕی بەسەزمان خومان ئەخەینە بەردەم چەکدارانی دەسەڵات تا زیندەبەچاڵمان بکەن..
هەڵەیەکی کوشندەیە هەندێ کەس خەباتی مەدەنی بەوە تێبگەن کە بزوتنەوەی گۆڕان وەک جولەکەکانی ئەڵمانیا بەڕیز خۆی دەخاتە بەردەم تاقەسەربازێکی هیتلەر تا بیانخاتە چاڵی مردنەوە و متەقیان لێنەیەت...
هەڵەیەکی گەورەیە یەکێتی و پارتی پێیان وابێ بزوتنەوەی گۆڕان توانای گۆڕینی بەرنامەکەی نیە لە ماوەی ۲٤ کاتژمێردا یاخود پێیان وابێ ئێمە خەڵکی مەریخین و دابەزیوین بۆ هەرێمی کوردستان و چاوەڕێی لوتف و مەرحەمەتی ئەوانین کەی لە پەرلەمان دەرمان بکەن قسە نەکەین،
کەی لە حکومەت خانەنشینمان بکەن متەق نەکەین،
کەی ساختەی دەنگی دەنگدەڕانیشمان بکەن هەر وەک مردو بێدەنگەی لێبکەین...
هەڵەن..
ئێمەش خەڵکی ئەم وڵاتەین.. ڕێزی ئیرادەو کەرامەتی سیاسیمان دەگرن باشە.. نایگرن خۆیان لێپرسراون...
ئێمەش وەک ئەوان لە چەک و تفەنگ ئەزانین بەڵام بۆ بەرژەوەندی گشتی و بۆ پاراستنی گەل بریارمانداوە پەنا بۆ چەک نەبەین... گەر ئەوان میللەت و گەلیان لا گرنگ نیە ئێمە لامان گرنگە.. بەڵام کاتێک بیانەوێ ئێمەی گوڕانخواز وەک بەشێک لە میللەت بسڕنەوە و تەفروتونامان بکەن ئەوکات هەمو هاوکێشەکان قڵپ دەبنەوە و خوا خۆی ئەزانێ چ دەقەومێ.
ئەم وتارە گوزارشت لە رای نوسەر خۆیەتی و بزاڤ پرێس لێی بەرپرسیار نییە
15/05/2018
بابه‌ته‌کانی تری نوسه‌ر ...
1
زۆرترین بینراو
  • 24 کاتژمێر
  • هەفتە
  • مانگ