وتار
تورکیا لە كەمالییەتەوە بۆ ئەردۆغانییەت
بورهان ڕەئوف



توركیای نوێ‌ لە سەردەستی كەمال مستەفا پاشا ئەتاتورك لە 1923 ڕاگەیەنر ا و كۆتایی بە شەش سەدە حوكمڕانی خەلافەتی ئیسلامی عوسمانی هێنا بە دروشمی یەك میللەت و یەك ئاڵاو یەك دەوڵەت لە ژێر ناوی دیموكراسی سیكوێلاریزم دژی كۆنەپەرستی بەڵام ئەوەی بینیمان ئەگەر دیموكراسی هەبووبێت تەنها بۆ نەتەوەی تورك بووە نكوڵی كردنە بووە لە مافی گەلانی تری ئەو وڵاتەی پاشماوەی عوسمانی كە زۆر بۆ دواوە گەڕانەوە ئەگەر دەوڵەتی خەلافەت تەنها باج و خەراج و سەربازگیری لە گەلانی تر دەخواست و زۆر دەستی وەر نەدەدا لە كاروباری بەڕیوەبردنی میرنشینەكان .
بەڵام سەردەمی كۆماری كەمالیست هەموو ئەو مافانەی سەندەوە لە گەلانی تر كە لە سنووری دەوڵەتی توركیای نوێ‌ دا مانەوە وەكو بەشێك لە كوردستانی باكور و ئەرمەن و عەلەوی و شەركەس و عەرەب …هتد.
من نامەوێت باسی مێژووی سەردەمی حوكمڕانی توركیا ی كەمالی بكەم وا لە ساڵی 2023 دەبێتە سەد ساڵ چونكە ئەو بابەتێكی درێژە بە چەند كتێبێكیش تەواو نابێت نەك بە وتارێك، بەڵام والە 24 حوزیرانی ئەمساڵەو بە پراكتیك ئەردۆغان لە هەوڵی گۆڕینی ئەو سیستەمەدایە لە م هەڵبژاردنەشدا بە تەواوی كۆتایی بە سیستەمی حوكمڕانی پەرلەمانی كەمالی هێنا سەرەڕای ناڕەزایەتی زۆرێك لە هێزوو لایەنە ئۆپۆزەسیۆنەكان .
ئێستا دەتوانین ناوی بنێین سەردەمی ئەردۆغان چونكە تەنها ئەم توانی زۆربەی بنەماكانی سیستەمی كەمالی بگۆڕێت سوپای ئەو وڵاتە كە پێشتر لە هیچ كام لە سەرۆك كۆمارو سەرۆك وەزیرانەكانی ئەو وڵاتەی قبوڵ نەكردووە دەستكاری بنەماكانی دەستووری ئەو وڵاتە بكەن و خۆیان بە پاسەوانی دەستورو عیلمانی زانیوە، بەڵام ئێستا دەستەمۆی ئەردۆغانن دەزگاكانی دادوەری و بانكەكانیش تا ڕادەیەكی زۆر پاكسازی كراون لە نەیارانی ئەردۆغان پێشتریش بە بیانووی كودەتاكەی 15 تەمووزی 2016 بەشێكی زۆر ی نەیارەكانی لە هەموو دامودەزگاكانی دەوڵەت چ لە سوپا و هێزەكانی ئاسایش و پۆلیس دادگاكان و پەروەردەو …تد دوورخرانەوە لە كارەكانیان یان ڕاپێچی زیندانەكان كران بە شێوەیەك كە هەموو زیندانەكان سیخناخ كراون .
بەڵێ‌ ئەردۆغان هەر ڕۆژی 24 ی حوزەیران دوای كۆتایی هاتنی پرۆسەی دەنگدان لە وتاری سەركەوتن دا وتی چۆن پێشووتریش لە وتاری سەركەوتن لە ڕاپرسی گۆڕینی دەستوور پیرۆزبایی لە گەلی توركیا و دواتریش پیرۆزبایی لە گەلانی ناوچەكە كرد وتی پیرۆزبایی لە خەڵكی سوریا و عێراق و ئەفغانستان و پاكستان و هەموو زۆرلێكراوان دەكەم ئەمجارەش وتی :
پشت بەو متمانەی پێتان بەخشین ئەمڕۆ لەم هەڵبژاردنەدا بەیەكەو پشت بەخوا دەگەینە هەموو ئامانجەكانمان بۆ ساڵی 2023 كە دەكاتە یادی سەد ساڵەی ڕاگەیاندنی كۆماری توركیا دیارترین و گرنگترینی ئەو ئامانجانە ئەوەیە توركیا ببەینە ڕیزبەندی یەك لەو دە دەوڵەتە زەبەلاح و خاوەنی هێزو داهاتی ئابووری لە سەر ئاستی جیهان لەم پێناوەشدا دیدگای سیاسی شوێن و ڕێ‌ ی پێویست گیراوەتە بەر بۆ ئەوەی تا ئەو بەروارە توركیا ببێتە خاوەنی داهاتی نەتەوەیی دوو تریلیۆن دۆلار لە ساڵێكدا .
لە هەمانكاتدا بەڵێنی دا كە بەهەموو توانایەكیەوە بە گژ هێزە تیرۆریستەكاندا بچێتەوە، ئەوەی بۆ كورد جێگەی نیگەرانیە و لە بانگەشەی هەڵبژاردنەكانیشدا بە دەنگی بەرز هاواری دەكرد كێشەیەك نییە بە ناوی كێشەی كورد بەڵكو كێشەی تیرۆرمان هەیە ئەمە بۆ ناوخۆی توركیا .
ئەوەی پەیوەندی بە دەرەوەی سنورەكانی توركیاشەوە هەیە وتی: هەوڵدەدەین بۆ ڕزگاركردنی زیاتری خاكی سوریا و قایم كردنی پێگەی نێو دەوڵەتی توركیا لەم پێناوەدا كاتمان نیە بە فیڕۆی بدەین .
هەموو ئەمانە لە كاتێكدا ڕوودەدەن توركیا یەكەم فڕۆكەی F35 لە ئەمریكا وەرگرت لە چوارچێوەی ئەو بۆندەدا كە سەد فڕۆكەی جەنگی پێشكەوتوو بكڕێت كە ڕۆكێتەكانی دەگاتە هەموو شوێنەكانی ڕۆژهڵاتی ناوین كە ئەمە یەكێك لەو خاڵە بەهێزانەیە كە ئەردۆغان زۆر شانازی پێوەبكات و ئەو هەڕەشانەی پێوە بكات .
بەڵام لە بەرامبەردا ئەوروپیەكان و ئەمریكا خۆشحاڵ نین بەرامبەر بەم لێدوان و هەڵسووكەوتانەی ئەردۆغان هەربۆیە كۆنگریسی ئەمریكا لە هەوڵی ئەودایە ئەو بۆندی فرۆشتنی فڕۆكەی جەنگی F35 ڕابگرێت لە بەرامبەر دەستوەردانەكانی لە سوریا و هاوپەیمانێتیەكانی لە گەڵ ڕوسیا و ئێران بێجگە لە پێشێلكارییەكانی مافی مرۆڤ هەروەها كرێنی سیستمی ڕۆكێت و ڕاداری S400 ڕووسی ئەوەش كێشەو نیگەرانییەكی تری ئەمریكا و پەیمانی ناتۆیە .

 
ئەم وتارە گوزارشت لە رای نوسەر خۆیەتی و بزاڤ پرێس لێی بەرپرسیار نییە
02/07/2018
بابه‌ته‌کانی تری نوسه‌ر ...
1
زۆرترین بینراو
  • 24 کاتژمێر
  • هەفتە
  • مانگ