وتار
بۆچی گـــــــــۆڕان لەهەڵبژاردن ناترسێ؟
بەرهەم مستەفا

بزوتنەوەی گۆڕان وەک یەکەم هێزی ئۆپۆزیسیۆن و نەخێر بەڕووی دەسەڵاتێکی گەندەڵ و تاڵانچی ، کاری بۆ گۆڕینی سیستمی سیاسی هەرێم کردوەو بەئێستاشەوە بەردەوامە و لەوپێناوەشدا باجی زۆریداوە ، بەڵام چونکە٫ گۆڕان هێزی گۆڕانکارییە ٫ باش لەو ڕاستیە گەیشتووە کە ئەم ڕێگایه هەورازونشێووی زۆری تێدایەو پێویستی بەقوربانی و پشوو درێژییە ..، ئەمە وێڕای ئیش کردنی چەندین دەزگای زەبەلاحی ڕاگەیاندن و چەندین هێز بەخۆیان و شاگردەکانیانەوە ئەیانەوێت لەمپەر لەبەردەم ئەم هێزەدا دروست بکەن،.. بەڵام لەبەرامبەر ئیرادەی گۆڕانخوازاندا شکستیان هێناوەو نەیانتوانیوە هەنگاوەکان ڕابگرن...، ڕەنگە توانرابێ بەتەزویرو ساختەچێتی ژمارەیان گۆڕیبێ بەڵام نەیانتوانیوە ئیرادەمان بۆ گۆڕانکاری ڕابگرن ، ڕاستە توانراوە ڕێگری لەسەرۆکی پەرلەمان و وەزیرەکانی کرابێ، لەپێناو ڕێگری لەبەرنامەی کاری ئەم بزوتنەوەیە، کەخزمەتە بەهاوڵاتی و کێشەبووە بۆ دەسەڵاتێکی خۆسەپێن..، بەڵام ئەم ویستە بۆ بەردەوامی هەنگاوەکانی چاکسازی پاشەکشەی نەکردوە .. هەمیشە بزوتنەوەی گۆڕان هەڵبژاردنی وەک شاڕێی گۆڕانکاری سەیرکردوەو خەباتیشی لەو پێناوەدایە ، کاتێکیش قسەی لەسەر پرۆسەی دەنگدان و هەڵبژاردن ئەبێ ، ئەمە ترس نیە ،بەڵکو درک کردنە بەو مەهزەلەی بەناوی هەڵبژاردنەوە هێزە ساختەچیەکان کاریان بۆ کردوە ، هیچ هێزێک نیە لەکوردستاندا هێندەی گۆڕان بڕوای بەهەڵبژاردن هەبێ چونکە ئەم هێزە هێزی دەنگدەرە و ئاوێنەی سەرجەم نەهامەتیەکان بووە کە دەسەڵات ڕووبەڕوی هاوڵاتی کردۆتەوە ..، ئێستاش گۆڕان نەپساوە و نەترساوە بەڵکو حەقی خۆیەتی داوای پرۆسەیەکی پاک وبێگەرد بکات ، گۆڕان نایەوێ هەڵبژاردن لەپێناو هەڵبژاردن بکات بەڵکو ئەیەوێت هەڵبژاردن لەپێناو ژیان و گوزەرانی خەڵک و گۆڕینی سیستمی سیاسی بکات دوور لەتەزویر ، کەواتە کەهێزێک هەڵگری پەیامێکی ڕوون بێت ، بۆ ئەبێ لەهەڵبژاردن بترسێ ...؟ گۆڕان نەخیانەتی نیشتیمانی کردوە ، نە خاکی دۆڕاندوە ..، گۆڕان نە نەوتی دزیوە نە خێرو بێری ئەم وڵاتەی بردوە ، گۆڕان دیاری دەستی چارەکە موچە نەبوە بۆ موچەخۆران ، بێ ئاوی و بێ کارەبایی ، شکستی پەروەردەو تەندروستی لەسەر دەستی ڕوینەداوە تابترسێ لەهەڵبژاردن .. کەواتە گۆڕان لەهەڵبژاردن ناترسێ بەڵکوکار بۆ هەڵبژاردنێک دەکات کەهەڵبژاردن بێ نەک مەهزەلە ...
ئەم وتارە گوزارشت لە رای نوسەر خۆیەتی و بزاڤ پرێس لێی بەرپرسیار نییە
07/09/2018
بابه‌ته‌کانی تری نوسه‌ر ...
1