وتار
ساڵێک دوای ڕیفراندۆم!
ئاكام على

دەقیق ساڵێک پێش ئێستا بارزانی و سەرجەم هاوئاوازەکانی لەسەری ڕەش کۆکردەوە،بەیعەت و بەڵێنی لێوەرگرتن بۆ ئەنجامدانی ڕیفراندۆم،ئەنجومەنی باڵای ڕیفراندۆمیان درووست کرد،بڕیاریاندا قوماربکەن بەچارەنوسی میلەتێکەوە،سەرانی ڕیفراندۆم لە ڕوانگەی ئەوەی گوایە ئاگاداری هەڵوێستی وڵاتانی نێو دەوڵەتی و هەرێمایەتی بوون،وەک ڕۆژی ڕووناک لێیان دیاربوو ئەم یارییە دەدۆڕێنن،بەڵام عینادی و کەڵەگایی سیاسی ئەم پۆلە سیاسیە وایکرد چارەنوسی ئەم میللەتە بەو دەردە ببەن، سەدەیەک لەخەونی سەربەخۆی بیگەڕێننەوە دواوە،بەتایبەتی کەرکوک وناوچەدابڕینراوەکان بوونە قوربانی ئەم سیاسەتە هەڵەی بارزانی و هاوئاوازەکانی، ئەگەری چی بارزانی وتی "ئامادەم سەری خۆمی لەسەردابنێم"بەڵام نەک سەری خۆی دانەنا بەڵکو ئامادەش نەبوو شکستەکەی بگرێتەئەستۆ،تەنها ئەوەنەبێ کە بڵێ خیانەتی 16ئۆکتۆبەر وای کرد کەرکوک بەودەردە بچێت..
(ئاخر جەنابی بارزانی!)کە هاوارمان ئەکرد ڕیفراندۆم مەکەن،ئێمە ئەمان زانی ئەم هەرێمە خاوەنی پێشمەرگەی نیشتیمانی نیە،بەڵکو پێشمەرگەی حیزب و بەرپرس هەیە، هەرکەس بەئارەزووی خۆی هێز ئەجوڵێنی...
واساڵێک تێ ئەپەڕێت ئێستا نەک باسی ڕیفراندۆم ناکرێت بەڵکو جووت حیزبی ڕیفراندۆمچی بەتاک و بێ گوێدانە ئەو یەکڕیزییە خۆیان بەیتوبالۆرەیان بەشانوباڵدا هەڵدەدا،خەریکی گەڕانن بەکوچەو کۆڵانەکانی بەغدا و دەستماچکردنی ئاخوندەکانی شیعە و حەشدی شەعبی،تەنها لەپێناو  پێدانی سەرۆک کۆماری ئەو عێراقەی کەخۆیان بەجیران وەصفیان دەکرد..
سەرانی ڕیفراندۆم هێندە ڕووقایمن ساڵێک پێش ئێستا بانگەشەی دەوڵەتی سەربەخۆیان ئەکرد و ئەیان وت بای بای عێراق!! ئێستا لەسەر بچووکترین پۆستی ئەو بەغدای کە بەدوژمنیان ئەزانی شەڕیانە لەنێوخۆیاندا،ئێوە کە هێندە خێرابوون بۆگەڕانەوە بۆبەغدا خێربوو وا چارەنوسی میلەتێکتان خستە قومارێکی دۆڕاوەوە؟ئێستاش ئەوانەی عەرابی ڕیفراندۆم بوون هەریەکەیان خەریکی تۆمەتبارکردنی ئەویتریانە، کەسیان ئامادەی ئەوەنیە داوای لێبووردنێک لەو گەلەستەمدیدەیە بکا کە 27ساڵە ئەمانە هەرڕۆژەی لەژێر ناوێکدا دووچاری نەهامەتی ئەکەن.. تاتوانیان شەڕی ناوخۆیان کرد، وڵاتیان وێران کرد،کە توانای شەڕیشیان نەما بەناوی ڕێکەوتنامەی ستراتیژییەوە داهاتی وڵاتیان لەنێوان خۆیاندا بەش کرد،بەناوی ئابووری سەربەخۆوە وڵاتیان خستە ژێرقەرزێکی زۆرەوە،موچەی موچە خۆرانیان کرد چارەک و نیوە،دوایش بەناوی سەربەخۆییەوە لەسەدا پەنجای خاکیان زۆر بەئاسانی تەسلیمی بەغداکردەوە،وائێستاش شەڕێکی سەختیانە لەسەر پۆستی سەرۆک کۆمار خوا بکا لەسەر ئەو پۆستە میللەن توشی دەردە سەرییەکی ترنەکەن...
ئەم وتارە گوزارشت لە رای نوسەر خۆیەتی و بزاڤ پرێس لێی بەرپرسیار نییە
27/09/2018
بابه‌ته‌کانی تری نوسه‌ر ...
1
زۆرترین بینراو
  • 24 کاتژمێر
  • هەفتە
  • مانگ