وتار
ڕۆڵی ماستاوچی مەسینەهەڵگر لە ناو حیزبدا
دانا مەنمی

ماستاوچی بگاتە پلەی هەرەبەرزی دەسەڵات چ لەحیزبدا بێت یان لەحکومەت ناخ و کەسایەتی لاوازو نزمە ، مەرایی و ماستاوکردن جاسوسی و ڕاپۆرتوسین لەناو حیزب و حکومەتدا بۆ کارکتەرێک کەناوی بەرپرسە لەوانەیە نەخوێندەوەرو ناحاڵی و نەفس نزمیش بێت ،لەپێناو ئافەرینێک یان تیکە نانێک لەفەرمانی شەونخونییەکی بەتاڵ و مایەپوچ هیچی تر نییە ،ئەمە هەم سوکایەتییە بەخودی خۆی و هەمیش بە مرۆڤایەتی ، بۆیە سوکایەتییە بە مرۆڤایەتی چونکە ئەو ماستاوچییە ئەو ڕاپۆرتنوسە جاسوسە خۆماڵییە مرۆڤە و قودسیەتی خۆی هەیە ، بەڵام خۆی بەدەستی خۆی نان و ئاوی سەرشۆڕی و بندەستی دەخوات .

لەمێژوی مرۆڤایەتیدا نموونەی مرۆڤی ماستاوچی و خاولی خستنە سەرشان و دەستبەسینگەوە گرتن و جاسوسی خۆماڵی و ڕاپۆرتنوسی بێ ئینساف زۆرن و مێژویەکی خڵتاوی وسەرشۆڕی و کۆیلایەتیان هەم بۆ خۆیان و هەمیش خانەوادەو دواجاریش زیانمەندبوونی بۆ دەوروبەر بەدواوە بووە .

خەون و خولیاو ئایدیای من هەڵویست ودەربڕینەکانم لەڕابردوو لەناو ڕیزەکانی پارتی دیموکراتی کوردستاندا بۆ ئەوە بووە کەهەڵەکانی خۆمان ببینین و چارەسەریان بکەین ،نەک شکاندنی خەڵکی تر ڕەخنە خاڵی کۆکەرەوەی هەموومانە لە کاردا ،خەمی من بۆ ئەوە بوو کە پارتی و جەماوەرەکەی تووشی زەرەرو زیان نەبێت ،هۆشداریم دا بۆ ئەوەی کە سنورێک بۆ تایپی دەستپیس و داوێن پیس و مفتەخۆرو ماستاوچی و ڕاپۆرتنوسەکان بۆ خۆیان و ئاغاکانیان دابنرێت ، ئاخر مەسینەهەڵگرو ماستاوچی و خاولی بەشان خەمی نییە سبەینێ چی لافاوێک ، چ ڕەشەبایەک دەنگەکانمان دەبا بە ئاسماندا .

ماستاوچی و مەسینەهەڵگرو خاولی بەشانەکانی ناو پارتی دەیانەوێت جەماوەری پارتی و کادیران و نوخبەی تێگەیشتوان پاشان دەرەوەی هەناوی پارتی و کۆمەڵگا بەرەو چەواشەکاری و گەوجاندن بەرن ، چون ڕێڕەوی هێڵی بەرژەوەندی ئەم ماستاوچی و مەسینەهەڵگرو خاولی بەسەر شانانە لەوەدایە بەو ئاراستەیە بڕوات و کەسیش نەڵی ئەم شەمەندەفەرە بۆکوێ و چی ئاراستەیەکی گرتووەتە بەر و لەگوڵ کاڵتریان پێ نەگورێت .

بەڕای من ئەم ماستاوچی و خاولی بەشان و مەسینە هەڵگرانە ، دونیای دیموکراتی و ئازادی نوسین و کێشی مرۆڤ و ئازادی تاک و خەباتی فکریان نەبیستووە کە پەنجا ساڵ زیاتر لەمەوبەر لینین لە وڵاتی ڕوسیا ناوی ناوە شۆڕشی ڕۆشنبیری ، ئەم ماستاوچی و خاولی بەشان و مەسینە هەڵگرانە لەگەڵ ئاغاکانیان کۆپییەکن لە سەدام حسێن و شاوشیسکۆ و مۆسۆلۆنی کەمافی هیج مرۆڤێک ناحوێننەوە و تەنها لەبیری خۆیان و ژیان و ڕابواردنەکانیاننلەسەر کەوڵی پارتی و ڕێبازی بارزانی .

سەربەخۆی و ئازادی و خودبوونی خۆت دەستی ماندووت لەسەر سکی تێر بێت و نەبیتە پیاوی کەس پاشایەتی یە ،ژیان ماناو واتای خۆی هەیە ، ئەوانەی ماستاوچی و خاولی بەشان و مەسینەهەڵگری خەڵکن خاوەنی خۆیان نین و جڵەویان بەدەستی یەکێکی ترەوەیە سەرشۆڕو زەلیلی ناوکۆمەڵگاو دەوروبەرن ، بەڵام بەرزڕاگرتنی کەسایەتی خۆت ڕاستگۆی و مرۆڤدۆستی  پاراستنی نیشتیمان ئەرکێکی ئەخلاقی ویژدانی ئینسانییە و خۆئەگەر ئاوەزو نەغمەی هەمووان بۆ کوردایەتی و کوردبوون و ئازاری میللەتی خۆمان بێت . 

مرۆڤی خودئاگاو هوشیارو خودبوون یەکجار دەمرێت، بەڵام ماستاوچی و خاولی بەشان و مەسینەهەڵگر هاوشان بە جاسوسە خۆماڵییەکان جگە لە زەلیلی ڕۆژی  سەدان جار دەمرن و ئارەقی خەجاڵەتی و شەرمەزاری دەسڕن ، زۆر بەرپرسمان بەڕێکرد ،زۆر ماستاوچی و خاولی بەشان و مەسینەهەڵگریشمان ناسی ، ماستاوچی و خاولی بەشان و مەسینەهەڵگرەکان لەگەڵ ڕۆیشتنی هەر بەرپرسێکدا بایان داوەتەوەو کلکە لەقێ یان  بۆ یەکێکی تر کردووە ، ئاخر ئەوانە سووچەرو چڵکاوخۆرن و تەڕ نابن و خۆیان ماڵین !
ئەم وتارە گوزارشت لە رای نوسەر خۆیەتی و بزاڤ پرێس لێی بەرپرسیار نییە
28/10/2018
بابه‌ته‌کانی تری نوسه‌ر ...
12
زۆرترین بینراو
  • 24 کاتژمێر
  • هەفتە
  • مانگ