وتار
شۆڕشمان پێدەفرۆشنەوە..!!
محه‌مه‌د ره‌ئوف

ئەوەی ئەمرۆ هەندێك لە دەمو چاوە سواوەكانی رابردوو خەبات و شۆڕش بەو نەوەیە دەفرۆشنەوە كە بونەتە سوتەمەرۆی عەقڵیەت و دەست و داوێنی ئەوانەی كە بەناوی شۆڕشەوە بازرگانی بە ژیان و گوزەران و سامانی وڵاتەوەدەكەن، ئەوان شۆڕشیان كردووە یاخود بازرگانی، ئەوان لە پێناو خەمی گشتی خەباتیان كردووە یاخود گیرفان و بەرژەوەندی خۆیان، ئەوان شۆڕش و خەباتیان بۆ ئەوەكردووە لەهەموو سەردەم و قۆناغێكدا بیدەنەوەبەچاوی نەوەی نوێیدا شەقامی پێبدەنگ بكەن،بارتەقای نەك شۆرشی كورد هەموو شۆرشی دونیا دەستكەوت و ئیمتیازیان بەناوی شۆرشەوە بەدەستهێناوە، ئەو دە پانزە ساڵەی شاخ بۆ هەندێكیان كۆكەیتەوەو لەبەرامبەر سەروەتو سامانەكەیدا بەراوردی بكەیت، ئەوجا بۆت دەردەكەوێت ئەوان شۆرشیان لە پیناو نەتەوەكەیان كردووە، یان بەرژەوەندی و سەروەت و سامانەكەیان كردویانە، ئەوەنیە بەشێكیان بەناوی شۆرشەوە بونەتە خاوەنی سەروەت و سامان و بەشێكیشتان بونەتە ملیاردێر، ئەگەر خەبات وشۆرشی ئیوە لە ساڵی 1976 ەوە تا ساڵی 1991 لە شاخ ئەژماربكەین كە دەكاتە 15 ساڵ، واتا 180 مانگ ئەگەر هەر مانگی ( 10 هەزار دۆلار) یەك دەفتەر دۆلاریشتان بۆ ئەژمار بكرێت، ئەوا لەماوەی ئەو 15 ساڵەدا دەكاتە ( 1 ملیۆن و 800 هەزار دۆلار)، واتا دوای چاوپۆشی لەهەموو پۆخڵەواتەكانی شاختان، هەریەكی بەزیادەوە ( 1 ملیۆن و 800 هەزار دۆلار) بەرن و كرێی شۆرشتان وەرگرن، بەلام كامتان سەروەتو سامانەكانتان بە سەدان ملیۆن دۆلارو ملیاران دۆلار نیە، بۆیە ئەوانەی بەناوی شۆرشەوە خۆیان و نەوەكانیان بۆنەتە بازرگان و مافیا و سەرمایەدار شۆرشگێرنین بەڵكو بازرگانێكن و كرێی خۆیان بەزیادەوە وەرگرتووە، ناكرێت دوای 26 ساڵ سەروەت و سامان تاڵان بكەن و پۆست و كورسی قۆرخ بكەن و شۆرش بدەنەوە بەچاوی نەوەی نوێ و رۆڵەی شەهیددا. 
ئەگەرچی خەبات و شۆڕشی گەلی كورد جێگەی شانازیەو بەتایبەتیش ئەوانەی گیانی خۆیان بەخت كردو شەهید بوون، بەڵام ئەوانەی هەر لەسەرتاوە شۆرشیان بۆ مەرامی شەخسی و بەرژەوەندی خۆیان كرد سیمای شۆرشیشیان تێكدا،لەهەموو شۆرشگێرەكانی تر دەنگدلێرتر و بازرگانیترن، بە خوێندنەوەیەكی ووردی هەموو ئەو یادەوەریانەی كە بەشێك لە پێشمەرگەو ماندوونەناسەكانی شاخ نوسیویانەتەوە بۆت دەردەكەوێت، ئەوە چی شۆڕشێك بووە كە ئەوان كردوویانە، تا مامە ریشە، رەبیەیەكی گرتووە، شۆرشگێرەكان چەندین بنكەو بارەگای یەكیان سوتاندووە، تا مستەشار یاخود ئەفسەرێكی بەعسیان كوشتووە، شۆرشگێرەكانی شاخ دەیان عەلی عەسكەری و د. خالیدیان گوللە باران كردووە، هەتا ئەحمەد ناوێكی جاسوسیان دۆزیوەتەوەو كوشتویانە 10 ئەحمەد ناوی بێتاوانیان لە پاڵدا كوشتووە، زۆرێك لە مەفرەزەكانی شاخ لەكاتی خەوداو لەلایەن هاوخەباتەكانیانەوە كوژراون، زۆرێكیان فایلیان پاك نیە، ئێمە چاومان لەهەموو ئەو پۆخڵەواتانەی شۆڕش نوقاندووە، بەڵام هەندێكیان بەو پاشەڵە جوانەی شۆرشەوە، خۆیان بادەدەن و خەبات دەفرۆشنەوە نەوەی نوێ و لەسەر خوێنی هاوری شەهیدەكانیان بونەتە ملیۆنێر. 
ئێوە دەزانن لە كام تایپی شۆرشگێرانن، ئەوانەی خۆیان كردە قوربانی شۆرش یان ئەوانەی ئەوكات و ئێستاش بۆنەتە بار بەسەر شۆرشەوە ناپلیۆن دەڵێ: لە شۆڕشدا، دوو جۆرە خەڵكی هەن، ئەوانەی شۆڕش بەرپادەكەن، ئەوانەش كە لێی سوودمەند دەبن، ئێوە لەكام تایپەن، شاعیری عێراقی عەبدولوەهـاب بەیاتی دەڵێ: لە هەموو سەردەمەكاندا، دزەكانی شۆڕش ، شۆڕشەكانی هـەژاران دەدزن، ئێوە لە تایپی شۆِرشگێرە هەژارەكان بوون و ئێستاش هەژارن یاخود ئەوانەن كە شۆرشی هەژارانتان دزی، بۆیە دەوترێت ژیرو عاقڵەكان بناغەی شۆرش دادەرێژن و ئازاو جەسورەكان جێبەجێی دەكەن و هەڵپەرست و ترسنۆكەكان بەرەكەی دەخۆن. 
ئایا تۆ شۆرشت بۆ ئەوە كردووە هەتا هەتایە بەرپرس بیت و خۆت و نەوەكەت پۆستان هەبێت و پێوەی بمرن، یان ئەوەی ماندێلا كردی كە شۆرشی كردوو رادەستی نەوەی نوێی كرد، چونكە ئەو دەیزانی شۆڕش قوربانیدانە، دوكانداری نییە، شۆڕش بۆ ئەوە نییە نەوەیەك بیكاتو هەمان نەوە بیخواتو ئەوانی دی لێبێبەش بكات، ئایا شۆرش بازرگانی كردنە بەوەی دوو ساڵ بەشاخەوە بوبێتی و ئەمرۆ دەیان كۆمپانیا دامەزرێنیت و ببیتە بازرگان، شۆرشگێری بۆ ئەوەیە دوێنی لە خوێندن بێبەشكراوبیت و ئەمرۆِ بڕوانامەی ساختە بۆخۆت دروست بكەیت و وەك خەلاتیش دابەشی بكەیتە دارودەستەو خزم و كەسەكانت، لەبەر ئەوەی دوێنێ دینارت لەگیرفاندا نەبووەو پیلاوی لاستیكت لە پێدا بوو، ئەمرۆ دەبیت ببیتە خاوەنی ڤێلاو كۆمپانیا و پۆستی جۆراو جۆر، لە شاخدا بەرپرس بیت و لە شاریش هەر بەرپرس، دوێنێ چارەنووسی میللەتێكتان چارەرەش كردوو ئەمرۆش هەر لەدەستی خۆتانداو سبەینێش بۆنەوەكانی خۆتان، زۆرینەتان خاوەنی كۆمپانیاو بازرگانی نەوت و جگەرەو مەشروبن، نەوەی زۆرینەتان بۆنەتە مافیاو بازرگان و وەك و عودەیی و قوسەی شەوی سور ساز دەكەن و لەسەر پارەی هەژاران و سوتەمەرۆی شۆرش بە ئۆتۆمبێلی مۆدیل بەرزەوە لاسایی شیخەكانی كەنداو دەكەنەوە.
ئەم وتارە گوزارشت لە رای نوسەر خۆیەتی و بزاڤ پرێس لێی بەرپرسیار نییە
31/01/2017
بابه‌ته‌کانی تری نوسه‌ر ...
1