دیدار

شوان رابه‌ر: زۆر كه‌سی ترمان ماوه‌ خانه‌نشین بكرێن



بارزان ره‌مه‌زان، بزاڤ پرێس:
شوان رابه‌ر ئه‌ندامی سه‌ركردایه‌تی كۆمه‌ڵی ئیسلامی پێی وایه‌ كه‌ سته‌م له‌كۆمه‌ڵ كراوه‌و هێشتا كه‌سی تریان ناوه‌ خانه‌نشین بكرێت.
له‌میانی دیدارێكیدا له‌گه‌ڵ بزاڤ پرێس، شوان رابه‌ر باسی خانه‌نشینكراوانی حزبه‌كه‌ی ده‌كات و وه‌لامی هه‌ندێ پرسیاری گرنگ له‌و باره‌وه‌ ئه‌داته‌وه‌.
ناوبراو هه‌ڵوێستی حزبه‌كه‌ی له‌سه‌ر ئه‌و بابه‌ته‌ ده‌خاته‌ڕوو، پێی وایه‌ كه‌ هیچ كێشه‌یه‌ك له‌وه‌دا نابینێته‌وه‌.
ئه‌مه‌ی خواره‌وه‌ ده‌قی دیداره‌كه‌یه‌:

بزاڤ پرێس: ته‌واوی خانه‌نشینكراوانی كۆمه‌ڵ، بەپلەی بەرێوبەرو لیوا خانەنشینکراون لەکاتێکدا ئەوان تەنها پێشمەرگە بوون، ئایا ئەمە بندیوارو گەندەلی نیە؟

شوان ڕابەر: نەخێر، پێشمەرگەو خەڵکی کۆمەڵ هەمویان خانە نشین نەکراون بەڵکو زۆر کەسیان ماوە خانە نشین بکرێن، کە بەیاساش شایستەن، بەلام تائێستاش خانە نشین نەکراون، ئەوانەی کە خانە نشینش کراون پلەی بالای سەربازی و حوکومیان تێدا کەمە، بۆ نمونە بالاترین پلەو بەهێزترین لیست ئەبوو کە لە سالی ٢٠٠٩ کۆمەل ناوی ١٧ ئەندامی سەرکردایەتی و مەکتەبی سیاسی خۆی پێشکەش بە حکومەت کردووە وەك پێشمەرگەی دێرین خانە نشینیان بکات، حکومەت بەپێی یاساو دەستەلاتی خۆی بە بەرێوبەری گشتی و بەرێوبەری فەرعی و بەمووچەیەکی کەمی دیارکراوی بڕاوە خانە نشینی کردون، بەلام دواتر ئەم ناوانە بە دەگمەن نەبێ ناوی خۆیان بۆ شوێنی تر نەقل کردووە یان بە پلەی تری سەربازی و پەرلەمانتار خانە نشین بووینە، هەروەها لەناو هەموو کۆمەل تەنها یەك کەس مووچەی لیوا وەردەگرێت و دوو کەسیش مووچەی عەقید وەردەگرن، لەناو هەموو کۆمەل یەك عەمیدیان نیە، خەلکی کۆمەلی هەموویان بە پلەی سادە و خوارەوە خانە نشینکراون لەکاتێکدا چەندین ئەندامی سەرکردایەتی و ئامیر هێز و فەرماندەی سیاسی و سەربازیمان تێدایە، خەلکمان  زۆر مەغدورە و مەزلومە، ئەمە راست نیە خەلکی کۆمەل هەمویان خانە نشینکرابن و هەمووشیان بە پلەی بالابێت، خۆت ئاماژەت بەووکردوە  ئەلێت کۆمەل ١١٢ ئەندامی خانەنشینکراوە خۆ کۆمەل تەنها ١١٢ شۆرشگێری نەبووە فیعلەن قسەی جەنابتە کۆمەل خاوەن هەزاران پێشمەرگەی شۆرش گێرە بووە بەلام خانە نشین نەکراون ستەمیان لێکراوە. 
 
بزاڤ پرێس : کۆمەلی ئیسلامی تەنها ١١٢ ئەندامی خانەنشین کردووە هەمووشیان بەرپرسی بالای حزبین، ئایا کۆمەلی ئیسلامی تەنها ١١٢ شۆرشگێرو پێشمەرگەی هەبووە، ئەگەر زیاترە بۆ ئەوانی تر فەرامۆشکراون؟

شوان رابه‌ر: کۆمەل خانە نشینی پلەداری زۆر کەمە ١١٢ کەس پلەدار نین ئەوە راست نیە، لە هەموو کۆمەل لەم هەموو ئەوکەسانەی خانە نشینکراون تەنها مووچەی یەك لیواو دوو عەقیدی تێدایە، کەچی لە حزبەکانی تر خەلك هەیە مندالە، ژنە، نوێ  و ناشایستەیە بە پلەی سەربازی و حکومی بالا خانە نشینکراون.

بزاڤ پرێس: کۆمەل لەرێگای مەکتەبی سیاسی کۆمەلەوە پێشمەرگەکانی خۆی خانەنشینکردوە لەکاتێکدا حزبەکەیان لەسالی ٢٠٠٠ دامەزراوە، ئەگەر بەشێوەیەکی یاسایی بوایە پێوویست بوو لەرێگای بزوتنەوەی ئیسلامی و لەسەر ناوی ئەوان خانەنشینەکەیان بۆ بکرایە، ئایا ئەمە گەندەلی و پێشلکردنی یاسانیە؟

شوان ڕابەر: خەلکی کۆمەل کە خانە نشینکراوە خەلکی سەردەمی بزوتنەوەن، بزوتنەوەش لە هەشتاکان درووستبووە، خانشینمان شەخسە مادام شەخسەکە پیشمەرگەبێ و بەیاسا شمولی بکات هەقی خۆیەتی خانە نشین بکرێت جا لەناو هەر حزبێك بێت گرفت نیە حزبەکەی دەگوازێتەوە یان ناوی حزبەکەی دەگۆرێت، ئەوە ئیمتیازدان نیە بە حزب بەلکو ئیمتیازدانە بە شەخس، مادام شەخسەکە شمولی خزانەنشین دەکات کارێکی یاساییە با لە حزبێکیشەوە بچێتە حزبێکیترەوە یان ناوی حزبەکەی بگۆردرێ، خۆ لەکوردستان ناوی زۆر حزب گۆراون کەچی خەلکیان لەسەر حسابی خەباتی پێشوو خانەنشینکراون ئەوە یاساییە، کاتیخۆی لە ٢٠٠١ زۆربەی خەلکی بزوتنەوە وەگەل کۆمەل مەلیان ئیعلان کرد واتا لەوبەروارە لە دێرینیشیان ناکەون.

بزاڤ پرێس: هەموو ئەو خانەنشینانەی کۆمەل یان لەحزب یان لەحوکومەت مووچەیان هەیە، ئایا دەکرێ کەسێك خانەنشین بێت لەکاتێکدا لەحیزب یان لەحوکومەت دەوام دەکات، ئایا ئەمە گەندەلی نیە؟

شوان ڕابەر: ئەو خانە نشینانەی کۆمەل تەنها لە حکومەت مووچەیان هەیە ئەگەر بۆخۆیان خۆبەخشانە لەحزبیش دەوام بکەن یان رۆلێك ببینن ئەمەش هەقی خۆیانە و شتێكی یاساییە مانای ئەوەنیە ئەگەر خانە نشینبن بۆیان نیە لەحزبدا رۆل نەبینێ و دەستەپاچەببن یان ئەگەر حزب لەبەرابەر رۆل دیتنیاندا شتێکی پێدان درووست نەبێت.

بزاڤ پرێس: به‌پێی دیدو بۆچوونی كۆمه‌ڵ، ئه‌وانه‌ی له‌رابردوودا خه‌باتیانكردووه‌، به‌ جیهادو تێكۆشان له‌پێناوی خوادا تۆماركراوه‌، ئایا ره‌وایه‌ جیهادو تێكۆشان له‌سه‌ر قوتی خه‌ڵك؟

شوان ڕابەر: بەلێ درووستە پێشمەرگەی لایەنە ئیسلامیەکان خەباتی ئیسلامی و نەتەوەیی خۆی کردبێ و خانەنشین بکرێن، چونکە ئەوە هەقی رابردووی خۆیەتی، هەموو کەسیش لەدەولەتدا هەقی مووچە و ژیانی هەیە، ئەوە ستەم نیە لەسامانی گشتی ودەولەت ئەسلەن خانە نشین نەکردنی ستەم لێکردنیەتی.

بزاڤ پرێس: میلەتی کورد بەگشتی بەسەدان هەزار جینۆسایدو کیماباران و قوربانی و زیندانی داوە بۆ تەنها دەبێت حزبیەکان خانەنشین بکرێن لەناو حزبیەکانیشدا تەنها بالادەست و بەرپرسەکان بێت و چینی خوارەوەش فەرامۆش بکرێت، ئایا بۆ کۆمەلی ئیسلامی دژی ئەم کەلتورە نەوەستایەوە کە بەردەوام حزبیەکان لەپێشتر سەیر ئەکرێن لەبەرامبەر میلەت، لەکاتیکدا کۆمەل داوای گۆرانکاری دەکات؟

شوان ڕابەر: گەندەلی لایەنەکان هەقی بەئێمەوە نیە، ئێمە هەقمان بە خۆماندا هەیە کۆمەل خانە نشینی بیندیواری نیە بەو مانایەی لەو گۆرە بێ خەبات خانە نشینکرابن حکومەت خەلکی ئێمەی بەیاسا خانە نشینکردووە، حکومەت لێرەدا بەرپرسیار و خاوەن حوکمە و هەرکەسێك بندیواربێت دەتوانی لایبدات.   

بزاڤ پرێس: گوایە بەرێز عبدالستار مجید لەوەتەی بۆتە وەزیری کوشتوکال وازی لەمووچەی خانەنشین هێناوە، ئەگەر ئەمە راستە ئەی بۆچی ناوی لەلیستەکە ماوە یان بۆچی خۆی بەلگەیەك بەدیکۆمێنت ناخاتە روو کەبەفەرمی داوای لەحوکومەت کردبێت مووچەکەی ببرن؟

شوان ڕابەر: بەرێز عبدالستار مجید تەنها مووچەی وەزیری وەردەگرێت بۆیە ناوی لەناو لیستەکەداهەیە ئەوکات وەزیر نەبوو، بۆ ووردەکاریش دەتوانی لەخۆی بپرسن.

بزاڤ پرێس: بەرێز سۆران عومەر دانیناوە بەوەی کە خانەنشینەکان راستن بەلام دەلێ مافی خۆمانەو خەبات و شۆرشمان کردووە، کەوابوو جیاوازیتان چیە لەگەل پارتی و یەکێتی کە بەردەوام بەهۆکاری شۆرش و خەبات دەستەیان بەسەر هەموو داهات و دەستەلاتێکی کوردستاندا گرتووە؟

شوان ڕابەر: ئێمە بەناوی شۆرش و خەبات دەستەمان بەسەر دەستەلات و سەروەت و سامانی خەلكدا نەگرتووە، بەلام خەلکی کۆمەل و هەموو لایەنەکانی تریش هەقی خۆیانە لەبەرامبەر خەبات و شۆرش خانە نشین بکرێن و بژێوی ژیانیان دابین بکرێت، هەرنەبێ هاولاتی نیشتیمانن بەلام نابێت هیچ لایەنێك بەناوی شۆرش و خەبات سەروەت و سامانی گشتی بۆخۆی قۆرغ بکات و بیخوات.


بزاڤ پرێس: هەندێکتان بەفەخرەوە ئەلێن شۆرش و خەباتمانکردوو مافی خۆمانە مووچەی خانەنشین وەربگرین، هەندێکیشتان بەفەخرەوە ئەلێن وازمان لەمووچەکە هێناوە و رەتمان کردۆتەوە، ئایا ئەگەر وەرگرتنی مافی خۆتانەو ئاساییە بۆ هەندێکیان بەفەخرەوە ئەلێن رەتیمان کردۆتەوە؟

شوان ڕابەر: هەرکەسەو هەقی خۆیەتی لەبەرامبەر خەبات و شۆرشدا خانە نشین دەبێ یان نابێ، بەهەرحال ئەوکەسانە لەهەر حزبێك بن هەقی خۆیانە لەبەرامبەردا خانە نشینبن و بژێوی ژیانیان دابین بکرێت، کەسێکیش قوربانی بەخۆی دەدا و لەمافی خۆی خۆش دەبێت دەستی خۆش بێت.

بزاڤ پرێس: هەموو گەندەلیەك لەکوردستان بەرگی یاسای بۆ پۆشراوە، ئایا ئەگەر خانەنشینەکەی کۆمەلی ئیسلامی هیچ رەخنەیەك هەلنەگرێت لەبەرئەوەی بەپێی یاساو بریارێك جێبەجێکراوە، ئەی بۆچی کۆمەل رەخنە لەم دەستەلاتە ئەگرێت و بەگەندەل تۆمەتباریان ئەکات لەکاتێکدا ئەوانیش هەموو گەندەلیەکانیان بەپێی یاسا بۆ خۆیان مسۆگەر کردووە؟

شوان ڕابەر: کۆمەل لەدەستەلاتدانیە تا بەدەستەلات گەندەلی کردبێ و خەلکی خۆی بەم جۆرە بەهرەمەند کردبێ، حزبە دەستەلاتدارەکان سەبارەت بەچەندین شت و هەندێکەس وایانکردوە، ئێمە بۆ رەخنە لەوان دەگرین حوکومەت بەیاسا خەلکی کۆمەلی خانە نشین کردوون، کۆمەل بەخۆی بۆخۆی نەکردووە بەلکو حکومەت ئەم هەقەی پێداوون بۆیە نابێ گلەیی لەکۆمەل بکرێ و بەنایاسایی لەقەلم بدرێت.


د.ع


‌‌‌
11/24/2017 1:13:14 PM
Print Friendly and PDF
1
زۆرترین بینراو
  • 24 کاتژمێر
  • هەفتە
  • مانگ