مەسعود بارزانی سەرۆكی هەرێمی كوردستان ناڕەزایەتی خۆی  بەرامبەر بەشداری نەكردنی نوێنەری هه‌رێمی كوردستانی لە كۆنگرەكەی لەندەن دەربڕی و ڕایگەیاند جێگەی نیگەرانی ئێمەیە كە كوژران و قوربانی دان بەشی خەڵكی كوردستانی عێراق بێ و شانازیەكەشی بۆ خەڵكی تر بێ.

بارزانی لە پەیامێكدا بە نیگەرانییەوە باس لە بانگهێشت نەكردنی نوێنەری هەرێم بۆ ئەو كۆنگرەیە دەكات كە تایبەت بە ولآتانی شەڕكەری دژبە داعش بوو،  رایگەیاند، "چاوەڕێی ئەوەمان دەكرد هەموو لایەك ڕێز لە قوربانیدانی گەلی كوردستان و قارەمانێتیی پێشمەرگە بگرن و داوای بەشداربوونی نوێنەری كوردستان لەم كۆنگرەیە و كۆنگرە هاوشێوەكان بكەن".
هەروەها دەڵێت: "ناڕەزایەتی خۆمان و خەڵكی كوردستان ئاراستەی ڕێكخەرانی ئەم كۆنگرەیە دەكەین و جێگەی دڵگرانیی ئێمەیە كە شەهیدبوون و قوربانیدان بەشی خەڵكی كوردستان بێت و ئیعتبارەكەش بۆ خەڵكی تر هەژمار بكرێت".