پەروین بوڵدان و سری‌ سورەیا ئۆندەر لە ئاهەنگی ئەمڕۆی نەورۆز لە شاری ئامەدی باكووری كوردستان بە هەردوو زمانی كوردی و توركی پەیامێكی نووسرای عەبدوڵا ئۆجەلان رێبەری زیندانی كراوی پەكەكەیان خوێندەوە.

لە پەیامەكەی ئۆجەلان-دا هاتووە، "ئەو تێكۆشانەی گەلانی وڵاتەكەمان بۆ دیموكراسی، ئازادی و برایەتی و ئاشتییەكی ئابڕومەندانە بەڕێوەی برد، ئەمڕۆ گەیشتووەتە قۆناغێكی مێژوویی. تێكۆشانی پڕ لە ئازاری بزووتنەوەكەمان لە ماوەی چل ساڵدا بەهەدەر نەچوو، بەڵام گەیشتووەتە قۆناغێكی وا كە ناكرێ بە هەمان شێوەی جاران بەردەوام بێت".

ئۆجەلان لە بەشێكیتری پەیامەكەیدا ئاماژ بۆ ئەوەش دەكات، "دەبێ پەكەكە ئەو شەڕە چەكدارییەی كە نزیكەی چل ساڵە لە دژی كۆماری توركیا دەیكات،  كۆتایی پێ بێنێت و بەپێی گیانی سەردەم لەپێناو دەستنیشانكردنی ستراتیژییەكی سیاسی و كۆمەڵایەتی و دیاریكردنی تەكتیكی تازە، كۆنگرەیەك ساز بكات و بەستنی ئەم كۆنگرەیە هەنگاوێكی مێژوویی یە".


دەقی پەیامی ئۆجالان لە نەورۆزی ئەمڕۆی ئامەد:

بۆ هەموو گەلانمان،
سڵاو لە نەورۆزی گەلانمان و دۆستانیان و ئەوانەی لەگەڵ ئاشتی، یەكسانی و ئازادی و دیموكراسیدان. ئەو قەیرانەی كە سەرمایەداری ئیمپریالیست و نۆكەرە دكتاتۆرەكانی لە ناوچەكە، لە رێگەی سیاسەتی نیوولیبرالەوە، هێناویانەتە ئاراوە،‌ بە شێوەیەكی زۆر تێكدەرانە لە هەرێمەكەمان و لە وڵاتەكەمان كاریگەریی سوتێنەری لە ژیان كردووە. جیاوازییە ئەتنیكی و ئایینییەكانی گەلەكەمان و كولتوورەكەمان لەم قەیرانەدا، لەو شەڕە بێبەزەیی و بێواتایانە‌دا بە هەدەر دەبرێن كە لەپێناوی ناسنامەدا دەكرێن. نە بەها مێژوویی و سەردەمی و نە ویژدانی و سیاسییەكەمان، لە ئاست ئەو تابلۆیەدا هەرگیز بێدەنگ و دوورەپەرێز نابن، بە پێچەوانەوە دەستوەردانێكی بەپەلە، وەك پێداویستییەكی بەرپرسیاریەتیی باوەڕی ئایینی و سیاسی و ئەخلاقیمانە.

ئەو تێكۆشانەی گەلانی وڵاتەكەمان بۆ دیموكراسی، ئازادی و برایەتی و ئاشتییەكی ئابڕومەندانە بەڕێوەی برد، ئەمڕۆ گەیشتووەتە قۆناغێكی مێژوویی. تێكۆشانی پڕ لە ئازاری بزووتنەوەكەمان لە ماوەی چل ساڵدا بەهەدەر نەچوو، بەڵام گەیشتووەتە قۆناغێكی وا كە ناكرێ بە هەمان شێوەی جاران بەردەوام بێت. مێژوو و گەلانمان داوای چارەسەریەكی دیموكراتی و ئاشتیانە، بەپێی گیانی سەردەم دەكەن، لەسەر ئەو بنەمایەی لە قۆناغی مێژوویی دۆڵمەباخچەدا، بەو راگەیانراوەی لە دە خاڵ پێك هاتووە و لە لایەن هەموومانەوە بە فەرمی راگەیەندرا، ئێمە گەیشتووینەتە قۆناغی دەستپێكردنی پرۆسەیەكی نوێ. 

وەك پابەندییەك بە راگەیانراوە‌كەوە، دوای رێككەوتن لەسەر پرەنسیپەكانی راگەیانراوەكە، دەبێ پەكەكە ئەو شەڕە چەكدارییەی كە نزیكەی چل ساڵە لە دژی كۆماری توركیا دەیكات،  كۆتایی پێ بێنێت و بەپێی گیانی سەردەم لەپێناو دەستنیشانكردنی ستراتیژییەكی سیاسی و كۆمەڵایەتی و دیاریكردنی تەكتیكی تازە، كۆنگرەیەك ساز بكات و بەستنی ئەم كۆنگرەیە هەنگاوێكی مێژوویی یە. هیوادارم لە ئایندەیەكی نزیكدا، بگەینە پێكهاتنێكی پرەنسیپی و لە ئەندامانی پەرلەمان و دەستەی چاودێری، كۆمسیۆنی حەقیقەت و رووبەڕووبونەوە پێك بێت و بگەینە قۆناغی بەستنی كۆنگرە.

بەم كۆنگرەیە، سەردەمێكی نوێ دەست پێدەكات، بەو سەردەمە نوێیەش لە نێو كۆماری توركیادا لەسەر بنەمای دەستوری بنەڕەتی، وەك كۆمەڵگەیەكی دیموكراتی و خاوەن ناسنامەیەكی دیموكراتی، پێ دەنێینە نێو قۆناغی پێكەوەژیانی ئاشتیانە. 

بەم شێوەیە دەتوانین لە مێژووی ئەو كۆماری توركیایەی كە ٩٠ ساڵە پڕیەتی لە شەڕ و لێكدان، دەرباز بین و بەرەو ئایندەیەك هەنگاو بنێین كە بە پێوەرە راستەكانی ئاشتی و دیموكراسییەكی گەردوونی ئاوێتە بووە. ئەوەی لە هەموو شتێكیش زیاتر شایانی نەورۆزە، ئەوەیە كە لە حزووری ئێوەدا، سڵاو لە هەنگاوێكی ئاوها بكەم، بەڵام دیاردەیەك كە بۆ گەل و وڵاتەكەمان باشە، دەبێ لە هەمان كاتدا بۆ هەرێمەكەشمان كە زۆر موقەدەساتی تیایدا‌ن، باش بێت. راستیی سەرمایەداریی ئیمپریالیست بەگشتی لە دووسەد ساڵی رابردوودا و بەتایبەتیش لەم سەد ساڵەی دواییدا ئەوەیە كە وای كردووە ناسنامە نەژادی و ئایینییەكان، پێچەوانەی جەوهەری خۆیان، لەسەر بنەمای ناسیۆنالیزمی نەتەوە-دەوڵەت، خۆیان دادەخەن و دوژمنایەتیی یەكتر دەكەن، واتە بەپێی سیاسەتی پارچە بكە و بەڕێوە ببە، بێبەزەییانە تا رۆژی ئەمرۆمان، بوونی خۆی پاراستووە.
 
دەبێ بزانین هێزە ئیمپریالیستەكان، كە دەستیان لە پلانەكانیان لە روژهەڵاتی ناوەڕست بەرنەداوە، بوونەتە هۆی زۆردارییەك‌ كە ئەمڕۆ بە شێوەی داعش هاتۆتە ئاراوە، ئەو رێكخراوەی كە دڕاندایەتییەكەی لە خودی زۆرداری زیاترە و بێ ئەوەی بڵێ ئەمە ژنە، یان منداڵە، كۆمەڵكوژیی دڕندانە بەرامبەر بە كورد، توركمان، عەرەب، ئیزیدی، ئاسووری-سریانی و لە دژی هەموو گەل و بڕواكانی ناوچەكە، ئەنجام دەدات. 

ئیدی رۆژ ئەو رۆژەیە كە كۆتایی بەم مێژووە بێبەزەیی و وێرانكەرە بهێنین و بەپێی راستیی مێژووییی خۆمان، پێ بنێینە قۆناغی ئاشتی، برایەتی و دیموكراسی. بەپێی ئەو  راستی و بڕوایەی هەمە:‌ دەبێ ئێمە بە سیاسەتی دیموكراتی، خۆمان لە ناسیۆنالیزمی دەوڵەتی نەتەوەیی كە دەبێتە‌ هۆكاری لێكدان و تێكچوون، رزگار بكەین و بە ناسنامەی دیموكراتی، خۆمان بكەینە یەك، بۆ ئەمەش لە دەوڵەتە نەتەوەییەكان داوا دەكەم بە سیاسەتی دیموكراتیانە لەناو خۆیاندا یەكێتییەك بنیاد بنێن‌ و جارێكی دیكەش لە دەوڵەتانی نەتەوەیی داوا دەكەم كە ماڵی هاوبەشی دیموكراتیانەی رۆژهەڵاتی ناوەڕاست، بونیاد بنێن. 

بەم بۆنەیەوە داوا لە ژنان و گەنجان دەكەم كە بەرەو ئازادی له ‌شەقەی باڵ دەدەن و لێرە زۆرینەی ئامادەبووانن، لە داهاتوودا لە بوارەكانی كۆمەڵایەتی، سیاسی و ئاسایشدا، لەپێناو تێكۆشانی ئازادی و یەكسانی بە شێوەیەكی كارا رۆڵیان بگێڕن و سەربكەون. وێڕای ئەوەش سڵاو لە بەرخودانی كۆبانێ دەكەم، كە هەم بۆ هەرێمەكەمان و هەم بۆ كۆمەڵگەی نێودەوڵەتی واتایەكی مەزنی هەیە.  هەروەها سڵاو لە "ڕۆحی ئاشمێ" دەكەم كە لەسەر ئەم بنەمایە بنیات نرا و بووە هێمای مێژوویەكی نوێی لە نیوان گەلانماندا. ئەو ئاماژانەی لەسەرەوە خستمە روو، ئەگەر بە دەستەواژەیەك بیڵێم: بانگەوازێكی گرنگە بۆ مێژوو و ئەمڕۆمان و بۆ پاكسازی و نوێبوونە و بنیاتنانی كۆمەڵگاكەمان. دووبارە هیوادارم كە ئەم نەورۆزە مێژووییە بە بەشداریی ئێوە بۆ هەموو مرۆڤایەتی ببێتە مایەی خێر و سڵاوتان لێ دەكەم. 

بژی نەورۆز 
بژی برایەتیی گەلان
عەبدوڵڵا ئۆجەلان 
دوورگەی ئیمرالی