ئەمڕۆ لەناوچەیەکی نزیک شاری " ئاگری" باکوری کوردستان شەڕوپێکادان لەنێوان ھێزەکانی پەکەکەو سوپای تورکیا روویداو لە ئاکامدا ٤ سەرباز برینداربوون، ھاوسەرۆکی ھەدەپەش داوای ھێورکردنەوەی بارودۆخەکە دەکات.


سوپای تورکیاش لە بەیاننامەیەکدا رایگەیاند: شەڕوپێکادانەکە بەردەوامەو ھێزی زیاتریشیان رەوانەی ناوچەکە کردووە. لایخۆشیەوە سەڵاحەدین دەمیرتاش ھاوسەرۆکی پارتی دیموکراتی گەلان " ھەدەپە"  داوای ھێورکردنەوەی بارودۆخەکەی کردو راشیگەیاند: پێویستە لێکۆڵینەوە لەبارەی ھۆکارو چۆنێتی دروسبوونی رووداوەکە ئەنجام بدرێت.

دەمیرتاش ئاماژەشیدا بەوەی کە، رووداوەکەی ئاگری پێچەوانەی ئامانجەکانی پرۆسەی ئاشتییە کە لەپێناو رێگرتن لە خوێنڕشتن ھاتۆتەئاراوە.