لەو بارەیەوە فەخرەدین قادر سكرتێری پەرلەمانی كوردستان  رایگەیاند، بریارە لە نزیكترین كۆبوونەوەی پەرلەمانی كوردستاندا دەنگ لەسەر ئەندامانی لیژنە 21 كەسیەكەی هەمواركردنەوەی دەستور بدرێت.
وتیشی ، دابەشكردنی لیژنەكە یەكلای كراوەتەوەو بەپێی سیستمی سانتلیگۆ ئەندامانی لیژنەكە بەسەر لایەنە سیاسیەكاندا دابەشكراوە.

سكرتێری پەرلەمان روونیشی كردەوە بەپێی دابەشكردنەكە پارتی دیموكراتی كوردستان 7 ئەندام و بزوتنەوەی گۆڕان 5 ئەندام و یەكێتی نیشتیمانی كوردستان 3 ئەندام و یەكگرتووی ئیسلامی 2 ئەندام و كۆمەڵی ئیسلامی 1 ئەندام و مەسیحیەكان 1 ئەندام و توركمانەكان 1 ئەندام و چوار حزبەكەی تر واتە حزبی شوعی و سۆسیالیست و بزوتنەوەو ئاراستەی سێیەم 1 ئەندامیان لە لیژنەكەدا دەبێت.

فەخرەدین قادر راشیگەیاند: ئەمرۆ لە سەرۆكایەتی پەرلەمانەوە فراكسیۆنەكانمان ئاگادار كردووەتەوە كە بەپێی پشكی خۆیان ناوەكانمان بۆ بنێرن بۆ ئەوەی لە نزیكترین كۆبوونەوەی پەرلەماندا دەنگیان لەسەر بدرێت.