دوای ئەوەی عەلی قەرەداغی، سەرۆكی یەكێتی زانایانی جیهانی ئیسلامی لە وتارێكیدا پشتگیری خۆی بۆ دەوڵەتی ئۆردۆگان دەربڕی، لەبارەی هەڵبژاردنەكانی توركیا، ناڕەزایی بەشێك لە نوسەران و رۆژنامەنوسانی لێكەوتەوە.

لەو بارەیەوە ئەبوبەكر هەڵەدنی ، سەرۆكی فراكسیۆنی یەكگرتووی ئیسلامی لە پەرلەمانی كوردستان ڕایگەیاند: "دكتۆر عەلی قەرەداغی لەسەر یەكگرتووی ئیسلامی حسێب نییە و ئەو خۆی كەسایەتێكی ئیسلامییە و خزمەتێكی زۆری بە كوردستان كردووە، ئەو نوسینانەشی ڕاو بۆچونی خۆیەتی".

ئاماژەی بەوەش كرد: وەك یەكگرتووی ئیسلامی ئەوەندە پشتگیری هەنگاوەكانی ئاكپارتین كە بەردەوام بێت لە سەر پرۆسەی چارەسەری ئاشتی، پرۆسەی چارەسەری ئاشتی بگەیەنێتە ئەنجام لە باكوری كوردستان و كێشەكانی كورد لەو پارچەی كوردستان چارەسەر بكات .


وتیشی: "پشتگیری هەردوو لایەن دەكەن، هیوادارین هەدەپە بەربەستی لە %10 ببڕێت، بۆ ئەوەی خەباتی  گەلی كورد لەو پارچەیە بە شێوەیی مەدەنی بگاتە ئەنجام، ئاكپارتیش لە ماوەی دەسەڵاتیدا هەنگاوی باشی ناوە بۆ چارەسەری كێشەی كورد و ئەو كرانەوەیەی كە هەیە، هیوادارین بەردەوامبێت لەو كرانەوەیە، بەڵام لایەنگری هەدەپەین كە بتوانێت دەنگی زیاتربێنێت و بە قورسایەكی زیاتر بچێتە ناو پەرلەمانی توركیا".