فەرماندەیەكی پێشمەرگە لە میحوەری زوممار رایگەیاند ئەمڕۆ 16ی تشرینی دووەم، هێزەكانی پێشمەرگەی كوردستان بە پشتیوانی فڕۆكە جەنگییەكانی هاوپەیمانان گەورەترین پیلانی داعشیان لە میحوەری زوممار تێكشكاند و بەو هۆیەشەوە نزیكەی 250 چەكداری داعش كوژراون.

موقەدەم موحسین سلێڤانەیی، فەرماندەی ھێزەكانی پێشمەرگە لە میحوەری زوممار رايگەیاند: "سەرلەبەیانی ئەمڕۆ ھێزەكانی پێشمەرگەی كوردستان بە پشتیوانی فڕۆكە جەنگییەكانی ھاوپەیمانان گەورەترین پیلانی داعشیان تێكشكاند". 

ئاماژەی بەوەشدا: "چەكدارانی داعش پیلانیان دانابوو لە گوندی كارێزی سەر بە ناحیەی زوممار تەنیشت سەربازگەی كەسكێ ھێرش بكەنە سەر سەنگەرەكانی پێشمەرگە لە میحوەری زوممار".

ئەو فەرماندەیەی ھێزەكانی پێشمەرگە ئاماژە بەوەش دەكات كە: "دوای تێكشكاندنی ئەو پیلانەی چەكدارانی داعش ھەوڵماندا بچینە ئەو شوێنەی كە خۆیان لێ ئامادەكردبوو ھێرش دەستپێبكەن".
 
وتیشی: "كە گەیشتینە ئەو شوێنە، 80 لاشەی چەكدارانی داعش لە شوێنی تەقەی پێشمەرگە و بۆردومانی فڕۆكە جەنگییەكانی ھاوپەیمانان بەجێمابوون و لەناویاندا بە دەیان چەكداری خۆكوژ ھەبووە كە پشتینەی بۆمبڕێژكراویان لەگەڵدا بووە".

ئەوشی خستەڕوو: "بەپێی ئەو زانیارییەی بە دەستمان كەوتوون ئەو گروپەی داعش لە 250 چەكدار پێكهاتبوون كە پێشتر خۆیان ئامادەكردبوو هێرش بكەن، لە ئەنجامی ئەو بۆردوومانەشدا، 170 چەكداریان بە تەواوی پارچە پارچە بووبوون".