مەترسی بە نامۆ وێناكردنی ئیسلامیەكانی كوردستان لە سەردەمی خۆ بەدەستەوە نەدانی ئەواندا ، وەەڵامێك بۆ كاك مەلا بەختیار

ئیسلامیە كوردستانیەكان لە یەك رۆژدا، لە هەولێر پشتیوانی لە مافە دیموكراتیەكانی مۆدێلێكی ئیسلامی دەكەن ‌و، لە سلێمانی دژ بە مۆدێلێكی تری ئیسلامی خۆ پیشاندان دەكەن .
ئەوەی سەرەوە كۆمێنتی كادرێكی یەكگرتووە، بە ناوی كاك شەوقی چەمچەماڵی، لەسەر گردبوونەوەكەی (17/8/2013)ی هەولێری كۆمەڵا و یەكگرتوو و خۆپیشاندانەكەی سلێمانی بۆ پشتیوانی لە كوردانی رۆژئاوا، كە ئیسلامیەكان بەشداریەكی گەرمیان تێدا كرد.
سەروتاری ژمارە (433)ی رۆژی 19/8/2013ی رۆژنامەی چاودێری زمانحاڵی كاك(مەلا بەختیار)یش تەرخان كرابو بۆ قسەكردن لەسەر خۆ پیشاندانەكانی هەولێری كۆمەڵا و یەكگرتوو و، هەڵوێستیان بەرامبەر كوردانی خۆر ئاوا . 
كاك مەلا بەختیار بەوە دەست پێدەكات كە كوردانی رۆژئاوای كوردستان سەدەیەكی رەبەق بە دەست شۆفێنی عەرەبییەوە سزایان چەشتووە و، هیچ عەرەبێك، لەوانەش هیچ ئیسلامی یەك و، لە پێش هەمووشیانەوە (اخوان المسلیمین) بەرامبەر ئەم زوڵمە دەنگی هەڵنەبڕیوە .
دواتر دێتە سەر باسی (میسر) و (اخوان) و كودەتاكە و قۆناغی دوای ئەو، بە شێوازی جۆراوجۆریش پاساو بۆ كودەتاكە دێنێتەوە بەڵام بە شێوەیەكی گشتی زانیاری و بەرەنجامگیرییەكانی لە مەڕ ئەم پرسە بەشێكی بەرچاویان هەڵەن و پێویستیان بە راستكردنەوە و پێداچوونەوە هەیە .
لێرەشدا قسە لەسەر ئەم بەشەی سەروتارەكە ناكەین، بەڵكو دەچینە سەر ئەو بەشە لەسەر قسەكانی، كە باس لە گردبونەوەكەی هەولێر و، هەڵوێستی ئیسلامیەكانی كوردستانی باشور، لەمەڕ ئازار و مەینەتیەكانی كوردی رۆژئاوای كوردستان دەكات، لەم بارەشەوە بە دەق دەنوسێت ((كۆمەڵا و یەكگرتوو مافی خۆیانە وەكو بەشێك لە بزاڤی هێزە ئیسلامگەراكانی عەرەب‌و ناوچەكە ، هاوخەمی خۆیان دەربڕن ، ئەمە كارێكی ئاساییە ، بەڵام ئەوەی نائاساییە ، دەرنەبڕینی هیچ جۆرە هەست و هەڵوێستێكیانە بەرامبەر روداوەكانی رۆژئاوای كوردستانە ، ئەمە نیگەرانییەكی لای هەموو ئازادیخوازێكی كورد دروست كردووە ‌و چەندین پرسیاری هێناوەتە ئارا))! 
پاشان دەڵێت ((ئیسلامیەكانی كوردستان كاتێك رێگای نەتەوەیی دیموكراسی بەرامبەر بە هێزە ئیسلامیەكان پێچەوانە دەبێتەوە بە پاساوی شەریعەتی ئیسلامی لەگەڵا هەموو هێزێكی ئیسلامی دەبن لە هەر لایەكی دنیادا بن، كە ئەمە پێچەوانەی دیموكراسی یە)) .
دواتر گلەیی لە حكومەتی هەرێمیش دەكات كە بەرامبەر بەرەی نوسرە بێدەنگە، ئەم بێدەگیەشی لە چەندین شتدا رەنگی داوەتەوە ، لەوانەش چاوپۆشین لە چوونی خەڵك بۆ ناو بەرەی نوسرە و خەم نەخواردنی ژیان وئاسایشی كوردانی رۆژئاوا !!
سەرەتا دەمەوێ‌ بڵێم سەرەڕای هەندێ‌ نەرمی لەم سەروتارەیدا بە بەراورد لەگەڵا پێشتردا،باوەڕم وایە قەناعەتی كاك بەختیار دەربارەی ئیسلامیەكان ‌و تەنانەت خودی ئیسلامیش وەك (ئاین) نیمچە نەگۆڕە و، زۆر بە زەحمەتیش گۆڕانی بەسەردا دێت ؟! لەم روەشەوە هێندەی بە شێوەیەكی (انتقا‌و)یانەبەڵگە بۆ سەلماندنی قەناعەتە پێش وەختەكانی دێنێتەوە ، هێندە گوێ‌ی لە واقیعی هێزەكان ‌و، راستیەكانی واقیع نیە ، بەڵام سەرەڕای ئەوە لە سۆنگەی پێگە سیاسیەكەیەوە لە ناو یەكێ‌ لە هێزە حوكومڕانەكانی ئەمڕۆی كوردستان، حەزمكرد سەبارەت بەم سەروتارەی چاودێركە بە پێنوسی خۆی نوسراوە چەند خاڵێك بخەمە روو، لەوانەش:
(1) ئەگەر هێزە ئیسلامیەكانی كوردستان لێرە لەگەڵا دیاریكردنی مافی چارەنووس ‌و دەوڵەتی سەربەخۆی كوردستاندا بن ،( هەروەك لە سەروتارەكەدا ئاماژەی پێكراوە). وە بەو ئەندازە لە روی (تبنی)كردنی مەسەلە نەتەوەییەكانەوە چووبنە پێش ، ئەدی خێرە بەرامبەر پارچەیەكی تری كوردستان ئاوا بێدەنگ دەبن ؟ خۆ ئەگەر بوترێت لەبەر ئەوەی بەرامبەرەكانی كورد لە رۆژئاوای كوردستان ئیسلامین هیچ لە مەسەلەكە ناگۆڕێت ، چونكە لە رویەكەوە بەعس و رژێمەكەی بەشار ئەسەد دوژمنی سەرەكی كوردی رۆژئاوان ‌و، لە رویەكی تریشەوە لەدوای (2003)وەو لەكاتێكدائیسلامیەكانلە بەغدا لە پاڵا هێزە كوردیەكانی تردا شەڕی بەدەست هێنانی مافی نەتەوەكەیان كردووە ـــ كەبڕوا ناكەم كاك بەختیار نكولی لێ بكاتـــ دیسانەوە زۆربەی بەرامبەرەكان ئیسلامی بوون ‌و، هەرگیز ئەوەش وای لێنەكردوون ، لە پێداگرتن لەسەر مافە نەتەوەییەكانیان كەمتەرخەمی و ساردی بنوێنن، ئەمەشیان بە دژی شەریعەت ‌و ناسنامە ئیسلامیەكەی خۆیان نەزانیوە .ئەمە جگە لەوەی بەتەنیا‌و لەگەڵا (17) حزبدا هەڵوێستیان بەرامبەر نوسرە و شەڕ دژی كوردی رۆژئاوا دەربڕیوە و ئەوەی شەڕی كوردانیش دەكات ئەو تایپە توندڕەوەی ئیسلامی یە.
(2) ئەگەر ئیسلامیەكانلە رووی مێژوییەوە تاوانیان بێ‌دەنەگبوون بووبێت بەرامبەر ئەو زوڵمەی لە رابردوودا لە كورد كراوە ، خۆ لانیكەم بەشداری زوڵمەكە نەبوون ‌و ، ئەوەی ئەو زوڵمەی كردووە ، هێزو دەستەڵاتێكی عەلمانی چەپ ‌و ناسیۆنالیست بووە،كە ئەویش لە (50) ساڵی رابردوودا بەعسیەكان نوێنەری بوون،كە لە سایەیدا ئیسلامیەكانیش هەر وەكو كوردەكان،بەڵكو خراپتریش لەوان ، دووچاری جۆرەها سزا و ئەشكەنجەی وەحشیگەرانە و پاكتاو كردن بوونەتەوە كارەساتی حەما و قەتڵوعام كردنی نزیكەی (40)هەزار كەسی ئەو شارە و سەپاندنی حوكمی لە سێدارە دانیش بەسەر هەر كەسێكدا تۆمەتی (اخوان) بوونی بەسەردا ساغ بێتەوە، بەشێ‌ بووە لەو واقیعەی ئیسلامیەكانی ئەو وڵاتەی تێدا ژیاوە .
(3) ئەگەر باس لە رابردوو لەوە بێت، ئیسلامیەكان بەرامبەر ئێمە بێ‌دەنگ بوون، ئەوا دەبێت ئەوەمان لاڕوون بێت بێدەنگیەكە دووسەرە بووە و ئێمەش بەرامبەر چەوساندنەوەو سەركوتكردنی ئەوان، بە هەمان شێوە بێ‌ دەنگ بووین، ئایا چەند هێزی كوردیمان هەیە، هەڵوێستێكی ئاشكرای بەرامبەر كۆمەڵكوژییەكەی شاری حەما، كە لە سەرەتای هەشتاكاندا چل هەزار كەسی تێدابوو بەقوربانی، یاخود دژ بە كۆمەڵكوژییەكەی زیندانی( تەدمر)و جۆرەها كۆستی تری ئیسلامیەكانی ئەو وڵاتە و چەوساندنەوەی تێكڕا ئیسلامیەكانی ناوچەكە دەربڕیوە؟ئەگەر باسی ئێستاشە هەردوولا لەگەڵا یەك لە دیالۆگدان ‌و دەكرێت بگەنە گەڵاڵەكردنی دیدی هاوبەش‌و پەیوەندی نوێ‌ لەگەڵ یەكدی دروست بكەن.
(4) سەبارەت بە ئیسلامیەكانی كوردستان ‌و مەسەلەی ئێستای رۆژئاوای كوردستانیش ، دەبوو كاك بەختیارزوو حوكمی پێشوەختی نەدابا‌و، چاوی لە رێپێوانەكەی هەمان رۆژی سلێمانی بۆ پشتیوانی لە كوردەكانی خۆرئاوای كوردستان بوایە كە زیاتر لەنیوەی بەشداربوانی خۆپیشداندانەكە لە ئیسلامیەكان ‌و بە تایبەتیش لە كادر و ئەندامانی یەكگرتوو پێكدەهاتن.
هەروەها هەڵمەتە گەورەكەی كۆمەك كۆكردنەوەی ئیسلامیەكانیش بە گشتی لە رۆژانی(18/ 8/2013) بە دواوە بۆ كوردانی رۆژئاوا لە بیر نەكات ، ئەمە جگە لەوەی لە ماوەی رابردوودا ئیسلامیەكان‌و بە تایبەتیش یەكگرتوو جگە لەو هەڵوێستدەربڕینی سیاسی لەسەر ئاستی مەكتەبی سیاسی ‌و خوارتر بۆ پشتیوانی لە مافی چارەنووسی ئەوان‌و ئیدانەكردنی هەر هێرش ‌و پەلامارێك دەكرێتە سەریان لەلایەن بەرەی نوسرەوە بێت ، یاخود هەر هێز و لایەنێكی ترەوە،چەندین خزمەتی پێشكەش بە كوردانی رۆژئاوا و دۆزەكەیان كردووە لەوانەش:
1ــ پەیوەندی دروستكردن لە نێوان(اخوان) و (ئەنجومەنی نیشتمانی كوردی) سوریا و پەیەدە و لەو نێوەندەشدا زیاد لە دانیشتنێ‌ لە نێوانیاندا ئەنجام دراوە.
2ـ زیاتر لە (5) جار لەگەڵا (اخوان)ەكانی سوریا بە مەبەستی لێكدانەوەی رەهەندەكانی كێشەی كورد لە رۆژئاوای كوردستان ‌و، عادیلە بوونی ناوەرٍِۆكەكەی و، بەدەست هێنانی پشتیوانیمان بۆ چارەسەر كردنی،دانیشتنی ئەنجام داوە.
3ـ پەیوەندی لە نێوان سەرۆكایەتی هەرێم و (اخوان)ەكانی سوریا بۆ هەمان مەبەستی پێشوو دروستكردووە . 
4ـ لەسنوری توانای خۆیدا هەوڵێكی زۆری لەگەڵا توركەكان داوە بۆ ئەوەی لە دۆخی كوردانی رۆژئاواو رەوایەتی كێشەكەیان تێبگەن‌و، كەناڵی پەیوەندی لەگەڵا هێزە سیاسیەكانی كوردستانی رۆژئاوادا بە تایبەتیش لەگەڵ پەیەدە بكەنەوە، رەخنەشی لە دكتۆر داود ئۆغلو گرتووە كە لە سەردانەكەی هەولێریدا بۆ دیدار و كۆبوونەوەی لەگەڵا هێزە كوردەكانی خۆرئاوای كوردستاندا بەدەپە یان فەرامۆش كردووە 
ئەمەش دەیسەلمێنێتكێشەكە زۆر لە ئیسلامیەكاندا نی یە، چونكە ئەوان هەڵوێستیان هەبووە و ، بە ئەركە نەتەوەییەكانیان هۆشیارن ‌و، پشتیوانی كوردانی رۆژئاوان و ئیدانەی هەموو دەست درێژییەكەیشیانبۆسەر مافەكانیان كردوەو دەكەن، بەڵكو كێشەكە زیاترلەلای هەندێ‌ لە بەرامبەرەكانەوەیە، كە واقعەكە وەك خۆی نابینن‌و بەوهۆیەشەوە حوكمی ناڕەوا بەسەر ئیسلامیەكاندا دەدەن.
گەر دەشوترێت بۆ ئیسلامیەكان بۆ چەندین پرسی تری نەتەوەیی خۆ پیشاندانی سەربەخۆیان نەكردووەو ‌و بۆ پرسێكی وەكو ئەوەی میسر دەیكەن. وەڵامەكەی روونە، چونكە لە نمونەكەی میسردا. هێزێكی تر نایكات‌و،ئەوانیش ئەمەیان بۆ خۆیان و نەتەوەكەیان پێ‌ خۆش نی یە‌و بەرژەوەندی تێدا نابیننەوە، بەڵام هەرچی مەسەلە نەتەوایەتییەكانە هێزو كەسانی تر هەن دەستپێشخەری بكەن ‌و،ئیسلامیەكان دەتوانن لە رێی بە بانگەشە بۆكردن ‌و بەشداری كردنەوە ئەركی سەرشانیان جێ‌بەجێ‌ بكەن،بەڵام لەگەڵا ئەوەشدامنیش پێم باشە لەم رووەشەوە چالاكی سەربەخۆ ئەنجام بدەن. پێشنیاریشم كرد چالاكیەكەی هەولێر لە یەك كاتدا بۆ پشتیوانیلە ئیسلامیەكانی میسر و بەرەی دژە كودەتای ئەو وڵاتە و كوردانی رۆژئاوا بێت، بەڵام بەوە وەڵام درامەوە ، كە ئێمە سەبارەت بە كوردی رۆژئاوا هەڵوێستمان رون‌و چەسپاوە و ، لە هەمان كاتدا لە سلێمانی بەشداری خۆپیشاندانەكەی سلێمانیبۆ پشتیوانی لەوان دەكەین و، گومانمان لە هەڵوێستی خۆمان لەو بارەوە نی یە و، لە رابردووشدا ئەمەمان سەلماندووە . 
لەلایەكی ترەوە ئەگەر خودی حوكومدانەكەی كاك بەختیار بەسەر حوكومەتی هەرێمدا بە بێ‌دەنگیبەرامبەر كوردانی كوردستانی خۆرئاوا بكەینە پێوەر،ئایە ئیسلامیەكان حەقیان نابێت بپرسن:داخۆ ئێوە وەك هێزێكی دەستەڵاتداری خاوەن هێز و سامان،هەموو ئەوەتان كردووە كە دەكەوێتە ئەستۆیان؟!
بۆچی ئەو حكومەتەی كە ئێوە نیوەی پێكدەهێنن،بە دانپیانانی خۆت بەرامبەر كوردانی رۆژئاوا بێ‌دەنگ و كەمتەرخەمە؟ناشكرێ‌ لێرەدا بوترێت ئۆباڵی داخستنی سنور و بێ‌دەنگی ‌و كەمتەرخەمی یەكە تەنها لە ئەستۆی پارتیدایە، چونكە وەڵامێكی لەو جۆرە نیشانەی لاوازیە و راكردنیشە لە لێپرسراوێتی.
بەدەر لەوە هێزە پێكهێنەرەكانی حكومەت جگە لە بێ‌ دەنگی و كەمتەرخەمیتان بەهۆی ململانێتان لەسەر حسابی كوردی رۆژئاوا سەرئێشەشتان بۆ رۆژئاوای كوردستان دروستكردووە و، بەشێ‌ لەو كێشە و ململانێ‌یەی ئێستای نێوان هێزە كوردیەكانیئەوێ‌‌وتەنانەت ئاوارە بوونی بەشێ‌ لە هاوڵاتیانیش، بەدانپیانانی زیاد لە هێزو ناوەندێكی كوردی، ئۆباڵەكەی ئەكەوێتە ئەستۆی ئێوەو پارتی‌و هەندێ‌ هێزی تری كوردی. لە كاتێكدا ئیسلامیەكان لەم روەوە جگە لە قسەی خێر و داواكردن بۆ دووپات نەكردنەوەی رووە ناشیرینەكەی ئەزموونی باشور كە لە براكوژیدا بەرجەستە دەبێت بە رووە سلبیەكەدا دەستێوەردانێكی خراپیان نەبووە.
بۆیە راست نیە ململانێ‌ی نێوان خۆتان لەسەر حسابی كوردی رۆژئاوا لەسەری ئیسلامیەكاندا بشكێننەوە.
بەدەر لەوەئیسلامیەكان نە دەستەڵات و توانای مالی و،نە كۆنترۆڵی سنورەكان ‌و ئیدارەی.. پەیوەندی یە دەرەكی یەكانی هەرێمیان بەدەستەوە نیە، تا لەسەر هەندێ‌ شت سەرزەنشت بكرێنكە ئەركی حكومەت و پارتە دەستەڵاتدارەكانەو، لەدەرەوەی دەسەڵات‌و توانای ئەوانەوەیە.
5ـ سەبارەت بەو گەنجانەش لێرەوەو بە پاڵنەری جیهادكردن دەچنە سوریا‌و تۆمەتبارن بەوەی دەچنە نێو بەرەی نوسرە و بەشێ‌ لە تواناكانیان دژ بە كوردی رۆژئاوا بەكار دەهێنرێت، ئەم سەرنجانە دەخەمە روو :
(أ‌) ئەو گەنجانە بە حوكمی پێكهاتەی فكری و شوناسی گروپیان، سەر بەو رەوتە ناحزبی یە ئیسلامی یەی كوردستانن ، كە بەداخەوە ئێوە لە سۆنگەی دژایەتی كردنی هێزە ئیسلامیەكانی باشوری كوردستانەوە پشتیوانی ماددی و مەعنەویان لێ‌ دەكەن.
(ب‌) بە گوێرەی هەندێ‌ زانیاری دەست شل كردن ( ئەگەر هاندانیشی تێدا نەبێت) بۆ چونە دەرەوەی ئەو گەنجانە هەیە، لەسەر بناغەی ئەو بۆچوونە ئەمریكیەی دەڵێت با ئەوانەی تۆوی توند ڕەوییان تێدایەوبە (جیهادی) وەسف دەكرێن، لێرە بڕۆن، بەو هیوایەی خاكی سوریا بێت بە دوائارامگاو گۆڕستانیان ‌و ، لە كۆڵا ئێوە ببنەوە!! بێ‌ گوێدانە ئەگەری ئەوەی ئەم گەنجانە ببنە كەرەسەی دژایەتی كردنی كوردی رۆژئاوای كوردستان، خۆشتان لە سەروتارەكەدا دان بە كەمتەرخەمی ‌و چاوپۆشی حكومەت لە رۆیشتنی ئەم گەنجانەدا دەنێیت.
(جـ) ئیسلامی یەكان بە ئاشكرا لەم روەوە هەڵوێستیان دەربڕیوە كە ئەو گەنجانە ئەو چارەنووسە بۆ خۆیان هەڵنەبژێرێن زۆر بە دەگمەنیش نەبێت ئەندام‌و لایەنگرانی (كۆمەڵا و یەكگرتوو) لە ریزی ئەوانەدانین. 
6ـ لە خودی گردبوونەوەكەی هەولێردا مامۆستا عەلی باپیر لەپاڵا ئیدانە كردنی هێرش كردنە سەرخۆپیشاندەرانی رابیعەی عەدەوی‌و نەهزەو هاوسۆزی دەربڕین بۆ ئیسلامیە دژە كودەتاكانی میسر، داواشی لە سەرجەم تەوژمی ئیسلامی و گەلانی موسوڵمانی ناوچەكە كرد، مافی چارەنوس بۆ كوردانی رۆژئاوا و سەرجەم پارچەكانی كوردستان بە ڕەوا بناسن ‌و پشتگیریشی لێ بكەن .
7ـ دەبێت كاك بەختیار لە بیری بێت كە هیچ سەركردەیەكی ئیسلامی لە گەرمەی شۆڕشی سوریا ‌و سەركوت كردنی خوێناوی گەلی راپەڕیوی ئەو وڵاتەدا، ( بشار)یدكتاتۆر،كە باوكی و حزبەكەی و خۆشی، نوێنەرایەتی ئەو شۆفێنی یە عەرە بیەدەكەن،كە لە وتارەكەتدا ئاماژەت پێكردووەو، ستەمی نەتەوەیی و جیاكاری وەحشیگەرانەیان دەرهەقگەلی كورد لەو پارچەدا رەوا بینیوە، بە (برا) ناو نەهێناوە.. هەروەها پرسەنامەی بۆ گەورە تاوانبارێكی وەك (ئاسف شەوكەت)ی دەزگای هەواڵگری سوریا و زاوای بنەماڵەی ئەسەد نەناردووە و بە پاڵەوان و شەهید وەسفی نەكردوەو بەمەش كەسی (احراج) نەكردووە.
دڵنیام ئەگەر سەركردەیەكی ئیسلامی شتی لەو جۆرەی بكردایە، قیامەت هەڵدەستا و ئێستاش داوای لێ دەكرا داوای لێبوردن لە گەلی سوریا بە گشتی و گەلی كوردستانی رۆژئاوا بە تایبەتی بكات!!
لەلایەكی ترەوە ئیسلامیەكان لەسەر داوای بەردەوامی هەندێ‌ وڵاتی دراوسێ‌ بۆ پێداچوونەوە بە هەڵوێستەكانیاندا لەمەڕ بە دیكتاتۆریلە قەڵەمدانی رژێمی بەعسی سوری‌و، پشتیوانی لە شۆڕشی ئەو وڵاتە لە پێناو جێگرەوەیەكی دیموكراسی، هیچ جۆرە سازشێكیان نەكردووە .
8ـ كاك بەختیار واباشە لەوە تێبگات كە ئیسلامییە میانە رەوەكانی ناوچەكە‌و لەوانەش ئیسلامیەكانی سوریا سەرەڕای هەموو كەم و كوڕیەكانیان لەئێستادا كراوەترین هێزی ناوچەكەن بە رووی كورد ‌و كێشەكەیدا.
بۆ نمونە هەر لەو ژمارەی چاودێری چاوپێكەوتن لەگەڵا (كاك ساڵیح موسلیم) هاوسەرۆكی پەیەدە كراوە ، و تیایدا باس لەوە دەكات توركیا ‌و كۆماری ئیسلامی ئێران هەردووكیان رەزامەندیان لەسەر خۆبەڕێوەبەرێتی یەكی كوردی لە رۆژئاوای كوردستاندا دەربڕیوە، لێرەدا جێی خۆیەتی بپرسین داخۆ ئەگەر پارتی گەلی كۆماری ئۆپۆزسیۆن ‌وسۆسیاڵا دیموكرات لە جیاتی ئەكەپە ، لەسەر حوكوم بوایە، هەمان هەڵوێستی بەرامبەر كوردی رۆژئاوا دەبوو؟ بە دڵنیاییەوە نەخێر . چونكە هەڵوێستی حكومەتی توركی‌و پارتە سیاسیەكانی ئەو وڵاتانە بەرامبەر كوردستانی رۆژئاوا، درێژكراوەی هەڵوێستی پێشووتریانە بەرامبەر هەرێمی كوردستان ، پارتی گەلی كۆماریش، هەڵوێستێكی ناسیونالیستانەی توند و داخراوی بەرامبەر هەرێم هەبووە ‌و هەیە.
بۆیە مامەڵە كردن لەگەڵا ئەوان تەنهاو تەنها لەسەر ئەوەی لە رابوردوودا چیان بۆ كردوین دیاری ناكرێت ، بەڵكو دەبێت زیاتر لە روانگەی ئەوەوە بێت دەتوانن چیمان بۆ بكەن، بەدەر لەوە بوونی هەڵوێستێكی چەسپاولە سەر بناغەی بێ‌ دەنگیی مێژویی ئەوان، دەبێتە هەڵوێستگرتنێكی ئایدۆلۆژینا نەتەوەیی ‌و تەنانەت ناسیاسیش .... 
لە كۆتاییشدا سەبارەت بە ئیسلامیەكان ‌ومەسەلە نەتەوەییەكە و روحی وتارەكە( كە نوێنەرایەتی هێڵێكی دیاریكراوی بیركردنەوە لە هەرێمدا دەكات) حەز دەكەم ئاماژە بە سێ‌ خاڵا بكەم :
(أ‌) بە حوكمی ئەوەی ئێمە یەكێكین لەو نوسەرانەی لە بواری ناسیونالیزمیدا ئیشمان كردووە ‌و دەنوسین، دەزانین كە نەتەوایەتی لە دۆخی تەندروستی خۆیدا سروشتێكی كەمەند كێشو راكێشەری هەیە، یەكێ‌ لە كێشە گەورەكانی ناسیونالیزمی كوردیش، لاواز بوونی ئەم سروشت‌و توانایەی بووە، كە بۆتە مایەی سەرهەڵدانی جۆرەها شەڕ و ناكۆكی و دوژمنایەتی نێوخۆیی. لێرەشەوە بەردەوام بوون لەسەر هەوڵدان بۆ نیشاندانی ئیسلامیەكان وەك جەستەیەكی نامۆ بە نەتەوە، لە ڕێ‌ی پروپاگاندەی سیاسی و فیكرییەوە، لە جەوهەردا كار و هەوڵێكی نانەتەوەییە.
(ب‌) ئیسلامیەكان و سەرجەم هێزە كوردیەكانی تر و باڵەكانی كوردایەتی لەوانەش یەكێتی نیشتمانی كوردستان ، هێشتا لە زۆر روەوە ، ماویانە ببنە هێزی نەتەوەیی مێژویی‌و كاریگەر. مەبەستمە بڵێم كێشەكان لەم روەوە تایبەت نین بە ئیسلامیەكان، بەڵكو لە رووبەرە گشتی یەكەیدا كێشەی هاوبەش و ناوخۆیی هێزە جیاوازەكانن‌و، پەیوەستن بە سروشتی سەرهەڵدان و گەشەكردن‌و شكڵگرتنی ناسیونالیزمی كوردیەوە پێشم وایە كێشەی هێزەكانی تر لەم روەوە ئاڵۆزترو گەورەترن.
(جـ) لە روانگەی ئەوەوە لە ناوچەكەدا دەگوزەرێت ، دەبێت كاك مەلا بەختیار و غەیری ئەویش لەوە بترسن كە درێژەدان بەم وێناكردنە ناواقیعییەی ئیسلامیەكان و جەنگی دەرونی دژیان، رۆژێ‌ لە رۆژان بكرێتە پاساوی پاكتاوكردنی جەستەیی و بەڕەوا زانینی خوێن ‌و سەر و ماڵیان، چونكە پاكتاوكردنە فیزیكی یەكان، هەروەك روونە بەرهەمی جەنگە دەرونیە پێشینەكانن، دەبێت حسابی ورد بۆ ئەوە بكەین، بە تایبەتیش كە ئێستا لە سەردەمێكدا دەژینن پێ‌ ناچێت خۆبەدەستەوەدان ‌و ئاڵای سپی هەڵبڕین بژاردەی بەردەم ئیسلامیەكان بێت .
كەواتە واباشە لەڕێ‌ی نادیدەگرتنی واقیعەوە موزایەدەی نەتەوەیی بەسەر یەكدا نەكەین ، چونكە زۆر جار بە ناوی نەتەوایەتی یەوە ، زەبری كوشندە لە پەیكەری نەتەوە و یەكانگیری ناوخۆیی ‌و یەكیەتی ریزەكانی و ئاسۆكانی ئایندەی دراوە ‌و دەدرێت . وەك وتراویشە كردار شەرتە. 
بەڵام با تەرازوویەك بەكار نەهێنرێت بە وەك مۆدێلە رادیۆكەی سەردەمی ستالین‌و بەندیخانەكەی شۆرەوی جاران وابێت‌و یاخود بەكەم‌و كەسری بیخوێنێتەوە، تەنها رادیۆ ناو خۆییەكان وەربگرێت‌و، ئەمیش كرداری هەندێ‌ كەس و هێزیان نەخوێنێتەوە .