حکومەتی هەرێمی کوردستان ڕۆژی ٣١ی کانوونی یەکەمی وەک پشووی فەرمی دیاریکرد پاش ئەوەی کە ڕۆژی یەکی کانوونی دووەم بەر هەینی دەکەوت.

سەفین دزەیی وتەبێژی حکومەتی هەرێم ڕایگەیاند: بە بۆنەی سەری ساڵی نوێی زایینیەوە پیرۆزبایی لە پێشمەرگە قارەمانەكانی سەنگەرەكانی فیداكاری و خانەوادەی سەربەرزی شەهیدان دەكەین، هیوادارین ئەم ساڵ ببێتە ساڵێكی پڕ لە خۆشی و كامەرانی بۆ هەموو گەلی كوردستان وببێتە ساڵی سەركەوتنی تەواوی گەلەكەمان بەسەر تیرۆریستان بەم بۆنەیەشەوە ڕایدەكەیەنین ڕێكەوتی 2015/12/31 كە دەكاتە ڕۆژی پێنج شەمە لە سەرجەم دام و دەزگاكانی حكومەت دەبێتە پشووی فەرمی.

ئەوەش لە کاتێکدایە تائێستا حکومەتی عێراق ڕۆژانی پشووی سەری ساڵی ڕانەگەیاندووە.

هەفتەی ڕابردووش ڕۆژانی ٢٣ و ٢٤ کانوونی یەکەمی ٢٠١٥ بەهۆی یادی لەدایکبوونی مەسیح و پێغەمبەری ئیسلامەوە کرا بەپشوو.

ساڵانە هاووڵاتیان لەسەرانسەری جیهاندا بەبۆنەی سەری ساڵی زاینییەوە ئاهەنگ دەگێڕن و لە هەرێمی کوردستانیش بەشێک لە هاووڵاتیان لە شەوی سەری ساڵدا لە شوێنە گشتییەکاندا ئاهەنگ دەگێڕن.
‌
ژ.ک
‌