بە تۆمەتی سووکایەتیکردن بە ئایینى زەردەشتی، پیرى زەردەشتییەکانى کوردستانی باشوور، سکاڵاى یاسایی لە دژی د. “عەبدوللەتیف ئەحمەد”، ڕابەرى سەلەفییەکانى کوردستان تۆمار دەکات.
 
پیر “لوقمان”، پیرى زەردەشتییەکانى کوردستان ڕایگەیاند: "بەهۆى سووکایەتیکردن بە ئایینى زەردەشتییەوە، سکاڵاى یاسایی لە دژی مەلا “عەبدوللەتیفى سەلەفى” تۆمار دەکەن، چونکە لە بڵندگۆى مزگەوتى (بەهەشت) لە شارى سلێمانى، سووکایەتى بە ئایینى زەردەشتییەوە کردووە و دەیان بوختان و تۆمەتى ناڕەواى بۆ شوێنکەوتووانى ئایینى زەردەشتى هەڵبەستووە، وەک ئەو دەڵێت.
 
ئەو پیاوە ئایینییە زەردەشتییە کە لە لایەن حکوومەتی هەرێمی کوردستانەوە ڕێگای پێ دراوە، گوتیشی: "ئێمەى زەردەشتییانی کوردستان، لەژێر سایە و سێبەری ئاڵا و حکوومەت و دەستووری کوردستاندا، مافەکانی خۆمان پیادە دەکەین، ئەم ئازادییەی لێرە هەموومان لەژێر باڵی درەختەکەیدا دەژین، بەر و ڕەنج و خوێنی خەڵکی ستەمدیدەی کوردە. بۆیە، مەرجە هەموومان پابەند بین بە هەوڵ و تێکۆشانی خەڵك و قوربانییەکانمانەوە. لێنەگەڕێین کەسانێك بە ئەنقەست لە جێگا و دامەزراوە حکوومییەکانەوە، بە تایبەتیش لە مینبەری مزگەوتەکان و پەرستگا ئایینییەکانەوە، هێرشی ناڕەوا بکەنە سەر کۆمەڵێك و بوختانیان بۆ هەڵبەستن و لەسەر ناشیرینکردنی ئەوانیتر، خۆیان هەڵبچنن و پەرە بە خۆیان بدەن”.
 
پیر لوقمان ئەوەشی دووپات کردەوە کە قەبوڵى ناکەن کەسێک بەهۆى بیرێکى توندڕەوییەوە، هێرش بکاتە سەر شوێنکەوتووانى ئایینى زەردەشتى و سووکایەتى بە پیرۆزیی ئەو ئایینە بکات. دووپاتیشی کردەوە: “ئێمە هەم لە وەزارەتی ئەوقاف و هەم لە دادگا، سکاڵای یاسایی لەسەر مەلا عەبدوللەتیفى سەلەفى تۆمار دەکەین و داواش لە داواکاری گشتی دەکەین، ئەم کەیسە بجووڵێنێت و بە زووترین کات، سزای ئەو کەسە بدات، چونکە لە ڕێگای ئەو وتارەوە، ئاشتیی کۆمەڵایەتیی دانیشتووانی کوردستان تێكدەچێت و ئازادی کەوتووەتە بەر مەترسی و ئەگەر پێشی پێنەگیرێت، ئەوا ڕەنگە لەوە زیاتر سنوور ببەزێندرێت”.
‌
‌
ژ.ک