لەپارێزگای ھەڵەبجە مانگرتن و ناڕەزایی لەبەرامبەر پێنەدانی موچە دەستی پێکردو ژمارەیەک لەفەرمانگەکان بایکۆتی دەوامیان کردووە، داوای پێدانی موچەکانیان لەحکومەت دەکەن.

پەیامنێری بزاڤ پرێس لە هەڵەبجە، ڕایگەیاند:"ماوەی دوو ڕۆژە فەرمانبەرانی فەرمانگە حکومییەکانی پارێزگاکە لەبەرامبەر دواکەوتن و پێنەدانی موچەکانیان دەستیان بەمانگرتن و بایکۆتکردنی دەوام کردووە، ئەمڕۆش ژمارەیەک لەفەرمانبەرا نەچونەتەوە دەوام و بەردەوامن لەمانگرتن و ناڕەزای دەربڕین".

وتیشی:"فەرمانبەرانی ھەریەک لەفارمانگەکانی سەرۆکایەتی شارەوانییەکانی ھەڵەبجە، بەڕیوەبەرایەتی گشتی و ڕۆشنبیری ھونەر، فاکەڵتی زانستی و زانستە مرۆڤایەتییەکان، سەرۆکایەتی زانکۆ، دادگای بەرایی، فەرمانگەی دادنوسی ھەڵەبجە، ماوەی دوو ڕۆژە مانگرتنیان راگەیاندووە".

ئاماژەی بەوەشکرد:"ئەو فەرمانبەرانە ئامادە نین بچنەوە سەر دەوامەکانیان تا ئەوکاتەی موچەکانیان پێدەدرێت".

نزیکەی پێنج مانگە موچەی فەرمانبەران  دواکەوتوەو بەھۆی دواکەوتن و پێنەدانی موچەکانیشیان فەرمانبەرانی زۆربەی بەڕێوەبەرایەتیە جیاوازەکان لەشارو شارۆچکەکانی ھەرێم دەستیان بەمانگرتنی کردووە و ئامادەنین بچنەوە دەوام تا ئەو کاتەی حکومەت وەڵامیان دەداتەوە.
‌
‌
‌ژ.ک