كۆمسیۆنی‌ باڵای‌ هه‌ڵبژاردنه‌كان رایگه‌یاند، 107 لیست‌و قه‌واره‌ی‌ سیاسی‌ به‌شداری‌ هه‌ڵبژاردنی‌ داهاتوی‌ په‌رله‌مانی‌ عێراق ده‌كه‌ن، دوپاتیشیكرده‌وه‌، سوره‌ له‌سه‌ر سازدانی‌ هه‌ڵبژاردن له‌واده‌ی‌ خۆیدا.
سه‌رۆكی‌ فه‌رمانگه‌ی‌ هه‌ڵبژاردن له‌كۆمسیۆنی‌ باڵای‌ سه‌ربه‌خۆی‌ هه‌ڵبژاردنه‌كان، میقداد شه‌ریف، ئه‌مڕۆ چوارشه‌ممه‌، له‌كۆنگره‌یه‌كی‌ رۆژنامه‌وانیدا رایگه‌یاند، كۆمسیۆن ره‌زامه‌ندی‌ له‌سه‌ر 277 كیانی‌ سیاسی‌‌و هاوپه‌یمانی‌ بۆ چونه‌ هه‌ڵبژاردن نیشاندا. دوپاتیشیكرده‌وه‌، "پاش كشانه‌وه‌ی‌ ژماره‌یه‌ك له‌لیسته‌كان له‌ئێستادا 107 لیست‌و كیانی‌ سیاسی‌ له‌سه‌رتاسه‌ری‌ عێراق به‌شداری‌ له‌هه‌ڵبژاردن ده‌كه‌ن كه‌ 36یان كیان‌و هاوپه‌یمانێتی‌ سیاسی‌-یه‌".

هاوكات ئه‌مڕۆ كۆمسیۆنی‌ هه‌ڵبژاردن تیروپشكی‌ بۆ ژماره‌ی‌ كیانه‌ سیاسیه‌كان ده‌ستپێكرد، له‌و باره‌یه‌شه‌وه‌ شه‌ریفی‌ رایگه‌یاند، تیروپشكه‌كه‌ مانای‌ ده‌ستپێكردنی‌ پروپاگه‌نده‌ی‌ هه‌ڵبژاردن نیه‌ بۆ لیست‌و پاڵێوراوان. رونیشیكرده‌وه‌، ده‌ستپێكردنی‌ هه‌ڵمه‌تی‌ هه‌ڵبژاردن له‌لایه‌ن ئه‌نجومه‌نی‌ كۆمسیارانه‌وه‌ راده‌گه‌یه‌ندرێت‌و له‌سه‌ر بنه‌مای‌ سیستمی‌ پروپاگه‌نده‌ی‌ هه‌ڵبژاردن ژماره‌ 7ی‌ ساڵی‌ 2013 دیاریده‌كرێت.

سه‌رۆكی‌ فه‌رمانگه‌ی‌ هه‌ڵبژاردن دوپاتیشیكرده‌وه‌، هه‌ڵبژاردن له‌واده‌ی‌ دیاریكراوی‌ خۆیدا ئه‌نجام ده‌درێت.

بڕیاره‌ هه‌ڵبژاردنی‌ په‌رله‌مانی‌ عێراق له‌ 30ی‌ نیسانی‌ داهاتو به‌ڕێوه‌بچێت، له‌ئێستاشدا كۆمسیۆن له‌ئاماده‌كاری‌ ئه‌و پڕۆسه‌یه‌دایه‌.

ژماره‌ی‌ هه‌ندێك له‌لیسته‌ به‌شداربوه‌كانی‌ هه‌ڵبژاردن به‌پێی‌ تیروپشكه‌كه‌ی‌ كۆمسیۆن به‌م جۆریه‌:

یەکگرتووی ئیسلامی کوردستان 274

یەکێتی نیشتیمانی کوردستان 266

پارتی دیموکراتی کوردستان 213

بزووتنەوەی گۆڕان 234

کۆمەڵی ئیسلامی کوردستان 237

بزووتنەوەی ئیسلامی کوردستان 275

لیستی برایەتی وپێکەوەژیان 210

بەرەی تورکمانی عێراقی 206

لیستی ئاشتی کوردستانی 258

هاوپەیمانی کوردستانی لە نەینەوا 243

هاوپەیمانی عەرەبی کەرکووک  242

هاوپەیمانی تورکمانی کەرکووک 282

دەوڵەتی یاسا، بەسەرۆکایەتی نوری مالکی 277

هاوپەیمانی موتەحیدون بۆ چاکسازی  259

کوتلەی بەیزا 288

هاوپەیمانی ئەحرار (سەدر) 214

چاکسازی نیشتمانی 205