رۆژی‌ 8ی‌ ئازار ماڵپه‌رێكی‌ بازرگانی‌ له‌شاری‌ سلێمانی‌ كرایه‌وه‌ كه‌به‌شێك له‌داهاته‌كه‌ی‌ ته‌رخان ده‌كات بۆ وشیاركردنه‌وه‌ له‌باره‌ی‌ شێرپه‌نجه‌وه‌.

به‌رێوه‌به‌ری‌ ماڵپه‌ری‌ مامه‌ڵه‌ تایبه‌ت به‌كرین و فرۆشتن، ئیدریس ئه‌بوبه‌كر، به‌ بزاڤ پرێس  )ی‌ راگه‌یاند: به‌و هۆیه‌ی‌ ژماره‌یه‌كی‌ به‌رچاو له‌تووشبوانی‌ شێرپه‌نجه‌ له‌نێو ئافره‌تاندایه‌ ئه‌مڕۆ ماڵپه‌ره‌كه‌مان كرده‌وه‌ و كه‌به‌شێك له‌و داهاته‌ی‌ ماڵپه‌ره‌كه‌ بۆ وشیاركردنه‌وه‌ی‌ هاوڵاتیان له‌هه‌رێمی‌ كوردستان له‌نه‌خۆشی‌ شێرپه‌نجه‌ ته‌رخان ده‌كه‌ین.

ئه‌وه‌شی‌ گوت: نه‌خۆشی‌ شێرپه‌نجه‌ به‌ئه‌ندازه‌یه‌كی‌ مه‌ترسیدار ژماره‌ی‌ تووشبوانی‌ له‌هه‌رێمدا به‌رزده‌بێته‌وه‌، و ناكرێ‌ له‌به‌رامبه‌ر دۆخێكی‌ وه‌هادا بێده‌نگی‌ هه‌ڵبژێرین، هه‌رچه‌نده‌ ئێمه‌ ناتوانین هه‌موو ئه‌ركی‌ وشیاركردنه‌وه‌ بگرینه‌ ئه‌ستۆ به‌ڵام ده‌بینه‌ پێشه‌نگ بۆ هاندانی‌ ماڵپه‌ره‌ كوردیه‌كان و ده‌وڵه‌مه‌ند و كۆمپانیاكان به‌رامبه‌ر به‌م نه‌خۆشییه‌ كوشنده‌یه‌ له‌لای‌ خۆیانه‌وه‌ ده‌ست بكه‌ن به‌هاوكاری‌ ماددی‌.

باسی‌ له‌وه‌شكرد، له‌رێی‌ ئه‌و ماڵپه‌ره‌وه‌ ده‌توانرێ‌ كاڵا و كه‌لوپه‌ل سه‌ره‌تا له‌شاره‌كانی‌ كوردستاندا بكردرێ‌ و بفرۆشرێ‌ و له‌دوو مانگی‌ داهاتوودا هه‌موو عێراق بتوانێ‌ خزمه‌تگوزارییه‌كانی‌ به‌كار بهێنێ‌، هه‌روه‌ك ماڵپه‌ره‌كه‌ رێبه‌رێكی‌ به‌رفراوان بۆ كۆكردنه‌وه‌ی‌ زانیاری‌ هه‌موو شوێنی‌ كاره‌كان له‌هه‌رێمدا له‌خۆ بگرێ‌.

زیاتر گوتی‌: یه‌كێك له‌و بوارانه‌ی‌ ئه‌و به‌شه‌ داهاته‌ی‌ بۆ ته‌رخان ده‌كرێ‌ تایبه‌ت ده‌بێ‌ به‌و رۆژنامه‌نووسانه‌ی‌ لێكۆڵینه‌وه‌ی‌ رۆژنامه‌وانی‌ له‌باره‌ی‌ ژینگه‌ی‌ هه‌رێم و شێرپه‌نجه‌وه‌ ئه‌نجام ده‌ده‌ن، وه‌هاش به‌رنامه‌ دارێژیمان كردووه‌ هه‌ركاتێك بڕی‌ داهاته‌كه‌ زۆر بوو بتوانرێ‌ له‌رێی‌ ئه‌و كه‌سانه‌ی‌ دانه‌مه‌زراون به‌شێوه‌ی‌ وانه‌ وتنه‌وه‌ له‌قوتابخانه‌كاندا هه‌ڵمه‌تی‌ وشیاری‌ ژینگه‌یی‌ و شێرپه‌نجه‌ ئه‌نجام بده‌ین.

ئاماژه‌ی‌ به‌وه‌ش كرد، له‌سه‌ر ماڵپه‌ره‌كه‌ به‌شێك ده‌كرێته‌وه‌ به‌ناوی‌ بانكی‌ شێرپه‌نجه‌ بۆ زانینی‌ هه‌موو ئه‌و داهاته‌ی‌ ته‌رخان ده‌كرێ‌ بۆ شێرپه‌نجه‌ و له‌هه‌وڵی‌ ئه‌وه‌شداین كه‌ ژماره‌ی‌ تووشبوانی‌ شێرپه‌نجه‌ به‌هاوكاری‌ وه‌زاره‌تی‌ ته‌نردسوتی‌ هه‌رێم راسته‌وخۆ له‌سه‌ر ماڵپه‌ره‌كه‌ بڵاو بكه‌ینه‌وه‌.

له‌باره‌ی‌ هاوكارییه‌كان بۆ ماڵپه‌ركه‌، گوتی‌: پشتیوانییه‌ مه‌عنه‌وییه‌كان بۆ ماڵپه‌ره‌كه‌ زۆر بووه‌ و تائێستاش ته‌نیا ئه‌ندامی‌ لیژنه‌ی‌ مافی‌ مرۆڤی‌ په‌رله‌مانی‌ عێراق د.ئه‌شواق جاف هاوكاری‌ ماڵپه‌ره‌كه‌ بووه‌.

www.mamamlle.com