لە میانەی مەراسیمەكانی رۆژی جیهانی ژنان، یەكێك لە زانكۆكانی شاری تلمسان لە رۆژئاوای جەزائیر، چەند خوێندكارێكی بە پێدانی كۆپی قورئان خەڵاتكرد ،
بەڵام ئەم قورئانانە جیاوازبوون، لەبەرئەوەی وێنەی نیمچە رووتی هونەرمەندانی عەرەبیان تێدابوو. رۆژنامەی شروق-ی جەزائیری ئەم هەواڵەی بڵاوكردووەتەوە و نووسیویەتی، "زیاتر لە 200 خوێندكاری كچ ئەم قورئانەیان وەكو دیاری پێدراوە و كاتێكیش لە ماڵەوەبوون و بەرگی قورئانەكەیان كردووەتەوە،
بینیویانە وێنەی نیمچە رووتی هونەرمەندە عەرەبە ژنەكانی وەك هەیفا، نانسی، ئەلیسا، میادە حەناوی و چەند ئاكتەرێكی میسریان تێدا بینیوە و هەندێكیش لە قورئانەكان وێنەی ئاژەڵیان تێدابووە. دوای تێپەڕبوونی یەك هەفتە، خوێندكارەكان دەستیان بە  خۆپیشاندان كردووە لە دژی ئەم كارە و لەمبارەیەوەش سەرچاوەیەكی ئەمنی بە رۆژنامەكەی راگەیاندووە، دەست بە لێكۆڵینەوە كراوە بۆ دۆزینەوەی هۆكار و زانینی بەرپرسی رووداوەكە.
بەرپرسی خزمەتگوزاریەكانی زانكۆكەش رایگەیاندووە، كە زانكۆكە بەرپرس نییە لەبەرئەوەی ئەوان قورئانەكانیان بەپێچراوی بۆ هاتووە و نەیانزانیوە ئەو وێنانەیان تێدایە و ئەوانیش سكاڵایان دژی ئەو لایەنە تۆماركردووە، كە قورئانەكانی ناردووە و لە كۆتایشدا دەركەوتووە، كە قورئانەكان لە پایتەختی جەزائیرەوە هاتوون، بەڵام تاوەكو ئێستا هۆكاری ئەم كارەیان روون نەبووەتەوە.