ماوەیەکە بە هۆی هاتنی ژمارەیەکی زۆر پەنابەری عەرەب بۆ شارەکانی کوردستان جۆرێک لە چالاکی فکری و مەیدانی دژ بەوان سەری هەڵداوە.
ئەم چالاکیە رەگەزپەرستانەیە لە شیکردنەوەو داڕشتنی هەواڵی هەندێ لە دەزگا میدیاییە گەورەکانەوە دەست پێئەکات، بە نوسین و کۆمینتی هەندێ نوسەرو شانۆکاری ناسراو بەهێزتر ئەبێت و پاشان لە سەر شەقام و جادەکاندا بەوە خۆی نمایش ئەکات کە هەندێ دوکاندار وەک ئیهانە بۆ عەرەبەکان لە سەردەرگای فرۆشگاکانیان ئەنوسن؛" تەنها بۆ کوردە" یاخود بە ئەنقەست و بە ئاشکرا داوای نرخی دوقات و سێقات لە عەرەبەکان ئەکەن بۆ فرۆشتنی شتەکانیان...
ئەم کارە بە زمانی سیاسەت پێی ئەوترێ ڕەگەزپەرستی( یان ڕاسیزم)..
ڕاسیزم بیروباوەڕیکە بناغەکەی لە سەر ئەوە دامەزراوە کە ئینسانەکان لە بنەچەدا لە یەک ڕێشەوە نەهاتون و بە هۆی جیاوازی لە جینەکانیاندا هەندێکیان عاقڵترو نەجیبترن و توانایی زۆریان هەیە بۆ پێشکەوتن، هەندێکی تریشیان دەبەنگن و ناتوانن ببنە میللەت و تاکی ڕۆشنبیر و بەسود بۆ کۆمەڵ...ئەم ئایدیۆلۆژیە بڕوای بە نایەکسانی نەژادەکان هەیە و دو دەولەت، یەکیان لە ئەوروپا (ئەڵمان ١٩٣٣تا ١٩٤٥) و ئەویدی ئەفریقای باشور (تا ١٩٩١) لە سەر بنچینەی ئەو باوەڕە وەک سیستەمی نازی و ئاپارتاید دامەزران و پاش کوشتارێکی بیوێنە لە توخمی مرۆڤ، هەم سیستەم و هەم دامەزرێنەرانی سیستەمەکانیان بەرەو ڕیسوایی و نەمان ڕۆشتن.
جیاکردنەوەی ئینسانەکان لە سەر بناغەی جین و توخم و هەر هۆکارێکی تر،چ لە ئێستا یان داهاتوی کوردستانا، ڕەفتارێکی سیاسیانەی زیانبەخش و بێسود و بێبناغەیە:

زیانبەخشە چونکە لە گشت ڕویەکەوە سومعەو شوێنی کورد لە ئاستی ناوچەیی و جیهانیدا ئەشکێنێ و وەک میللەتێکی دڕندە ئەمانخاتە بەر چاوی دنیا... و زەمینەی ئەوە ئەڕەخسێنێ کە هەم دراوسێکانمان و هەم وڵاتانی ئەوروپی ئەوە بدەنەوە بە چاومانا کە ئەوان لە کاتی ئاوارەیی ئیمەدا چیان بۆ کردوین؛
بێسودە چونکە ‌هێچ کەسێکی عاقڵی ئەم کوردستانە، بە میللەت و حاکمەکانیەوە، ناچێتە ژێر باری ئەوەی کە بیر لەوە بکاتەوە عەرەب وەک دوژمنی کورد بناسێنێ چونکە: دیموکراتەکان کە سێ حزبی گەورەی ئەم وڵاتەن( گۆڕان و یەکێتی و پارتی) قەتعەن لایەنگری فکری ڕەگەزپەرستی ناکەن و حزبە ئیسلامیەکانیش بێگومان دژ بە مەرجەعییەتی خۆیان کە عروبەیی ئیسلامە ( یاخود ئیسلامی عروبەویە) هەنگاو نانێن و بەم هۆیەوە هەنگاونان بۆ گەشەپیدانی ڕاسیزم وەک کارێکی " بێسود" لە روی سیاسیەوە دەرئەکەوێت.
بێبناغەیە چونکە هیچکام لە تیۆریەکان ( وەک داروینیزمی کۆمەڵایەتی و تیۆرەکانی گۆبینۆی فەرانسەیی و چەمبەرلن ی بریتانی) نەیانتوانی ئیسپاتی ئەو جیاوازیە "عەقڵی"یە بکەن کە بەهۆی جیاوازی لە جۆری جین و ڕەگەزدا هەیە... هەوڵەکانی هیتلەر و فردریک دکلیرک لە ئەفریقا بونە مایەی ڕیسوایی و شکستی بێهەڵسانەوە.. بە تایبەت بەو هۆیەشەوە کە توخمی مرۆڤ، بە پێچەوانەی بانگەشە راسیستیەکانەوە، پیاوێکی وەک ماندیلای بینی کە بوە ڕەمزی عەقڵانییەتی سیاسی و کلتوری پێکەوەژیان و نەجابەتی ڕۆشنبیرانە..
ئامۆژگاری باش بۆ ئەوانەی خوازیاری تێکدانی دۆخی پڕ لە تەبایی نەتەوەکانن لە کوردستانا ئەوەیە کە:
یەکەم: واز لە هەر هەوڵێکی ڕەگەزپەرستی و دوژمنکارانە بهینن دژ بەهەر نەتەوەیەکی تر.
دوەم: مەسەلەی پەنابەران وەک مەسەلەیەکی ئینسانی تەماشا بکەن و هەوڵنەدەن مەعنای سیاسی و "ڕەگەزی" بۆ دابتاشن،
سێهەم: زۆر بێڵایەنانە هەوڵدەن کەسانی گومانلێکراو و بە تیرۆر و کاری تێکدەرانە بە دەزگاکانی ئاسایش و لایەنی پەیوەندیدار بناسێنن ( لە هەر نەتەوەیەک)
چوارەم: هەوڵدەن تێکەڵی ئاوارەکان ببن و وەک چۆن ئیمەمانان لە غەریبی و ئاوارەییدا باوەشمان بۆ کرایەوە ئەوانیش باوەش بکەنەوە بۆ خوشک و برا ئینسانەکانی خۆیان.