ئه‌مڕۆ شه‌ممه‌، وه‌زاره‌تی‌ به‌رگری‌ عێراق رایگه‌یاند: سێیه‌م كاروانی فڕۆكه‌ی‌ روسی‌ جۆری‌ (M35) گه‌یشتوه‌ته‌ عێراق و دراوه‌ته‌ ده‌ست فه‌رمانده‌ی‌ فڕۆكه‌وانی‌ سوپا.

سه‌رچاوه‌یه‌كی‌ ئاگادار له‌ وه‌زاره‌تی‌ به‌رگری‌ عێراق رایگه‌یاند ئه‌م كاروانه‌ فڕۆكه‌یه‌ش له‌ چوارچێوه‌ی‌ ئه‌و گرێبه‌سته‌دایه‌ كه‌ پێشتر عێراق و روسیا له‌سه‌ر مامه‌ڵه‌ی‌ كڕین و فرۆشتنی‌ فڕۆكه‌ له‌نێوانیاندا مۆریان كردوه‌.
ئه‌و هیڵیكۆپته‌ره‌ روسیه‌ چه‌ند تایبه‌تمه‌ندیه‌كی‌ گرنگی‌ هه‌یه‌ و به‌رهه‌مێكی‌ هاوبه‌شی‌ نێوان كۆمپانیای‌ میل و كارگه‌ی‌ رۆستۆڤه‌ بۆ به‌رهه‌مهێنانی‌ فڕۆكه‌ و توانای‌ جێبه‌جێكردنی‌ ئه‌ركی‌ قورس و كۆكردنه‌وه‌ی‌ زانیاری‌ هه‌یه‌ و له‌ توانایدایه‌ به‌خێرایی‌ (310كم) بڕوات له‌ سه‌عاتێكدا و بۆ هاوكاری‌ كتوپڕیش به‌كاربهێنرێت به‌وپێیه‌ی‌ ده‌توانێت (1500) كیلۆ كه‌ره‌سته‌ هه‌ڵبگرێت.
پێشتر و له‌ چوارچێوه‌ی‌ ئه‌و گرێبه‌سته‌ی‌ نێوان هه‌ردو وڵاتدا له‌بواری‌ چه‌ك و سه‌ربازیدا مۆریان كردوه‌، روسیا دو كاروانی دیكه‌ی‌ هه‌لیكۆپته‌ری‌ ره‌وانه‌ی‌ عێراق كردوه‌.