بنه‌ماڵه‌ی‌ سێ بێ سه‌روشوێنكراوی‌ ئیسلامییه‌كان هه‌ڕه‌شه‌ی‌ هه‌ڵدانی‌ خێوه‌ت ده‌كه‌ن له‌به‌رده‌م مه‌كۆی‌ سه‌ره‌كی‌ بزوتنه‌وه‌ی‌ گۆڕان  بۆ ئاشكراكردنی‌ چاره‌نوسی‌ كوره‌كانیان كه‌ له‌ساڵی‌ 2003وه‌ بێسه‌روشوێنن، له‌به‌رامبه‌ردا ژوری رۆژنامه‌وانی بزوتنه‌وه‌ی گۆڕان له‌ رونكردنه‌وه‌یه‌ك رایده‌گه‌یه‌نێ:"ئه‌و مه‌سه‌له‌یه‌ هیچ په‌یوه‌ندیه‌كی به‌بزوتنه‌وه‌ی گۆڕانه‌وه‌ نییه‌".

ئه‌مه‌ ده‌قی رونكردنه‌وه‌كه‌یه‌ :
له‌ نامه‌یه‌كی كراوه‌دا كه‌ به‌ناوی كه‌سوكاری سێ كه‌سی بێ سه‌روشوێنه‌وه‌ ئاڕاسته‌ی رێكخه‌ری گشتی و جڤاتی نیشتمانی و فراكسیۆنه‌كانی گۆڕان له‌ كوردستان و عێراق كراوه‌ ده‌رباره‌ی چاره‌نوسیان، له‌ وه‌ڵامدا به‌پێویستی ئه‌زانین ئه‌م رونكردنه‌وه‌یه‌ بۆ خاوه‌نی نامه‌ كراوه‌كه‌ و ئه‌و لایه‌نه‌ی هانی داون و رای گشتی بڵاوبكه‌ینه‌وه‌:
1 – ئه‌و سه‌رده‌مه‌ی ئه‌وان باسی ده‌كه‌ن كه‌ساڵی (2003)ه‌ ، هێشتا بزوتنه‌وه‌ی گۆڕان دروست نه‌بوه‌، له‌به‌رئه‌وه‌ ئه‌و مه‌سه‌له‌یه‌ هیچ په‌یوه‌ندیه‌كی به‌ بزوتنه‌وه‌ی گۆڕانه‌وه‌ نییه‌.
2 – ئێمه‌ له‌كاتێكدا هاوسۆزی خۆمان ده‌رده‌بڕین به‌رامبه‌ر كه‌سوكاری هه‌ركه‌سێ، كه‌ له‌به‌ر هه‌ر هۆیه‌ك بێ سه‌روشوێن كرابێ، داوایان لێ ئه‌كه‌ین له‌رێگه‌ی لایه‌نه‌ په‌یوه‌ندیداره‌كانی حكومه‌ته‌وه‌ سۆراخی كوڕه‌كانیان بكه‌ن.
3 – به‌م بۆنه‌یه‌وه‌ ئاگاداری ده‌زگا په‌یوه‌ندیداره‌كانی حكومه‌ت و ئه‌و لایه‌نه‌ی رای سپاردون ئه‌كه‌ین، كه‌ پێویسته‌ رێگه‌ و شوێنی پێویست بگرن، بۆ ئه‌وه‌ی هیچ روداوێكی نه‌خواستراو رونه‌دات، به‌پێچه‌وانه‌وه‌ ئۆباڵی قانونی و سیاسی هه‌ر روداوێكی نه‌خواستراو ئه‌كه‌وێته‌ ئه‌ستۆی ده‌زگا حكومه‌تی و سیاسیه‌ ده‌سه‌ڵاتداره‌كانی هه‌رێم.

 ژوری ڕۆژنامه‌وانیی بزوتنه‌وه‌ی گۆڕان
13/7/2013