ئەمڕۆ دوشەممە، زنجیرەیەک تەقینەوە چەند ناوچەیەکى عێراقی هەژاند و بەپێی ئامارە سەرەتاییەکانیش تائێستا (65) کەس بەهۆیانەوە بونەتە قوربانی.
سەرچاوەیەک لە وەزارەتی ناوخۆی عێراق ئاشکرایکرد، کە بەهۆی تەقینەوەی بۆمبێکەوە لەناو کافتریایەک لەناوچەی تاجی نزیک بەغدا (7) کەس کوژراون و (20)ی دیکەش بریندرابون.
ئاماژەی بەوەشکردوە؛ لە تەقینەوەیەکی دیکەدا کە کاروانێکی هێزەکانی پۆلیسى کردوەتە ئامانج لە دۆرە، دو کەس کوژراون و سیانی دیکەش برینداربون، هەروەک لە شاری فەلوجە و لە ئەنجامى تەقینەوەیەکی خۆکوژیدا سێ کەس کوژران و (30) کەسی دیکەش برینداربون.
ئەو تەقینەوانە دواى زنجیرەیەک تەقینەوەى دیکە دێت کە دوێنآ لە چەند ناوچەیەکى جیاوازى وڵاتدا ئەنجامدران و (184) قوربانیان لێکەوتەوە، بەشێوەیەک سەرچاوە ئەمنی و پزیشکیەکان بڵاویانکردەوە ئەو تەقینەوانەى لە رێی ئۆتۆمۆبێلی بۆمبڕێژکرا و بۆمبی چێنراو و بۆمبی لاستیکی و تەقینەوەی خۆکوژییەوە ئەنجامدران (184) قوربانی لە شارەکانی بەسرە و بەغدا و موسڵ و نەجەف و واست و بابل و کوت و ئەبو غرێب لێکەوتوەتەوە.