ئیبراهیم جه‌عفه‌ری وه‌زیری ده‌ره‌وه‌ی عیراق ئه‌مڕۆ به‌سه‌ردانێكی ره‌سمی گه‌یشته‌ ئه‌نكه‌ره‌و بڕیاره‌ له‌گه‌ڵ كاربه‌ده‌ستانی ئه‌و وڵاته‌ كۆبێته‌وه‌.

ئاماژه‌ی به‌وه‌شكردووه‌ كه‌ جه‌عفه‌ری له‌و سه‌ردانه‌یدا له‌گه‌ڵ ره‌جه‌ب ته‌یب ئه‌ردۆگان سه‌رۆكی توركیا و ئه‌حمه‌د داود ئۆغلۆ سه‌رۆك وه‌زیران و جه‌میل چیچه‌ك سه‌رۆكی په‌رله‌مان كۆده‌بێته‌وه‌.

مه‌به‌ستی سه‌ره‌كی سه‌ردانه‌كه‌ی جه‌عفه‌ری رێكخستنی سه‌ردانی حه‌یده‌ر عیبادیه‌ بۆ توركیا و چاره‌سه‌ری ئه‌و گرژی و ناكۆیانه‌یه‌ كه‌ به‌هۆی سیاسیه‌تی مالكیه‌وه‌ له‌نێوان هه‌ردوو وڵاتدا بوونی هه‌بووه‌.
له‌به‌یاننامه‌یه‌كی وه‌زاره‌تی ده‌ره‌وه‌ی توركیا هاتووه‌ كه‌ سه‌ردانه‌كه‌ی وه‌زیری ده‌ره‌وه‌ی عیراق سێ رۆژ ده‌خایه‌نێت و له‌گه‌ڵ كاربه‌ده‌ستانی توركیا گفتوگۆ ده‌كرێت له‌سه‌ر به‌هێزكردنی په‌یوه‌ندییه‌كان و پرسه‌ ئقلیمی و نێوده‌وڵه‌تییه‌كان.
هه‌روه‌ك به‌یاننامه‌كه‌ ئاماژه‌ی به‌وه‌ كردوه‌ كه‌ توركیا هاوكاری گه‌لی عیراقه‌ له‌به‌رامبه‌ر شه‌ڕی دژی داعش.