Bzavpress ||

نوسه‌ران

عەلمانیەت و واقیعیەتی گەلی كورد......

عەلی حاجی زەڵمی

عەڵمانیەت لە زاراوەی سیاسیدا "لایك گەرایی"پێدەگوترێ‌ بەمانا لادینی،ئیدی هەموو ئەو شتانە دەگرێتەوە لە دین جیا بێت.یان بەشێوەیەكی دی ستراتیژێك كەخاڵی بێت لە ئایدیای میتافیزیقی،خۆ دەربازكردن لە هەر شتێ‌ بگەرێتەوە بۆ خواو ڕۆشتین لەسەر نەهج و ئەندێشەیەك كە دەستكردی مرۆڤ.هەر لەو ڕوانگەیەوە دەخوازێت كارایی دین لە كارو باری ڕامیاریدا خاشە بڕ بكرێت،ئەمەش هەوڵێكی پووچە،چونكە دین غەریزەیە لە مرۆڤدابوونی هەیە،دین بەمانای باوەڕبوون،بە خوایەك كە بەدیهێنەریەتی،بەڵام وا بووە مرۆڤ لە دۆزینەوەی خوای خۆیدا،بەهەڵە چووە.یان لە دوا ساتەكان و كاتی دژواریدا،لە ڕووی ناچارییەوە ، دیسانەوە پەنای بۆ بردۆتەوە، لینین كە دوا پلەی بێ‌ باوەڕی بوو ، كاتێ‌ خەریك دەبێ‌ بكەوێ‌ ، هاوار دەكاتە خوا ، كچەكەی دەڵێ‌ باوكە تۆ ناڵێی خوا نی یە، بۆ هاوار بۆ خوا دەكەی؟ پراڤدا كە زمانحاڵی بۆلشەفیەكان بوو ، بە درێژایی نەخۆش بوونی لینین داوای لە خەڵكی دەكرد ، دوعای چاك بوونەوەی بۆ بكەن .

واقعیەتی گەلی كورد وای كردووە ، ڕێگاكان تاقی بكاتەوە و ، غیابی دین لە سیاسەتدا ، وایكردووە، هەموو بۆچونە باوەكانی سەردەم تاقی بكاتەوە ، عەلمانیەتیش بووە بە هەوێنی حیزبایەتی كردن و خەبات . ئەوەی ئەمڕۆ دەیبینی بەرهەمی عەلمانیەتی كوردیە ، ئاكاری جوان تاراوە، بێهوودە گەرایی هاتۆتە ئاراوە ، ڕاگەیاندن خراوەتە ناو چڵپاوی فەسادەوە ، و گەندەڵی خۆی سەپاندووە . ئەمەش بۆ ئێمە زۆر مەترسیدارە ،چونكە سیادە و دەوڵەتمان نی یە و ناتوانین لە فەترە زەمەنیەكدا ، هەموو ئەو شتانەی تێك دراون چاكیان بكەینەوە .

به‌روار: 24/08/2013

بینین: 1721