Bzavpress ||

نوسه‌ران

گۆڕان: هه‌ڵوێستێك دژ به‌ گه‌ل و و پشتیوانی له‌ حه‌رامێكی ئاشكرا

فاتیح سه‌نگاوی

هه‌ر كات قه‌ناعه‌تم به‌وه‌ بوبێ، هه‌ڵوێستێك، بڕیارێك دژه‌ به‌ به‌رژه‌وه‌ندی خه‌ڵكی كوردستان و ماف و خواسته‌كانیان ... یاخود پێچه‌وانه‌یه‌ به‌ بنه‌ما نه‌گۆڕ و جێگیره‌كانی ئیسلام و له‌ ئیجتهادێكی دروستدا جێگه‌ی نابێته‌وه‌، ئه‌وا وه‌ك به‌رپرسیارێتییه‌ك له‌ به‌رامبه‌ر خوای گه‌وره‌ و پاشان گه‌له‌كه‌مدا بۆچونی رون و ئاشكرای خۆمم ده‌ربڕیوه‌ و گوێم له‌وه‌ نه‌بوه‌ و نییه‌ كه‌ كێ و چ حزبێك خاوه‌ن ئه‌و هه‌ڵوێست و بڕیاره‌یه‌ ... هه‌ر له‌م سۆنگه‌یه‌وه‌ ره‌خنه‌م له‌ چه‌ندین هه‌ڵوێستی سیاسی و فیكری یه‌كگرتووی ئیسلامی و ئیسلامییه‌كانی كوردستان گرتوه‌ و ده‌یگرم ... ستایشی هه‌ڵوێستی ئه‌وانیترم كردوه‌ له‌وانه‌ بزوتنه‌وه‌ی گۆڕان ... ئه‌م بۆچونه‌شم ته‌واو هه‌ڵوێستێكی تاكه‌كه‌سییه‌ و هه‌ڵقوڵاوی بیر و بۆچونی خۆمه‌ و ئه‌كرێ زۆركه‌س پشتیوانی لێ بكات و هه‌ندێكی دیش قه‌ڵس و دڵگران كات ...
له‌م قۆناغ و ساته‌ مێژووییه‌دا جێی خۆیه‌تی ره‌خنه‌یه‌كی جدی ئاراسته‌ی ئه‌و بزوتنه‌وه‌ بكه‌ین و هه‌ڵوێسته‌یه‌كی پێ بكه‌ین له‌ ئاست پشتیوانی كردنی فه‌رمیی ئه‌و فراكسیۆنه‌(جگه‌ له‌ كاك عه‌لی حمه‌ صالح و د.جوان كه‌ من ده‌سخۆشییان لێ ده‌كه‌م‌) له‌ پرۆژه‌ یاسایه‌كی وه‌كو قه‌رزی ده‌ره‌كی كه‌ به‌هه‌موو پێوه‌رێكی ئابووری زیان و بارگرانییه‌كی گه‌وره ‌ رووبه‌ڕووی هه‌موو خه‌ڵكی كوردستان و نه‌وه‌كانی داهاتوو ده‌كاته‌وه بێ جیاوازی‌، ئه‌مه‌ جگه‌ له‌وه‌ی پشتیوانی كردنه‌ له‌ پرۆژه‌یه‌ك كه‌ بێ دوودڵی حه‌رامكراوێكی شه‌رعییه‌!!
من نازانم چۆن بزوتنه‌وه‌ی گۆڕان پشتیوانی له‌ پرۆژه‌ یاسایه‌كی له‌و شێوه‌یه‌ ده‌كات له‌كاتێكدا ئه‌وان خۆیان به‌داكۆكی كارێكی سه‌رسه‌ختی به‌رژه‌وه‌ندییه‌كانی خه‌ڵكی كوردستان ئه‌ژمار ده‌كه‌ن و رایان گه‌یاندووه‌ دژن به‌ گه‌نده‌ڵی و له‌گه‌ڵ به‌ فیڕۆدانی داهاتی كوردستان نین؟؟!! خه‌ڵكێكی زۆر وه‌ها تێگه‌یشتوون كه‌ گۆڕان پشتیوانی له‌ هیچ پرۆژه‌ یاسایه‌ك ناكات كه‌ پێچه‌وانه‌ و دژ بێت به‌ بنه‌ما و نه‌گۆڕه‌كانی ئیسلام، ئه‌بێ له‌ هه‌ڵوێستێكی وه‌هادا وه‌ڵامیان بۆ ئه‌و خه‌ڵكه‌ی خۆیان چی بێت؟!!!
ئه‌بێ ئه‌م پشتیوانی كردنه‌ به‌هۆی رێككه‌وتنێكی سیاسییانه‌ی ژێر به‌ژێره‌وه‌ بێت له‌گه‌ڵ ئه‌وانیتردا؟! یاخود شتێكی تره‌و ئێمه‌ پێی نازانین؟!! بۆ نمونه‌ له‌به‌رامبه‌ر ئه‌وه‌ی داهاتی نه‌وت بچێته‌ خه‌زێنه‌ی وه‌زاره‌تی داراییه‌وه‌ ئه‌وان پشت له‌ به‌رژه‌وه‌دی خه‌ڵكی ده‌كه‌ن و پشتیوانن بۆ پرۆژه‌ یاسایه‌كی زۆر خراپی له‌و شێوه‌یه‌؟!! ئه‌وه‌ ده‌بێت ئه‌وان وه‌ڵامی بده‌نه‌وه‌ ...!!
زویر نه‌بن گه‌ر بڵێم: ئه‌م هه‌ڵوێسته‌ هه‌ڵوێستی پشتیوانی كردنی پرۆژه‌ یاسای درێژكردنه‌وه‌ی دووساڵی ویلایه‌تی سه‌رۆكی هه‌رێمم بیر دێنێته‌وه‌ كه‌ ئه‌و بزوتنه‌وه‌یه‌ زۆر دژی بوو، به‌ڵام ئێسته‌ به‌خراپتر له‌وه‌ رازی بووه‌ .... هیوادارم بزوتنه‌وه‌ی گۆڕان و ئه‌وانی تریش سه‌نگه‌ری خه‌ڵكی كوردستان چۆڵ نه‌كه‌ن و متمانه‌ی جه‌ماوه‌ره‌كه‌یان له‌ده‌ست نه‌ده‌ن و ئه‌وه‌نده‌ی تر نائومێدی نه‌به‌خشنه‌ ئه‌و خه‌ڵكه‌ی قوربانی ده‌ستی سته‌م و نادادییه‌ به‌ هه‌موو جۆره‌كانیه‌وه‌ ...

به‌روار: 07/06/2015

بینین: 1360