نوسه‌ران
  پارتی هه‌ر یه‌ك قسه‌ ده‌كات !!
شوان هەورامی

پارتی مه‌ركه‌زیی ترین حیزبه‌ له‌ گشتاندنه‌كانیدا و هه‌موویان یه‌ك قسه‌ ده‌كه‌ن ، هه‌زار به‌ڵگه‌نه‌ویست و هاوكێشه‌ی بیركاریانه‌یان بۆ بهێنیته‌وه‌ و بابه‌ته‌كانیان بۆ بسه‌لمێنیت ، دواجار هه‌ر دێنه‌وه‌ سه‌ر قه‌وانه‌كه‌ی خۆیان كه‌ له‌ سه‌ره‌وه‌ ته‌ڵقین كراون ، زۆر جار له‌ حاڵه‌تی ئیحراجیدا وتوویانه‌ فڵانه‌ هه‌ڵوێست خۆڕسكه‌ و په‌یوه‌ندیی به‌ بڕیاری سه‌روه‌ نیه‌ ، به‌ڵام ئه‌م یه‌ك دوو رۆژه‌ به‌یاننامه‌كانی سه‌رۆكی پارتیی و مه‌كته‌بی سیاسیی گومانی نه‌هێشته‌وه‌ كه‌ ئه‌وان نه‌ك سه‌رۆك به‌ڵكو به‌ردوداری باره‌گاكانیشیان به‌ پیرۆزتر له‌ خوێنی جه‌ماوه‌ری كوردستان ده‌زانن . ئه‌م هێزه‌ بۆ هه‌ر سته‌مێكی خۆی پاساو ده‌هێنێته‌وه‌ و هه‌میشه‌ش خۆی به‌ قوربانیی پیلانی هێزه‌كانی تر هه‌ژمار ده‌كات ، فه‌رموون :
• دوو جار له‌سه‌ر هه‌ڵبژاردنه‌كان و بوونی جه‌ماوه‌ری یه‌كگرتوو له‌ بادیناندا باره‌گاكانی یه‌كگرتوویان سووتاند ، كه‌چی له‌ جیاتی داننان به‌ هه‌ڵه‌دا په‌نایان بۆ سوڵحی عه‌شایه‌ریی و پاساوی بێ مانا برد ، كه‌ گوایه‌ ئه‌وانه‌ی به‌و كاره‌ هه‌ڵساون خه‌ڵكی تووڕه‌ی خۆڕسكن و په‌یوه‌ندییان به‌ پارتیه‌وه‌ نیه‌ ، له‌ كاتێكدا خه‌ڵك له‌سه‌ر نیازی پێش كار و خه‌ون و خه‌یاڵ ده‌گرن و فه‌للاقه‌ی ده‌كه‌ن ، ئایا هه‌زاران كه‌س به‌بێ مۆڵه‌ت ده‌توانن باره‌گا بسوتێنن و سه‌ری سه‌ره‌وه‌ ئاگاداری نه‌بێت ؟!
• گوتیان به‌غدا پاره‌ی نیه‌ بۆیه‌ مووچه‌ دواكه‌وتووه‌ ، دوای رێكه‌وتنامه‌ هه‌ر بۆ خۆیان گوتیان ئه‌گه‌ر سه‌ربه‌خۆ نه‌وت بفرۆشین سه‌ربه‌خۆیی ئابووریی به‌ده‌ست ده‌هێنین و ده‌توانین بودجه‌ی پێویستی هه‌رێم دابین بكه‌ین ، ئه‌وه‌ چواره‌مین مانگه‌ وه‌زیری سامانه‌ سروشتیه‌كان خۆی نه‌وت ده‌فرۆشێت ، كه‌چی هه‌موو كادیرانی پارتی له‌ سه‌ره‌وه‌ بۆ خواره‌وه‌ ده‌ڵێن داوای مووچه‌ له‌ وه‌زیره‌كه‌ی گۆڕان بكه‌ن ، به‌بێ ئه‌وه‌ی دۆلارێكی پاره‌ی نه‌وت خرابێته‌ حسابی وه‌زاره‌تی داراییه‌وه‌ !!
• خه‌ڵك بێزار بووه‌ له‌ گفتوگۆكان و قه‌یرانی ئابووریی قوڕگی گرتووه‌ و بێزار بووه‌ ، به‌ خۆڕسك هاتووه‌ته‌ سه‌ر شه‌قامه‌كان ، له‌به‌ر ئه‌وه‌ی پاره‌ی نه‌وت له‌لای پارتیه‌ خه‌ڵك ئه‌وان به‌ به‌رپرسی برسێتی خۆی ده‌زانێت ، كه‌چی ده‌ڵێن ئه‌وانه‌ ئاژاوه‌چین و به‌ پیلانێكی ده‌ره‌كیی ئه‌و كاره‌ ده‌كه‌ن .
• هه‌موان ده‌زانین كه‌ به‌ پێی راپۆرته‌ نێوده‌وڵه‌تیه‌كان حكومه‌ته‌كه‌ی هه‌رێم خاوه‌نی 43 قه‌یرانی گه‌وره‌یه‌ ، كه‌چی كادیرانی پارتی هه‌ر سوورن له‌سه‌ر ئه‌وه‌ی ئه‌م قه‌یران و خۆپیشاندانه‌ی كوردستان ده‌ره‌كیه‌و كوردستان شامی شه‌ریفه‌ !
• هه‌موو چین و توێژه‌كان داوای مافی ره‌وای خۆیان ده‌كه‌ن ، پارتییش ناتوانێت بڵێت وا نیه‌ ، به‌ڵام كاتێ جه‌ماوه‌ر و چین و توێژه‌كانی داوای مافه‌كانیان ده‌كه‌ن ، یه‌كسه‌ر داعش ده‌كه‌نه‌ پاساوی ئه‌و نادادگه‌ریانه‌ و ده‌ڵێن ناكرێ له‌ كاتێكدا ئێمه‌ له‌ شه‌ڕداین خه‌ڵك داوای ئه‌و مافانه‌ بكات .
• ئه‌وه‌ی ئه‌م دۆخه‌ی به‌ ئێستا گه‌یاند هه‌ر هه‌مان یه‌ك گێڕییه‌ی پارتیه‌ كه‌ هه‌یه‌تی ، به‌ تایبه‌تی بۆ سه‌رۆكایه‌تی هه‌رێم ، كه‌ ده‌ڵێن یا سه‌رۆك له‌ناو خه‌ڵكه‌وه‌ یا ریفراندۆم ، چه‌ندین جار رێگه‌ چاره‌ی تریان پێشكه‌ش كراوه‌ ، ئه‌وان هه‌ر سوورن له‌سه‌ر هه‌مان قسه‌ی یه‌كه‌مجار ، كه‌ سیاسه‌ت و پراگماتیی بوون پێچه‌وانه‌ی ئه‌ون كه‌ پارتیی و كادیرانیی ده‌یڵێن .
• كاتێ حیزبه‌كانی تر سته‌میان لێ ده‌كرێت ، پارتی ده‌ڵێت ده‌بێ ئارامیی كوردستان بپارێزین - به‌ تایبه‌تیی كاتی سوتاندنی باره‌گای حیزبه‌كانی تر – به‌ڵام كاتێ به‌رد ده‌گیرێته‌ به‌رد و بلۆك و ئاسنی باره‌گاكانی خۆیان ده‌ڵێن ئه‌وه‌ خه‌تی سووره‌ و ئێمه‌ حیزبی ده‌سه‌ڵاتدارین و قبوڵی ئه‌وه‌ له‌ كه‌س ناكه‌ین ، ئه‌مڕۆ چه‌ندین جار له‌ سه‌ره‌وه‌ بۆ خواره‌وه‌ ئه‌م قسه‌یان دووباره‌ كرده‌وه‌ !!
ده‌بوو ته‌مه‌نی پارتیی و به‌رپرسیارێتی مێژوویی ته‌جرووبه‌ی عه‌قڵانیی و گه‌وره‌ی له‌لای ئه‌و هێزه‌ كۆكردایه‌ته‌وه‌ ، به‌ڵام ئه‌وه‌ی كه‌ ده‌بینرێت ته‌نگه‌نه‌فه‌سیی و كه‌م ته‌جرووبه‌یی و هه‌رزه‌كارانه‌ مامه‌ڵه‌ كردنی ئه‌م هێزه‌ نیشان ده‌دات ، كه‌ مه‌خابن خه‌ریكه‌ دابه‌شبوونی هه‌رێم بۆ جارێكی تر ده‌بێته‌وه‌ به‌ داكه‌وته‌ ، چونكه‌ ده‌بێ بزانین دابه‌شبوونی پێشووی هه‌رێم داهاتی گومرگ بزوێنه‌ری یه‌كه‌م بوو ئینجا كۆنترۆڵی ده‌سه‌ڵات ، وا دوای ئه‌وه‌ی بودجه‌ی به‌غدا بڕا ، پارتی هه‌روه‌كو جاری پێشوو كه‌ خۆی به‌ خاوه‌نی ئیبراهیم خه‌لیل ده‌زانی ، ئێستاش خۆی به‌ خاوه‌نی ئه‌و نه‌وته‌ فرۆشراوه‌ ده‌زانێت و كردوویه‌تیه‌ كارتی گوشار له‌سه‌ر خه‌ڵك و حیزبه‌كانی تر ، بۆیه‌ دۆخه‌ هه‌رێمایه‌تیه‌كه‌ش هانده‌رێكی تره‌ بۆ دابه‌شبوونه‌كه‌ .
به‌روار: 11/10/2015
بینین: 453
   زیاتر ...