نوسه‌ران
  ترسناكتر له‌ داعش
شوان هەورامی

ئه‌وه‌ی كه‌ چه‌ند رۆژێكه‌ له‌ خورماتوو رووده‌دات ، كرانه‌وه‌ی ده‌رگای شه‌ڕێكی ترسناكتره‌ كه‌ ده‌بێ هه‌زار سڵاو بنێرین بۆ جه‌نگه‌كه‌ی داعش ، چونكه‌ حه‌شدی شه‌عبی ( ببوورن وه‌حشی ) به‌ رق و كینه‌یه‌كی 1400 ساڵه‌و ده‌ستێكی كراوه‌ بۆ تاوان و قڕكردنی كورد و سوننه‌ گۆش كراو و قانگ دراون و به‌ هه‌بوونی پشتیوانێكی به‌هێزه‌وه‌ بۆ جێبه‌جێ كردنی ستراتیژی شیعه‌گه‌رایی هاتوون ، داعش ته‌نیا بیانووه‌ ، ئه‌گینا كینه‌ی ئه‌وان به‌رانبه‌ر به‌ كورد زۆر ئه‌ستووره‌ و ڤیدیۆی پیاوه‌ سیاسیی و ئاینیه‌كانیان كه‌ بێڕێزیی ده‌كه‌ن به‌رانبه‌ر به‌ كورد زۆر روونه‌ كه‌ ئه‌وان له‌ به‌رنامه‌یاندایه‌ ئه‌گه‌ر بۆیان بكرێت كوردستان له‌سه‌ر نه‌خشه‌ بسڕنه‌وه‌ ، یا هیچ نه‌بێت ئه‌وه‌ی كه‌ بمێنێته‌وه‌ ملشۆڕ و نۆكه‌ری ئه‌وان بێت .
له‌ كاتێكدا كورد له‌و ناوچه‌یه‌دا باڵاده‌ست بووه‌ ، هه‌موو پێكهاته‌كان پێكه‌وه‌ ژیاون و ئاسایشیان پارێزراو بووه‌ ، به‌ڵام له‌و كاته‌وه‌ كه‌ به‌ بیانووی داعشه‌وه‌ حه‌شدی وه‌حشی له‌و شاره‌دا جێگیر كراوه‌ ، تیرۆر و تۆقاندن و خه‌ڵك رفاندن و دوكان و بازاڕ سوتاندن بووه‌ته‌ دیارده‌ی ئه‌و شاره‌ ، كه‌ مه‌خابن ئه‌وه‌ش به‌هۆی بێده‌نگیی هێزه‌ كوردییه‌ سیاسییه‌كانه‌وه‌ بووه‌ ، به‌ تایبه‌تی یه‌كێتی نیشتمانیی كوردستان به‌رپرسه‌ له‌وه‌ی له‌ ناوچه‌ی گه‌رمیان و گه‌رمه‌سێردا حكومه‌تی به‌غدا چه‌ندین فه‌وجی حه‌شدی شیعه‌ی له‌ كورده‌كان و توركمانه‌ شیعه‌كان دروستكرد و له‌ هه‌ر شوێنێك بووبن بوونه‌ته‌ مایه‌ی كێشه‌ و گرفت نانه‌وه‌ ، له‌ كاتێكدا ئه‌م هێزانه‌ هیچ رۆڵێكیان له‌ شه‌ڕی دژه‌ داعشدا نه‌بووه‌ و له‌ هه‌ر شوێنێ پێشمه‌رگه‌یان له‌گه‌ڵدا نه‌بووبێت ، داعش كارێكی پێكردوون با به‌ ده‌واری شڕی نه‌كردبێت ، ئیتر نازانم بۆچی كورد له‌ باخه‌ڵیدا ماره‌ سڕه‌ی گه‌رم كرده‌وه‌ تا به‌و شێوه‌یه‌ پێوه‌ی بدات ؟!
ئه‌مانه‌ مانای هێوركردنه‌وه‌ نازانن ، چونكه‌ پیاوه‌ ئاینیه‌كانیان پێیان گوتوون كورد له‌ نه‌وه‌ی جنۆكه‌یه‌ ، ئیمامی مه‌هدی كه‌ ده‌ركه‌وت یه‌كه‌مجار شه‌ڕی كورد ده‌كات ، جا كوردی سوننه‌ش بێت ئه‌وا تاوانه‌كه‌ی سه‌خت تره‌ ، شیعه‌ی توقیه‌چی هه‌ر كاتێ هه‌ستی به‌ بێهێزیی خۆی كردبێت و پێویستی به‌ شاخ و ناوچه‌ ئازاد كراوه‌كانی كوردستان بووبێت ، خۆیان به‌ برا و كه‌سی كورد ناساندووه‌ ، هه‌روه‌كو له‌ هه‌شتاكاندا به‌ بۆنه‌ی ئه‌وانه‌وه‌ كوردستان به‌ كیمیاویی و ئه‌نفال وێران كرا ، له‌ نه‌وه‌ده‌كاندا شاره‌كانی كوردستانیان بۆ كاری رێكخراوه‌یی به‌كار هێنا ، له‌ دوای رووخانی رژێمی سه‌دامیش هێزی پێشمه‌رگه‌یان بۆ ئاسایشی خۆیان به‌كارهێنا تا ده‌وڵه‌ته‌ تائفیه‌كه‌یان دروست كرد و ئیتر پێویستیان پێی نه‌ماو كه‌وتنه‌ لێدانی پێگه‌ی و بڕینی بودجه‌ و گوشار خستنه‌ سه‌ر هه‌رێمی كوردستان ، مه‌خابن ئه‌وان به‌ پلان و پیلانگێڕیی و ستراتیژ كارده‌كه‌ن و كوردیش ده‌یان ساڵه‌ به‌ قه‌وانی فه‌تواكه‌ی حه‌كیم كار ده‌كات گوایه‌ به‌ عه‌بدولكه‌ریم قاسمی وتووه‌ كوشتنی كورد دروست نیه‌ ، ئایا ئێستا حه‌شده‌كه‌ی ئالی حه‌كیم كه‌ به‌ره‌و خورماتوو ده‌نێردرێن هه‌ڵگری هه‌مان فه‌توان یا فه‌توای نوێیان هه‌ڵگرتووه‌ ، كه‌ خوێنی ژن و منداڵ و پیرو نه‌وجه‌وانی كوردی حه‌ڵاڵ كردووه‌ ، كه‌ ئه‌وه‌ ساڵێكه‌ ده‌یان كورد شه‌هید كراون و خانووه‌كانیان داگیر كراوه‌ ، جگه‌ له‌وه‌ش هه‌ر له‌م ساڵانه‌دا به‌ فه‌رمانی تائقیانه‌ی مالیكی هه‌زاران دۆنمی ئه‌وقافی سوننه‌ی كه‌ركوك خرایه‌ سه‌ر وه‌قفی شیعه‌ ، ئایا كورد كه‌ شۆڕشی ده‌كرد له‌گه‌ڵ سه‌دام هه‌ر له‌سه‌ر داگیركاریی و سته‌مكاریی نه‌بوو ؟ ئه‌ی ئه‌و حیزبه‌ كوردیانه‌ تاكه‌ی هه‌مان سته‌می به‌عس له‌ به‌غدای نوێ – كه‌ ناویان لێنابوو عێراقی هیوا و ئاشتی – قبوڵ ده‌كه‌ن ؟ 
ئه‌وانه‌ی وا گومان ده‌به‌ن خورماتوو به‌ گفتوگۆی كورد و شیعه‌ و به‌ چاودێریی ئێران ده‌گاته‌ ئه‌نجام له‌ خه‌وی غه‌فڵه‌تدایه‌ و خۆی كوردیش چه‌واشه‌ ده‌كات ، چاره‌سه‌ری خورماتوو به‌س له‌وه‌دایه‌ ئه‌و میلیشیا تیرۆریستانه‌ له‌ شاره‌كه‌ دوور بخرێنه‌وه‌ و كۆنترۆڵی شه‌قام و شوێنه‌ گشتیه‌كان به‌ هێزی ئاسایش و پۆلیسی شاره‌كه‌ بسپێردرێت ، به‌ هیچ شێوه‌یه‌كیش رێگه‌ به‌و میلیشیایانه‌ نه‌درێت كه‌ له‌ گه‌رمیان و گه‌رمه‌سێردا هاتووچۆ بكه‌ن ، به‌ تایبه‌تی ئه‌وان به‌ بیانووی داعش دروست بوون ، ئیتر له‌ كوردستانی ئازاد كراودا چ كارێكیان هه‌یه‌ تا ته‌راتێن بكه‌ن ؟ ئه‌گه‌ر كورد به‌ كه‌متر له‌وه‌ رازیی ببێت دڵنیابێت سبه‌ینێ ئه‌وه‌ هیچ خورماتوو له‌ ده‌ست ده‌رده‌چێت به‌ڵكو ده‌بێ فاتیحه‌ بۆ كه‌ركوك بخوێنین !!
به‌روار: 16/11/2015
بینین: 457
   زیاتر ...