نوسه‌ران
  ئه‌مجاره‌ش عاتیفه‌ی نه‌ته‌وه‌یی به‌هه‌ڵه‌داچوو !!
شوان هەورامی

به‌ پێچه‌وانه‌ی ره‌مڵ لێدانی راپرسییه‌ ئایدیۆلۆژییه‌كانی توركیا و خه‌ونه‌ نه‌زۆكه‌كانی راگه‌یاندنه‌ لۆكاڵییه‌كانی هه‌ندێ ناسیۆنالیستی كورتبین ، ئه‌نجامی هه‌ڵبژاردنه‌كانی توركیا سه‌ركه‌وتنێكی رێكۆردشكێنی بۆ پارتی دادوگه‌شه‌پێدان ( AKP ) تۆمار كرد . 
له‌م هه‌ڵبژاردنه‌دا جگه‌ ( AKP ) پارته‌كانی تر هه‌موویان ده‌نگیان كه‌میی كرد ، به‌ تایبه‌تیی نه‌ته‌وه‌ییه‌كانی توركیا ( MHP ) و پارتی دیموكراتی گه‌لان ( HDP ) كه‌ سه‌ركرده‌كه‌ی ( سه‌لاحه‌دین ده‌میرتاش ) باسی تێپه‌ڕاندنی 15% به‌ره‌وژووری ده‌كرد !!
دوابه‌دوای ئه‌نجامه‌كانی هه‌ڵبژاردنی حوزه‌یران ، كه‌ ده‌میرتاش به‌ر له‌ هه‌ڵبژاردن و دوای هه‌ڵبژاردنه‌كه‌ش رایگه‌یاند له‌گه‌ڵ هه‌مواندا ئاماده‌ی پێكهێنانی كابینه‌یه‌ جگه له‌‌ ( AKP ) وتارێكم نووسیی و له‌م لاپه‌ڕه‌یه‌دا بڵاوم كرده‌وه‌ ، باسی ئه‌وه‌م كرد كه‌ ده‌میرتاش به‌ دنه‌ی ده‌ستی ده‌ره‌كیی فرسه‌تێكی گه‌وره‌ له‌ ده‌ست كورد ده‌دات كه‌ له‌ دوای راگه‌یاندنی كۆماری نوێی توركیا بتوانێت ببێته‌ به‌شێك له‌ كابینه‌ و پرۆسه‌ی ئاشتیی په‌ره‌ پێ بدات و زیاتریش به‌شدار بێت له‌ بێهێزكردنی ره‌گه‌زپه‌رستانی ئه‌و وڵاته‌دا ، به‌ڵام به‌داخه‌وه‌ پارتێك هێشتا به‌ گیانی چه‌كوش و داس و ئه‌ستێره‌ی سووره‌وه‌ سه‌ركه‌وتنه‌كه‌ی كوردانی باكووری كرده‌ دیاریی بۆ چه‌په‌ نه‌یاره‌كانی (AKP ) و به‌ ئاراسته‌كانی لویس ئه‌یالای سكرتێری سوسیالیست ئینته‌رناسیۆناڵ كه‌ جوله‌كه‌یه‌كی لایه‌نگری ئیسرائیله‌ و زۆر رقی له‌ ئه‌ردۆغان و (AKP ) یه‌ ، به‌ تایبه‌تی دوای دیبه‌یته‌كه‌ی ئه‌ردۆغان و هێرشه‌كه‌ی بۆ سه‌ر شیمۆن پێرێز له‌ داڤۆس ، رێگه‌ی هه‌ڵه‌ی گرته‌به‌ر ، یه‌كه‌م دیداری سیاسیی له‌گه‌ڵ بالیۆزی ئێران له‌ ئانكارا سازدا و یه‌كه‌مین دیداری ته‌له‌فزیۆنیشی له‌گه‌ڵ ته‌له‌فزیۆنی مه‌ناری حیزبوڵڵادا سازكرد ، كه‌ پشتیوانی خۆی بۆ ئه‌و پارته‌ و چاره‌سه‌ری سیاسیی بۆ پرسی سوریا راگه‌یاند ، كه‌ ئه‌و قسه‌یه‌ لایه‌نگرانی رژێمی سوریا ده‌یكه‌ن بۆ رزگاركردنی رژێمه‌كه‌ی به‌شار ئه‌سه‌د له‌ رووخان .
ئه‌گه‌ر ئه‌وێ رۆژێ ببوایه‌ته‌ به‌شێك له‌ پارسه‌نگ بۆ AKP و به‌شدار بایه‌ له‌ حكومه‌ته‌كه‌یدا پرۆسه‌ی ئاشتیی نه‌ده‌گه‌ڕایه‌ دواوه‌ ، به‌ڵام ئێستا بۆ AKP ده‌ركه‌وت كه‌ ده‌نگده‌رانی تورك به‌و شێوه‌یه‌ ئاشتییان ناوێت كه‌ ( PKK ) هه‌ركاتێ ویستی جه‌نگ و كوشتار رێك بخاته‌وه‌ ، جگه‌ له‌وه‌ش ( HDP ) ئێستا به‌ ئه‌سته‌م له‌ به‌ربه‌ستی ( 10% ) تێپه‌ڕیووه‌ و هه‌ڵوێستی زۆر بێهێزه‌ ، بۆیه‌ AKP مه‌رجه‌كانی خۆی بۆ ئاشتیی قورستر ده‌كات و ئه‌مجاره‌ له‌وانه‌یه‌ تا هه‌موو چه‌كدارانی ( PKK ) له‌ باكوور نه‌كاته‌ ده‌ره‌وه‌و جۆرێك له‌ متمانه‌ ده‌سته‌به‌ر نه‌كات بۆ ئه‌وه‌ی ئه‌و هێزه‌ چه‌ك دابنێت ، پرسی ئاشتی ده‌ست پێنه‌كاته‌وه‌ ، كه‌ ئه‌مه‌ش زۆر ئه‌سته‌مه‌ ، هه‌رچه‌نده‌ ئۆجه‌لان زۆر دووربینانه‌ ئه‌م رۆژه‌ی پێشبینیی كردبوو بۆیه‌ مكوڕ بوو له‌سه‌ر ئه‌وه‌ی چه‌ك دابنرێ و راستگۆیانه‌ پرۆسه‌كه‌ به‌ڕێوه‌ ببه‌ن ، چونكه‌ ئه‌وه‌ی چه‌كی پێ بوو دواجار به‌ هه‌ڵه‌ش بێت له‌وانه‌یه‌ ئه‌و چه‌كه‌ ره‌نجی چه‌ندین ساڵه‌ بسوتێنێت ، وه‌كو دیتمان سوتاندێ " به‌ڵام جه‌میل بایك و به‌سێ هۆزات له‌م حیكمه‌ته‌ی ئۆجه‌لان نه‌گه‌یشتن !! 
مه‌خابن ئه‌وه‌ی پێشبینیمان كردبوو كه‌ كوردانی باكوور له‌ سیاسه‌تی چه‌ك و سیاسه‌تی خوێندنه‌وه‌ی قۆناغه‌كه‌دا هه‌ڵه‌ ده‌كه‌ن ، هه‌روا ده‌رچوو ، نه‌ سیاسه‌ته‌كه‌یان دوای حوزه‌یران حیكمه‌تی تێدابوو ، نه‌ هه‌ڵگیرسانه‌وه‌ی شه‌ڕیان خزمه‌تێكی به‌ كوردانی باكوور كرد ، به‌ڵكو ئارامیی چه‌ندان ساڵه‌ی تێكدایه‌وه‌ و كوردستانی خسته‌وه‌ ژێر باری نائاسایی ، بێ حیكمه‌تیی ده‌میرتاشیش له‌وه‌دا بوو ئه‌وه‌ی كه‌ له‌ پێكهێنانی حكومه‌تدا به‌ ( 80 ) كورسیه‌وه‌ له‌به‌رده‌ستیدا بوو نه‌یكرد ، كه‌چی دوای ئه‌وه‌ی شه‌ڕ باكووری گرته‌وه‌ و ده‌یان كه‌س بوونه‌وه‌ به‌ قوربانیی ئینجا ده‌یووت ئه‌مجاره‌ ئاماده‌ی ئیئتیلافه‌ له‌گه‌ڵ AKP دا ، له‌ كاتێكدا ئێستا نزیكه‌ی 25 كورسی په‌رله‌مانی له‌ده‌ستداوه‌ و (AKP ) ش پێویستی به‌ ئیئتیلافی هیچ لایه‌نێك نیه‌ ، به‌ تایبه‌تیش له‌ هه‌موو پارێزگاكاندا هه‌رچی ده‌نگی ( HDP ) كه‌می كردووه‌ راسته‌وخۆ بۆ ( AKP ) چووه‌ ، كه‌ ئه‌مه‌ جێگه‌ی سه‌رنج و سه‌رسووڕمانه‌ ، ئایا ئه‌و كوردانه‌ وه‌كو ( PKK ) زۆر جار تۆمه‌تباریان ده‌كات خائینن یا بێزارن له‌ هه‌ڵه‌ی ( PKK ) و ( HDP )ه‌ ؟!!
به‌روار: 02/11/2015
بینین: 1395
   زیاتر ...